اتىراۋ وبلىسىنىڭ اكىمى نۇرلان نوعايەۆ پەن ماڭعىستاۋ وبلىسىنىڭ اكىمى ەرالى توعجانوۆ ەكى وبلىستىڭ اراسىنداعى ىنتىماقتاستىق تۋرالى مەموراندۋمعا قول قويدى.

مەموراندۋمنىڭ ماقساتى - ءوڭىرارالىق كووپەراسيانى دامىتۋ جانە وڭىرلەردىڭ باسەكەگە قابىلەتتىلىگىن ارتتىرۋ بولىپ تابىلادى.تاراپتار ونەركاسىپ، شاعىن جانە ورتا بيزنەس سالاسىندا، اۋىل شارۋاشىلىعى، دەنساۋلىق ساقتاۋ، ەكولوگيا، قۇرىلىس سالالارىندا ىنتىماقتاستىق جاساۋعا كەلىستى. سونداي-اق وبلىستار اراسىندا جاستار ساياساتى، مادەنيەت جانە سپورت سالالارىندا دا ءوزارا ءىس-قيمىل جاساۋ كوزدەلۋدە.

اتىراۋ وبلىسىنىڭ اكىمى نۇرلان نوعايەۆ اتاپ وتكەندەي اكىمدىكتەردىڭ الدىندا تۇرعان باستى مىندەت- وڭىرلەردى ەكونوميكالىق دامىتۋدىڭ ءتۇرلى سالالارىنداعى تابىستى جۇمىس تاجىريبەسىمەن تانىسۋ.

"مەملەكەت باسشىسى نۇرسۇلتان نازاربايەۆتىڭ ماڭىزدى تاپسىرمالارىنىڭ ءبىرى ءوڭىرارالىق قارىم-قاتىناستى دامىتۋ بولىپ تابىلادى.تابىستى تاجىريبە الماسۋ وتە پايدالى، بۇل كوپ جاعدايدا دامۋ پروسەستەرىن جەدەلدەتەدى. ءبىز بۇگىن ماسەلەلەردىڭ كەڭ اۋقىمىن تالقىلادىق، ەكىجاقتى ىنتىماقتاستىق اياسىندا كوپتەگەن جوبالار بويىنشا پىكىر الماستىق.ءبىز قىزىعۋشىلىقتىڭ، ماسەلەنى ۇعىنۋدىڭ بار ەكەنىن كورىپ وتىرمىز. جاقىن ارادا بارلىق تالقىلانعان جوبالاردى ىسكە اسىرۋ جوسپارلانۋدا»، - دەدى نۇرلان نوعايەۆ.

ماڭعىستاۋ وبلىسىنىڭ اكىمى ەرالى توعجانوۆتىڭ پىكىرىنشە، ەكونوميكانى ءارتاراپتاندىرۋ ماقساتىندا شيكىزاتتىق ەمەس سەكتورلاردى دامىتۋ ماسەلەلەرىنە نازار اۋدارۋ قاجەت.

"بۇل وڭدەۋ ونەركاسىبى، شاعىن جانە ورتا بيزنەستى دامىتۋ، اۋىل شارۋاشىلىعىنداعى جوبالاردى ىسكە اسىرۋ، ازىق-تۇلىك قاۋىپسىزدىگى. قۇرىلىس جانە ءتۋريزمدى دامىتۋ سالاسىندا تارتىمدى جوبالار بار. بارلىق قول جەتكەن كەلىسىمدەردى ىسكە اسىرۋ وڭىرلەر مەن رەسپۋبليكانىڭ ەكونوميكالىق ءوسۋى ءۇشىن سەرپىن بەرمەك"، - دەپ باسا ايتتى ەرالى توعجانوۆ.

بۇگىنگى كۇنى ماڭعىستاۋ وبلىسى ەلىمىزدىڭ ءىرى كولىك لوگيستيكالىق حابتارىنىڭ ءبىرى. تەڭىز پورتتارىن دامىتۋ قازاقستاننىڭ ەكونوميكاسى ءۇشىن ۇلكەن سەرپىن بەرەدى. ماڭعىستاۋ وبلىسىنىڭ باسشىسى ءىرى مۇناي جوبالارىنداعى قازاقستاندىق قامتۋ ماسەلەسىن قوزعادى.

"وبلىستىڭ اۋماعىندا ءۇش مۇناي كومپانياسى جىلىنا ورتا ەسەپپەن 1 ترلن 400 ملرد تەڭگەگە تاۋارلار ساتىپ الادى. ونىڭ ىشىندە 30%-ى رەسپۋبليكادان تىس جەرلەردەن، بۇل شامامەن 500 ملرد تەڭگە. بۇل ءبىزدىڭ كاسىپورىندار ءۇشىن، ينۆەستيسيالار تارتۋ ءۇشىن ۇلكەن نارىق جانە الەۋەت. وسى تاۋارلاردى رەسپۋبليكا اۋماعىندا وندىرە وتىرىپ، ءبىز جەرگىلىكتى كومپانيالاردى دامىتۋعا، جاڭا جۇمىس ورىندارىن اشۋعا، مەملەكەت بيۋدجەتىن تولىقتىرۋعا جاعدايلار جاسايمىز"، - دەدى ەرالى توعجانوۆ.

ءوز كەزەگىندە اتىراۋ وبلىسىنىڭ اكىمى نۇرلان نوعايەۆ وبلىس اۋماعىندا ارنايى يندۋستريالىق ايماقتى دامىتۋ بويىنشا بولاشاق جوسپارلار تۋرالى اڭگىمەلەدى.

«وزدەرىڭىز بىلەسىزدەر، پارلامەنتتە ارنايى ەكونوميكالىق جانە يندۋستريالىق ايماقتار تۋرالى زاڭ جوباسى تالقىلانۋدا. ەگەر بۇل زاڭ قابىلداناتىن بولسا ءبىز وسى باعىتتا دامىتۋعا دايىنبىز. يساتاي اۋدانىندا ارنايى يندۋستريالىق ايماق قۇرۋ ءۇشىن جەر ۋچاسكەسى ءبولىندى. وسى باعىتتا تاجىريبە الماسۋ ءۇشىن ءبىز تۇركيادا بولدىق. ولاردا يندۋستريالىق ايماقتىڭ اۋماعىندا 35 مىڭ ادام، شامامەن 180 رەزيدەنت جۇمىس جاسايدى. ولاردىڭ ءبىر بولىگى، 35-40 كاسىپورىن ءبىزدىڭ نارىققا كەلۋگە دايىن.بۇل ءۇشىن زاڭنامالىق بازا، سالىق تۇراقتىلىعى قاجەت. سونىمەن بىرگە بىزدە مۇنايحيميالىق كلاستەردى دامىتۋ ءۇشىن ارنايى ەكونوميكالىق ايماق جۇمىس جاسايدى. مۇنداي جوبالاردى ىسكە اسىرۋ دايىن ءونىم شىعارۋعا مۇمكىندىك بەرەدى، بۇل باسەكەگە قابىلەتتى كاسىپورىندار قۇرۋعا سەپتىگىن تيگىزەدى»، - دەپ تۇسىنىك بەردى نۇرلان نوعايەۆ.

ايتا كەتەلىك، مەموراندۋمعا قول قويۋ ەكى وبلىستىڭ ەكونوميكالىق جانە ينۆەستيسيالىق الەۋەتىن دامىتۋعا جاڭا سەرپىن بەرەدى.