بۇل تۋرالى اقتوبە قالاسىنىڭ ونەر ورتالىعىندا ۇيىمداستىرىلعان تامىز كەڭەسىندە ايتىلعان بولاتىن. بيىلعى تامىز كەڭەسى ق ر پرەزيدەنتى ن.نازاربايەۆتىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى»، قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىن جۇزەگە اسىرۋ اياسىندا وتكىزىلدى.
تامىز پەداگوگيكالىق كەڭەسىن اشقان وبلىس اكىمى بەردىبەك ساپاربايەۆ ەلدىڭ، ۇلتتىڭ بولاشاعىنىڭ مۇعالىمدەردىڭ كاسىپقويلىعى مەن ءوز ىسىنە دەگەن ادالدىعىنا تىكەلەي بايلانىستى ەكەندىگىنە توقتالدى.
— سىزدەر قوعام ءۇشىن اسا جاۋاپتى، ەلدىڭ بولاشاعىن تاربيەلەيتىن ماماندىق تاڭدادىڭىزدار. كاسىبي بىلىگى جوعارى، ءبىلىمى مىقتى، جاڭا زاماناۋي يننوۆاسيالىق وي-پايىمى بار پەداگوگتار بولعاندا عانا ەلىمىزدىڭ گۇلدەنۋىنە، كوركەيۋىنە ۇلەس قوسا الاتىن مىقتى ماماندار تاربيەلەي الامىز. سىزدەردىڭ ەڭبەكتەرىڭىز زور قۇرمەتكە لايىق، جاڭا وقۋ جىلىنىڭ باستالۋىمەن قۇتتىقتاي وتىرىپ، جاۋاپكەرشىلىك جۇگى اۋىر جۇمىستارىڭىزعا ساتتىلىك تىلەيمىن، — دەدى وبلىس اكىمى ب.ساپاربايەۆ.
سودان سوڭ وبلىستىق ءبىلىم باسقارماسىنىڭ باسشىسى ءلاززات ورازبايەۆا ءسوز الىپ، جاڭا وقۋ جىلىنا دايىندىق جونىندە باياندادى. وبلىستىڭ باس پەداگوگى وتكەن وقۋ جىلىن قورىتىندىلاپ، العا قويعان جوسپارلاردى پىسىقتادى. ونىڭ ايتۋىنشا، بيىل ءبىلىم سالاسىنا 85 ميلليارد تەڭگە قاراجات قارالىپ وتىر.
— وبلىستا مەكتەپكە دەيىنگى 545 ۇيىمدا 49 090 بالا تاربيەلەنىپ جاتىر.
بالاباقشامەن قامتۋ ۇلەسى — 96%، بۇل رەسپۋبليكالىق كورسەتكىشتەن الدەقايدا جوعارى. اۋدانداردا بالاباقشالارداعى ورىن سانى حالىقتىڭ سۇرانىسىنا ساي كەلەدى. الايدا اقتوبە قالاسىندا بۇل ماسەلە ءالى دە وزەكتى كۇيىندە قالىپ وتىر. سوندىقتان قالا اكىمدىگى بالاباقشاداعى ورىن تاپشىلىعىن جويۋدىڭ ءتيىمدى تاسىلدەرىن قاراستىرىپ، وڭتايلى شەشىم قابىلداۋى قاجەت. بيىل وبلىستاعى 178 (51،1%) بالاباقشاعا كەزەككە تۇرۋ مەن جولداما بەرۋ ەلەكتروندى فورماتقا اۋىستىرىلدى. قازىرگى تاڭدا قوبدا سەلوسىندا، العا، حرومتاۋ، قاندىاعاش، ەمبى، جەم، تەمىر قالالارىندا اۆتوماتتاندىرىلعان جۇيە 100% ەنگىزىلدى. اقتوبە قالاسى، شالقار، ايتەكە بي، بايعانين، قارعالى اۋداندارىندا ەلەكتروندى فورماتقا كوشۋ جۇمىستارى جىل سوڭىنا دەيىن تولىق اياقتالادى. وسىعان وراي، اقتوبە قالاسى جانە اۋدان اكىمدىكتەرى بالاباقشاعا كەزەككە قويۋ نەمەسە جولداما الۋ قىزمەتىن ەلەكتروندى فورماتتا قولجەتiمدi ەتۋدى جەدەلدەتۋى ءتيىس، — دەدى ول.
اقتوبە وبلىسىندا سوڭعى ءۇش جىلدا جاڭا مەكتەپتەر قۇرىلىسى قارقىن الدى. 2016-2018 جىلدارى 48 مەكتەپ سالىنىپتى. ال 2006-2016 جىلدارى، ياعني ون جىل ىشىندە 69 مەكتەپ سالىنعان. سالىستىرىپ كورىڭىز! ءقازىردىڭ وزىندە 27 مەكتەپتىڭ قۇرىلىسى جۇرگىزىلىپ جاتىر، ولاردىڭ 15ء-ى جىل اياعىنا دەيىن پايدالانۋعا بەرىلەدى. بۇل وبلىستاعى 2 اپاتتى، 2 ەسكى، 14 ءۇش اۋىسىمدى مەكتەپتىڭ ماسەلەسىن شەشەدى.
