اقتوبە قالاسىندا كاسىپكەرلەردىڭ «جاڭا ترەند رەتىندەگى الەۋمەتتىك كاسىپكەرلىك» تاقىرىبىندا تەگىن سەمينار-كەڭەس ءوتتى. شارانى وبلىستىق كاسىپكەرلىك باسقارماسى قازاقستانداعى اقش ەلشىلىگىنىڭ قولداۋىمەن ۇيىمداستىردى.

وقۋ-سەميناردىڭ ماقساتى — جەكە تۇلعالاردىڭ ءوز الەۋمەتتىك جوباسىن ازىرلەۋدى، كاسىپكەرلىك داعدىلارىن دامىتۋدى، سونداي-اق قوعامداعى ماڭىزدى الەۋمەتتىك ماسەلەلەردى شەشۋگە ارنالعان يدەيالاردى قولداۋعا نيەت بىلدىرگەندەردى وقىتۋ. الەۋمەتتىك كاسىپكەر، تاجىريبەلى ترەنەر ەمين اسكەروۆتىڭ ايتۋىنشا، بۇگىنگى كۇنگە دەيىن 500-دەن استام ادامدى اتالمىش سالانى يگەرۋ جولىندا وقىتقانىن ايتادى. ال ءوزى يگەرىپ وتىرعان كاسىبىندە 32 ادامدى جۇمىسپەن قامتىپ وتىر. قاراماعىنداعى جۇمىسشىلارى ءتۇرلى دياگنوزدارعا شالدىققان كەمىستىگى بار ادامدار. اراسىندا جازاسىن وتەپ شىققاندارى دا بار. وقۋ-سەمينارعا كەلگەندەردىڭ دەنى ءوز كاسىبىن باستاعاندار. سەمينارعا قاتىسۋشىلار «الەۋمەتتىك-باعدارلى جوبانى قالاي قۇرۋ كەرەك جانە قالاي تابىسقا جەتۋگە بولادى؟» دەگەن سەكىلدى سۇراقتارعا جاۋاپ الدى.

— الەۋمەتتىك كاسىپكەرلىك — ەلىمىزدە جاڭادان يگەرىلىپ، قولعا الىنىپ كەلە جاتقان سالا. بۇل سالانى ءارى قاراي يگەرىپ، جۇمىسىن باستاپ كەتۋگە اقتوبەلىكتەردىڭ مۇمكىندىگى زور. ويتكەنى وبلىس اكىمدىگى بۇنى قولدايدى. بۇل ءبىزدى قۋانتادى، — دەيدى ەمين اسكەروۆ.

وقۋ-سەمينارىنا كەلگەندەردىڭ ءبىرى — سەرعازى قورعانبەكوۆ. بۇگىندە «قۇلامان» شارۋا قوجالىعىن باسقارىپ وتىرعان زەينەتكەردىڭ نەگىزگى ماماندىعى — دارىگەر. سەمينارعا كەلۋدەگى باستى ماقساتى دا مەديسينا سالاسىنا قاتىستى. ايتۋىنشا، اقتوبەدە يننوۆاسيالىق وفتالمو-پەدياتريالىق ورتالىق اشقىسى كەلەدى.

— مەنىڭ كوپتەن بەرى ويلاپ جۇرگەن ويىم — وسى. قالامىزدا بالالاردىڭ كوزدەرىن قاراتاتىن ارنايى يننوۆاسيالىق تەحنولوگيالارمەن جابدىقتالعان ورتالىق اشىلعانىن قالايمىن. قىزىم — دارىگەر، مەديسينا عىلىمدارىنىڭ دوكتورى. بۇگىندە الماتى قالاسىندا ەڭبەك ەتىپ جاتىر. ەگەردە وسى جوبانى قولعا الىپ، ءىسىم ءجۇرىپ جاتسا، ول ءوزىنىڭ تۋعان قالاسىنا كەلۋگە دايىن. مەندە مامان دا، عيمارات تا بار. تەك اتالعان ورتالىققا قۇرال-جابدىقتار الۋ ءۇشىن قالاي گرانتقا قول جەتكىزۋگە بولادى، جالپى بيزنەستى قالاي ۇيىمداستىرۋ قاجەت دەگەن سەكىلدى سۇراقتارعا جاۋاپ الىپ، بيزنەس يدەولوگياسىن ۇعىنۋ ءۇشىن بۇگىنگى سەمينارعا كەلدىم. بۇگىنگى سەمينار كەز كەلگەن ءوز كاسىبىن باستايمىن دەگەندەر ءۇشىن تاپتىرماس مۇمكىندىك الاڭى بولدى، — دەيدى سەرعازى قورعانبايەۆ.