شاعىن جانە ورتا كاسىپكەرلىكتى قولداۋ مەن ىنتالاندىرۋ بۇگىنگى كۇنى مەملەكەتىمىزدىڭ الدىنداعى وزەكتى ماسەلەلەردىڭ ءبىرى. بۇل تۇرعىداعى نەگىزگى ماقسات – شاعىن كاسىپكەرلىكتىڭ الەۋمەتتىك ەكونوميكالىق قىزمەتىن ءتيىمدى اتقارۋىنا مۇمكىندىكتەر جاساپ، ءومىر ءسۇرۋ مەرزىمىنىڭ نەعۇرلىم ۇزارۋىنا ىقپال ەتۋ بولىپ تابىلادى. وسى ورايدا اقتوبەدە شاعىن جانە ورتا بيزنەستى قولداۋ ماقساتىندا كوشە ساۋداسىن دامىتۋ بويىنشا الەۋمەتتىك جوبا ىسكە اسىرىلۋدا. اتالمىش جوبا اياسىندا قالانىڭ ءار بولىگىنەن كاسىپكەرلەرگە 250 جەر تەلىمى بەرىلەدى. بۇل تۋرالى وڭىرلىك كومۋنيكاسيالار قىزمەتىندە وتكەن باسپا ءسوز ءماسليحاتى بارىسىندا قالا اكىمىنىڭ ورىنباسارى ۇشقىن مىڭبايەۆ مالىمدەدى.

اقتوبەدە كوشە ساۋداسىن دامىتۋ جوباسى 2018-2020 جىلدار ارالىعىن قامتيدى. وسى كەزەڭدەردە قالادا 250 شاعىن ساۋدا پاۆيلوندارىن قۇرۋ جوسپارلانعان. جوبانىڭ ەرەكشەلىگى، پاۆيلونداردا جەرگىلىكتى وندىرۋشىلەر دەلدالسىز ءوز ونىمدەرىن تىكەلەي ساتۋعا مۇمكىندىك الادى. ال قالا تۇرعىندارى اۋىل شارۋاشىلىق ونىمدەرى مەن بۇيىمدارىن ارزان باعادا ساتىپ الا الادى. بۇل جەرگىلىكتى تۇرعىندار ءۇشىن دە، كاسىبىن جاڭا باستاعان جاس كاسىپكەرلەر ءۇشىن دە مول مۇمكىندىك.

— بۇگىنگە دەيىن 21 ورىن تابىستالدى. قوسىمشا تاعى 32 ورىن كوميسسيادا قارالىپ بەرىلدى. قازىرگى تاڭدا اتالعان ۋچاسكەلەردىڭ قۇجاتتارىن راسىمدەۋ جۇمىستارى جۇرگىزىلىپ جاتىر. جىل اياعىنا دەيىن تاعى 50 جەر ۋچاسكەسىن بەرۋ جوسپارلانعان. وبەكتىگە بەرىلەتىن ورىندار كاسىپكەرلەردىڭ قاجەتتىلىگىن، ولاردىڭ سۇرانىستارىن ەسكەرە وتىرىپ تاڭدالادى. سوندىقتان جەر ۋچاسكەلەرىن ءبولۋ تەك قالانىڭ ىشىندە عانا ەمەس، قالاعا قاراستى ەلدى مەكەندەردە دە قاراستىرىلعان، — دەيدى ۇشقىن مىڭبايەۆ.

پاۆيلونداردىڭ ءارقايسىنىڭ اۋماعى شامامەن 15-20 شارشى مەتردى قۇرايدى. سونداي-اق ولاردىڭ سىرتقى كورىنىسى دە ماڭىزدى ءرول اتقارادى. قالا اكىمى ورىنباسارىنىڭ ايتۋىنشا، كومەرسيالىق نىساننىڭ كونسترۋكسياسى قالانىڭ ساۋلەتتىك كورىنىسىنە سايكەس كەلەتىن زاماناۋي تالاپتارعا ساي بولۋى كەرەك.

بۇگىنگى تاڭدا جەر تەلىمدەرىن العىسى كەلەتىن كاسىپكەرلەردەن وتىنىشتەر قابىلدانىپ جاتىر.

— ساۋدا ورىندارىنا ارنالعان جەر ۋچاسكەلەرى 7 جىلعا دەيىن جالعا بەرىلەدى. قۇنى دا قىمبات ەمەس. كاسىپكەر شارشى مەترى ءۇشىن جىلىنا 13 مىڭ مەن 17 مىڭ تەڭگەنىڭ ارالىعىندا قارجى تولەيدى. ەگەر ءبىر جەر تەلىمىنە ۇمىتكەرلەر سانى 4 ادامنان اسسا، وندا اتالعان ۋچاسكە اۋكسيون ارقىلى بەرىلەدى. بۇل شاعىن جانە ورتا بيزنەستى دامىتۋعا مۇمكىندىك بەرەتىن سەرپىلىس ، — دەيدى «اقتوبە» الەۋمەتتىك كاسىپكەرلىك كورپوراسياسىنىڭ باسقارما باسشىسى ازامات مەدەۋبايەۆ.