كونستيتۋسيا كۇنىنە وراي اقتوبە وبلىسىنىڭ العا اۋدانىندا جاڭا مەكتەپ پايدالانۋعا بەرىلىپ، 60 پاتەرلى جاڭا ءۇيدىڭ كىلتى يەلەرىنە سالتاناتتى جاعدايدا تابىستالدى. اتالعان شاراعا وبلىس اكىمى بەردىبەك ساپاربايەۆ، وبلىستىق ءماسليحات حاتشىسى ءسانيا قالدىعۇلوۆا قاتىستى.

اتالمىش ۇيلەر «نۇرلى جەر» باعدارلاماسى اياسىندا العا قالاسىنداعى №5 شاعىن اۋدانىندا سالىنعان.

-ەلىمىزدە تۇرعىنداردى تۇرعىن ۇيمەن قامتاماسىز ەتۋ ماقساتىندا كوپتەگەن مەملەكەتتىك باعدارلامالار قابىلداندى. اتاپ ايتساق، «نۇرلى جەر»، «7-20-25» باعدارلامالارى ارقىلى كەزەكتە تۇرعان تۇرعىنداردى باسپانامەن قامتاماسىز ەتۋ كوزدەلىپ وتىر. بىلتىر وبلىستا 780 مىڭ شارشى مەتر تۇرعىن ءۇي قولدانىسقا بەرىلسە، بيىل ەڭ كەم دەگەندە 870 مىڭ شارشى مەتر تۇرعىن ءۇي پايدالانۋعا بەرىلەدى. بۇل كورسەتكىشتى كەڭەس ۇكىمەتى تۇسىندا بەرىلگەن ۇيلەرمەن سالىستىراتىن بولساق، ەكى ەسە كوپ. وتكەن جىلى وسى اۋداندا 60 پاتەرلى ءۇي پايدالانۋعا بەرىلسە، بۇگىن، تاعى 60 وتباسى قونىستويىن تويلاپ جاتىر. سوڭعى 30-40 جىلدا بۇل اۋداندا جول، ءۇي، مەكتەپ سالىنباعان. مۇنىڭ بارلىعى مەملەكەتىمىزدىڭ، ەلباسىنىڭ حالىقتىڭ ءال-اۋقاتىن جاقسارتۋعا باعىتتالعان ساياساتىنىڭ ارقاسىندا جۇزەگە اسىپ وتىر. وبلىس باسشىلىعى اتىنان بارلىق تۇرعىنداردى بۇگىنگى قۋانىشىمەن قۇتتىقتايمىن. باسپانالارىڭىز جايلى، قۇتتى بولسىن! — دەدى وبلىس اكىمى بەردىبەك ساپاربايەۆ.

سودان سوڭ ءوڭىر باسشىسى 600 ورىندىق العا مەكتەپ-گيمنازياسىنا باردى.

-مەملەكەت باسشىسىنىڭ تاپسىرماسىنا سايكەس، بۇگىنگى كۇنى ەلىمىزدە، ونىڭ ىشىندە وبلىستا بالالارعا ساپالى ءبىلىم بەرۋ ماقساتىندا جاڭا مەكتەپتەر سالىنىپ جاتىر. بيىل وڭىرىمىزدە 26 مەكتەپتىڭ قۇرىلىسى ءجۇرىپ جاتىر، ونىڭ 15ء-ى بيىلعى جىلى پايدالانۋعا بەرىلەدى. ونىڭ ىشىندە 9 مەكتەپ بيىلعى جاڭا وقۋ جىلىندا سالتاناتتى تۇردە اشىلادى.

زەرتتەپ قاراساق، سوڭعى وتىز جىلدا العا اۋدانىندا جاڭا مەكتەپ سالىنباعان. حالىقتىڭ سانىنىڭ، بالالار سانىنىڭ وسۋىنە بايلانىستى بۇگىن، مىنە، جاڭا ءبىلىم ورداسى پايدالانۋعا بەرىلىپ وتىر. بۇل مەكتەپ-گيمنازيادا جاقىن ورنالاسقان اۋىل، ەلدى مەكەندەردىڭ بالالارى كەلىپ ءبىلىم الادى. وسى ماقساتتا ءبىلىم ورداسىنىڭ جانىنان 60 ورىندىق ينتەرنات سالىندى. وبلىس باسشىلىعى اتىنان بارلىق تۇرعىنداردى بۇگىنگى جاڭا مەكتەپتىڭ اشىلۋىمەن قۇتتىقتايمىن! بالالارىمىز وقۋدا وزات بولىپ، ەلىمىزدىڭ ابىرويىن اسقاقتاتسىن! — دەدى وبلىس اكىمى.

جاڭا مەكتەپ-گيمنازيادا 35 وقۋ كابينەتى، اكت زالى، اسحانا، كىتاپحانا، ەكى سپورت زالى، سپورت الاڭى مەن جاتتىعۋ الاڭدارى بار. سونداي-اق مەكتەپ ينتەرنەت جەلىسىمەن جانە راديو جۇيەسىمەن قامتىلعان.

سونداي-اق وبلىس اكىمى اۋدان ورتالىعىنداعى جۋىردا اسفالت توسەلىپ، جوندەۋ جۇمىستارى جۇرگىزىلگەن كومسومول كوشەسىنىڭ تۇرعىندارىمەن كەزدەستى.

— بيىل العانىڭ بەس كوشەسىنە قاراجات ءبولىنىپ، قازىرگى تاڭدا ءۇش كوشەگە تولىعىمەن اسفالت جابىندىسى توسەلدى. مەردىگەر ۇيىم — «اسفالت»

جاۋاپكەرشىلىگى شەكتەۋلى سەرىكتەستىگى. ونىڭ ىشىندە كومسومول كوشەسىنە 2،2 شاقىرىم قاشىقتىقتا اسفالت جابىندىسى توسەلىپ، ءقازىر سۋاعارلار ورناتۋ ءۇشىن جۇمىستار جۇرگىزىلۋدە. كوشەنى جوندەۋگە 50 ميلليون تەڭگە ءبولىندى، جالپى كەلىسىمشارتتىڭ مولشەرى — 380 ميلليون تەڭگە، — دەدى العا قالاسىنىڭ اكىمى نۇربول سۇربايەۆ.

ايتا كەتسەك، بۇگىندە العادا جالپى ۇزىندىعى 61 شاقىرىمدى قۇرايتىن 52 كوشە بار، ونىڭ 19-ىنا اسفالت توسەلگەن. بيىل 7،3 شاقىرىمدى قۇرايتىن 5 كوشەگە، اتاپ ايتساق، ەسەت باتىر، كومسومول، اعنيازوۆ، يمانوۆ، ۆودوپروۆودنايا كوشەلەرىنە اسفالت جابىندىسىن توسەۋ ءۇشىن «اسفالت» جشس-مەن 488 ملن تەڭگەگە كەلىسىمشارت جاسالعان. سونداي-اق وبلىستىق بيۋدجەتتەن 60،2 ملن تەڭگە ءبولىنىپ، ءبىرقاتار كوشەلەرگە ورتاشا جوندەۋ جۇمىستارى جۇرگىزىلۋدە.