اقتوبە قالاسىنداعى اتاۋسىز 67 كوشەنىڭ اتى قازاقشالاندى. ءقازىر جاڭا كوشە اتتارى وبلىستىق ادىلەت دەپارتامەنتىندە تىركەلىپ، بارلىق قۇجاتتارى رەتتەلدى. ەندى كوشە كورسەتكىلەرى ىلىنەدى. جاڭا اتاۋلاردىڭ باسىم بولىگى قالانىڭ ىشىندەگى اتاۋسىز كوشەلەرگە قويىلعان. ماسەلەن ع.جۇبانوۆا كوشەسىنىڭ جانىنداعى اتاۋسىز كوشە تاۋكە حان اتالسا، ءبىرقاتار كوشەلەرگە قابانباي باتىر، ءجۇسىپ بالاساعۇن، اقان سەرى، اقتان كەرەي ۇلى، ەر قوساي سەكىلدى تۇلعالاردىڭ ەسىمى بەرىلدى. قوزى-كورپەش، قالقامان-مامىر، نارىن، سايگۇلىك، وقجەتپەس سەكىلدى اتاۋلار بەرىلگەن دە كوشەلەر بار. جاڭا اتاۋلار نەگىزىنەن قالانىڭ اقجار، اقجار-2، زارەچنىي، كىرپىشتى، راۋان، ياسنىي سەكىلدى اۋداندارىنداعى اتاۋسىز كوشەلەرگە بەرىلدى. اقتوبە قالالىق مادەنيەت جانە تىلدەردى دامىتۋ ءبولىمى مەكەمەسىنىڭ سەكتور مەڭگەرۋشىسى ايشا قۇلباتىردىڭ ايتۋىنشا، ەل ەسىندە ساقتالعان بايىرعى اتاۋلار سوڭعى جىلدارى قالپىنا كەلتىرىلىپ، قازاق ءومىرى، قازاق تاريحىنا ەش قاتىسى جوق اتاۋلار وزگەرتىلىپ، اتاۋسىز كوشەلەرگە اتاۋ بەرۋ جۇمىستارى جۇيەلى جۇرگىزىلىپ جاتىر.

اقتوبە قالاسىنداعى بۇرىنعى كولحوزنىي كوشەسى 2000 جىلى قالالىق ءماسليحاتتىڭ شەشىمىمەن التاي باتىر كوشەسى اتالدى. التاي باتىر كىم؟ جۇرتشىلىق بۇل ەسىممەن جاقسى تانىس بولعانىمەن باتىر تۋرالى دەرەكتەردى كوپشىلىك تەرەڭدەپ بىلە بەرمەيدى.

التاي ەبەسكى ۇلى — ەلىمىز بەن جەرىمىزدى جاۋدان قورعاعان، حالقىمىزعا كوزىن الارتقان بوگدە ويلى شاپقىنشىلارعا قىلىشىن كەسە ۇستاعان ەرەن باتىر، بەدەلدى بي، ءسوزى دۋالى ديپلومات. التاي باتىر قازاقستاننىڭ باتىسىن، اسىرەسە، اتىراۋ، جەم، ويىل بويلارىن قالماقتاردان قورعاۋ سوعىستارىنا بەلسەنە قاتىسقان. كىشى ءجۇزدىڭ كەتە رۋىنان. شەشەسى — قارلىعاش. قاراقىپشاق قوبىلاندىنىڭ ەرجۇرەك ساربازدارىنىڭ ءبىرى — ابىلمامبەت باتىردىڭ نەمەرەسى. التاي باتىردىڭ اكەسى دە باتىر بولعان. كىشى ءجۇزدىڭ كەتە رۋىنان. جوڭعارلارعا قارسى ازاتتىق سوعىستارعا (ساۋران ماڭىنداعى ) جانە اتىراۋ، جەم، ويىل بويلارىن ەدىل قالماقتارىنان قورعاۋعا بەلسەنە قاتىسقان. التاي باتىر 1738 جىلى قۇم وزەنىنىڭ جاعاسىن جايلاعان قالماق حانى دونديكقا قارسى ءابىلقايىر حان باستاعان جورىققى قاتىسقان. بوكەنباي باتىر ەكەۋى 2000 كىسىلىك قولدى، جەم وزەنىنىڭ باستاۋىنا بەكىنگەن قالماقتاردى جايىقتىڭ ارعى بەتىنە دەيىن قۋعان. 1749 جىلى جۇتتان مالدى امان ساقتاۋ ءۇشىن ەلىن باستاپ جايىقتىڭ ارعى بەتىنە وتۋگە رەسەي اكىمشىلىگىنەن رۇقسات العان. قالانىڭ ماسكەۋ اۋدانىندا ورنالاسقان التاي باتىر كوشەسىندە نەگىزىنەن جەر ۇيلەر ورنالاسقان. شاعىن دۇكەندەر مەن ساۋدا ورىندارى بار. وسى كوشەنىڭ تۇرعىنى مارات مۇسابايەۆ كوشەنىڭ قازىرگى اتاۋىنىڭ وتە ورىندى ەكەنىن ايتادى.

— زامان وزگەردى، كوشەنىڭ دە اتاۋىن وزگەرتۋ وتە ورىندى ءىس. ءقازىر التاي باتىر اتىنداعى كوشەدە تۇراتىنىمىزدى ماقتان تۇتامىز. بۇل كەيىنگى جاستارعا دا ۇلگى، — دەيدى قالا تۇرعىنى.