اقتوبە وبلىسىنىڭ اكىمى بەردىبەك ساپاربايەۆتىڭ باستاماسىمەن وبلىستا «تۋعان جەرگە تاعزىم» اكسياسى اياسىندا اۋىل-ايماقتاردا جاڭا عيماراتتار بوي كوتەرۋدە. اسىرەسە، اقتوبە وبلىسىنىڭ قارعالى، تەمىر، قوبدا اۋداندارىندا قارقىندى جۇمىستار جۇزەگە اسىرىلۋدا.

بيىل قارعالى اۋدانى بويىنشا اتالعان اكسيا اياسىندا جوسپارلانعان جوبالاردىڭ سانى – 46، جالپى قۇنى — 101 ملن 103 مىڭ تەڭگە. بۇگىنگى كۇنى اۋدان بويىنشا «تۋعان جەرگە تاعزىم» اكسياسى اياسىندا 28 جوبا جانە اۋىلدىق مەكتەپتەردە 50-دەن اسا كىشى جوبا جۇزەگە اسىرىلعان. جالپى قۇنى — 54 ملن 750 مىڭ تەڭگە. اكسيا اياسىندا بارلىق 8 اۋىلدىق وكرۋگ قامتىلعان.

اۋداندىق ىشكى ساياسات ءبولىمىنىڭ باسشىسى ەرجان ەسىمبايەۆتىڭ ايتۋىنشا، بيىل قىركۇيەك ايىندا اۋداندا جەرلەستەر فورۋمىن وتكىزۋ جوسپارلانۋدا. فورۋمعا اۋداننان شىققان قۇرمەتتى ازاماتتار، بەلگىلى كاسىپكەرلەر، ءار سالانىڭ بىلىكتى وكىلدەرى، ت.ب. شاقىرىلادى.

اتالعان فورۋم اياسىندا رەسەي، گەرمانيا جانە باسقا دا مەملەكەتتەردەن كەلەتىن جەرلەس كاسىپكەرلەردىڭ جانە تۇلەكتەردىڭ قاتىسۋىمەن اۋدان اۋماعىندا الەۋمەتتىك نىسانداردى سالۋ ءۇشىن بىرنەشە مەموراندۋمعا قول قويىلماق. اكسيا اياسىندا اۋدان ورتالىعى بادامشا اۋىلىندا مەكتەپ تۇلەكتەرىنىڭ دەمەۋشىلىگىمەن جاستارعا ارنالعان حوككەي كورتى سالىندى. سونداي-اق «باقىتتى بالا» جوباسى اياسىندا №1 بادامشا ورتا مەكتەبىنىڭ جانىنداعى جازعى سپورت الاڭىنا جەكە كاسىپكەردىڭ دەمەۋشىلىگىمەن قۇرىلىسقا دەيىنگى بارلىق جۇمىستار جۇرگىزىلگەن.

«تۋعان جەرگە تاعزىم» اكسياسى اياسىندا وبلىستىڭ جەلتاۋ اۋىلدىق وكرۋگىنە قاراستى ش.قالداياقوۆ اۋىلىندا كاسىپكەر ب.سايماقوۆتىڭ دەمەۋشىلىگىمەن «قازپوشتا» مەكەمەسى عيماراتىنىڭ قۇرىلىسى اياقتالىپ، پايدالانۋعا بەرىلدى. قوسەستەك اۋىلىندا جەكە كاسىپكەرلەردىڭ دەمەۋشىلىگىمەن اۋىلىشىلىك 4 كوشەگە اعىمداعى جوندەۋ جۇمىستارى جۇرگىزىلدى. كەمپىرساي اۋىلدىق وكرۋگىنە قاراستى جوسالى اۋىلىندا جوسپاردان تىس اۋىلىشىلىك كوشەلەرگە اعىمداعى جوندەۋ جۇمىستارى جاسالىپ، اۋىل تۇرعىندارىنىڭ جانە جەكە كاسىپكەرلەردىڭ دەمەۋشىلىگىمەن 8 كوشەگە قيىرشىق تاس توسەلىپ، تەگىستەلدى.

بۇگىنگى كۇنى جوسپاردان تىس بارلىق وكرۋگتەردە اۋىل تۇرعىندارىنا ارنالعان ۆوركاۋت الاڭدارى سالىنۋدا. قازىرگى تاڭدا اتالعان الاڭدار بادامشا، قوسەستەك، اششىلىساي، الىمبەت اۋىلدارىندا تۇرعىندارعا پايدالانۋعا بەرىلگەن.

-بيىل ماۋسىم ايىندا بارلىق مەكتەپ تۇلەكتەرىنىڭ باسىن قوسقان «تۇلەكتەر فەستيۆالىندە» اۋدان ورتالىعىنىڭ ستاديونىندا ءار جىلداردا تۇلەپ ۇشقان تۇلەكتەردىڭ قاتىسۋىمەن سالتاناتتى شارا ءوتتى. اتالعان شارا اياسىندا جەرلەستەردىڭ قاتىسۋىمەن بادامشا، اششىلىساي، ستەپنوي اۋىلدىق وكرۋگتەرىندە كەزدەسۋلەر، دوڭگەلەك ۇستەلدەر، شەبەرلىك كلاستارى ۇيىمداستىرىلدى، — دەيدى ە.ەسىمبايەۆ.

ايتا كەتۋ كەرەك، بيىل جوسپاردان تىس جەكە كاسىپكەردىڭ دەمەۋشىلىگىمەن جالپى قۇنى 25 ميلليون تەڭگە كولەمىندە پەتروپاۆل اۋىلىندا جەتىم وسكەن بالالاردىڭ وتباسىنا ارنالعان تۇرعىن ءۇي پايدالانۋعا بەرىلمەك.