اقتوبە قالاسىنداعى جاتاقحانالاردىڭ جاي-كۇيىن تەكسەرۋ ماقساتىندا قۇرىلعان ارنايى توپ وكىلدەرى م.وسپانوۆ اتىنداعى باتىس قازاقستان مەملەكەتتىك مەديسينا ۋنيۆەرسيتەتىنىڭ جاتاقحانالارىنا رەيد جۇمىستارىن جۇرگىزدى.
وبلىستىق جاستار ساياساتى ماسەلەلەرى باسقارماسىنىڭ ۇيىمداستىرۋىمەن وتكەن شاراعا اقتوبە قالالىق جەرگىلىكتى پوليسيا قىزمەتىنىڭ باستىعى باقىتبەك سىدىقبايەۆ، قالالىق ءماسليحات دەپۋتاتتارى، كوعامدىق كەڭەس جانە «جاس ساقشى» جاساعىنىڭ مۇشەلەرى قاتىستى.
اتالعان ۋنيۆەرسيتەتتە بارلىعى 5 ستۋدەنتتەر جاتاقحاناسى بار. الدىمەن توپ وكىلدەرى ا.دوسجانوۆا اتىنداعى №5 جاتاقحانادا بولدى.
— ءقازىر ستۋدەنت ءۇشىن جاتاقحانادان ورىن الۋ — ەڭ باستى ماسەلەلەردىڭ ءبىرى. بۇل جاتاقحانادا مىڭ ستۋدەنتكە ارنالعان ورىن بار. ءبىر ستۋدەنت ءبىر بولمەدە تۇراتىن بولسا، جاتاقحانا اقىسى — 10 ايعا 120 مىڭ تەڭگە. ال ەكى نەمەسە ءۇش ادامعا ارنالعان بولمەلەر — 80 مىڭ تەڭگە تۇرادى. الدىمەن وزگە وبلىستان كەلگەن ستۋدەنتتەر ورنالاستىرىلادى. جالپى، بيىل بارلىق ستۋدەنتتەرگە ورىن جەتكىلىكتى. اقتوبەدە قوعامدىق ءتارتىپتى كۇشەيتۋ ماقساتىندا وتكەن ايدا «جاس ساقشى» جاساعى قۇرىلعان بولاتىن. جاستار مەن ستۋدەنتتەردەن قۇرالعان توپ وكىلدەرى كۇندىزگى جانە تۇنگى رەيدتەرگە شىعىپ، جاستار ارسىنداعى قوعامدىق ءتارتىپتى، قالا تازالاعىن، جاستاردىڭ قوعامدىق ورتادا ءوزىن-وزى ۇستاۋىن قاداعالايدى، — دەيدى «جاس ساقشى» جاساعىنىڭ كوشباسشىسى اياگۇل جانعوجا.
بۇگىندە جاتاقحاناعا ستۋدەنتتەردىڭ العاشقى لەگى ورنالاسىپ جاتىر. جاستار يگىلىگىنە بەرىلگەن جاڭا جاتاقحانادا بارلىق جاعداي جاسالعان. مەديسينالىق پۋنكت، كومپيۋتەرلىك زالدار، ءار قاباتتا دەمالىس ورىندارى مەن ءاسۇي بولمەلەرى، ت.ب. بار. ءتورت بلوكقا بولىنگەن جاتاقحانادا ءتورت كۋرستىڭ ستۋدەنتتەرى تۇرادى. جەتىم جانە كوپ بالالالى وتباسىنان شىققان ستۋدەنتتەرگە جاتاقحانادا تەگىن تۇرۋعا مۇمكىندىكتەر قاراستىرىلعان.
بۇدان سوڭ ارنايى توپ وكىلدەرى مەديسينا ۋنيۆەرسيتەتىنىڭ №1 جاتاقحاناسىنا باردى. جاتاقحانانىڭ كومەندانتى ءساليما جاڭابايەۆانىڭ ايتۋىنشا، مۇندا
430 ستۋدەنتكە ارنالعان ورىن بار. ونىڭ 300-گە جۋىعى شەتەلدىك ازاماتتارعا ارنالعان. ستۋدەنتتەر«سيريۋس» اۆتوماتتاندىرىلعان اقپاراتتىق جۇيەسى ارقىلى ونلاين سۇرانىس بەرەدى. ياعني بارلىعى ەلەكتروندى تۇردە جۇرگىزىلەدى. جاتاقحانا اقىسى — 10 ايعا 50 مىڭ تەڭگە.
