الماتى وبلىسىندا كۇزگى مەرزىمدى اسكەرگە شاقىرۋ ناۋقانى باستالدى. بۇل كەزەڭدە جەتىسۋ وڭىرىنەن 1991-2000 جىلى تۋىلعان 1900-گە جۋىق ازامات اسكەر قاتارىنا اتتاندىرىلادى دەپ جوسپارلانعان.

وسىعان وراي، الماتى وبلىسى قورعانىس ىستەرى جونىندەگى دەپاراتمەنتىنىڭ ۇيىمداستىرۋىمەن نۇسقاۋلىق-ادىستەمەلىك جيىن وتكىزىلدى. اتالعان شاراعا شاقىرۋ، مەديسينا كوميسسياسىنىڭ ءتوراعالارى، جەرگىلىكتى اسكەري باسقارۋ ورگاندارىنىڭ باستىقتارى، تالدىقورعان گارنيزونىنىڭ اسكەري پروكۋرورى، ۇقكد، ءىىد جانە اسكەري بولىمدەردىڭ وكىلدەرى قاتىستى.

جيىننىڭ باستى تاقىرىبى – كوكتەمگى مەرزىمدى اسكەرگە شاقىرۋدى قورىتىندىلاۋ، كۇزگى اسكەرگە شاقىرۋدىڭ نەگىزگى مىندەتتەرى مەن تالاپتارىن تالقىلاۋ. ءار قۇرىلىمدىق بولىمدەردىڭ وكىلدەرى ءوز سالاسىنا قاتىستى تاقىرىپتا بايانداما جاساپ، مەرزىمدى اسكەرگە شاقىرۋدا ورىن الاتىن ماسەلەلەر مەن ولاردى شەشۋ جولدارىمەن ءبولىستى.

سونىمەن قاتار، قورعانىس ىستەرى جونىندەگى بىرىكتىرىلگەن باسقارماسى مەن ءبولىم باستىقتارى مەرزىمدى اسكەر قاتارىنا شاقىرۋعا دايارلىقتارى، جۇرگىزىلگەن جۇمىستارى مەن جوسپارلارى بويىنشا تىڭدالادى.

ءوز كەزەگىندە الماتى وبلىسى قورعانىس ىستەرى جونىندەگى دەپاراتمەنتىنىڭ باستىعى پودپولكوۆنيك تالعات داۋلەتحانوۆ اسكەرگە شاقىرۋ جۇمىسىمەن اينالىساتىن جاۋاپتى ادامداردىڭ قىزمەتتەرىنە جاۋاپكەرشىلىكپەن قاراۋعا شاقىردى.

* وتان الدىنداعى بورىشىن وتەۋدى قاسيەتتى پارىزىم دەپ بىلەتىن، مورالدىق جانە پسيحولوگيالىق تۇرعىدان مىقتى، فيزيكالىق جاعىنان مىعىم ازاماتتارعا باسىمدىق بەرگەنىمىز ءجون، - دەدى ول.

ۇستىمىزدەگى جىلدىڭ 10 قىركۇيەگىنەن باستاپ الماتى وبلىسىنان شاقىرىلعان ازاماتتار ق ر ۇقك شەكارا قىزمەتىنىڭ اسكەري بولىمدەرىنە اتتاندىرىلا باستايدى. ودان كەيىنگى كەزەكتە ق ر مەملەكەتتىك كۇزەت قىزمەتى، ق ر قارۋلى كۇشتەرى، ق ر ءىىم ۇلتتىق ۇلاننىڭ اسكەري بولىمدەرىنە جىبەرىلەدى.

كۇزگى اسكەرگە شاقىرۋ ناۋقانىن ساپالى، ءارى ۋاقتىلى ورىنداۋ ماقساتىندا كوميسسيا ءار شاقىرىلۋشىنى جەكە-جەكە قاراستىرىپ، العان ءبىلىمىن، ماماندىعىن ەسكەرەدى، وتباسى جاعدايىن ساراپتايدى، دەنساۋلىعىنىڭ جارامدىلىعىن باستى نازارعا الا وتىرىپ، ونى اسكەر قاتارىنا قابىلداۋ-قابىلداماۋ تۋرالى شەشىم قابىلدايدى. جاساقتاۋ ەكستەرريتوريالدى پرينسيپكە سايكەس جۇزەگە اسىرىلادى، ياعني شاقىرىلۋشى وزگە وبلىسقا اتتاندىرىلادى.

مەرزىمدى اسكەري قىزمەتكە شاقىرۋ 2018 ج. جەلتوقسان ايىنىڭ سوڭىنا دەيىن جۇرگىزىلەدى. «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» ق ر زاڭىنا سايكەس مەرزىمدى اسكەري قىزمەتكە 18 بەن 27 جاس ارالىعىنداعى، مەرزىمىن كەيىنگە قالدىرۋعا جانە اسكەردەن بوساتىلۋعا قۇقى جوق ازاماتتار قابىلدانادى.