2018 جىلدىڭ 8 قىركۇيەگىندە قۇرلىق اسكەرلەرىنىڭ اسكەري ينستيتۋتىنىڭ 1 كۋرس كۋرسانتتارى اسكەري انت قابىلدادى.

اسكەر قاتارىندا قىزمەت ەتىپ، وتان الدىنداعى پارىزدى وتەۋگە ءاربىر ازامات مىندەتتى. سەبەبى، تۋعان جەردى، ەلدى، اتامەكەندى قورعاۋ – قاسيەتتى بورىش. ال ەلدىڭ قاۋىپسىزدىگى مەن اۋماقتىق تۇتاستىعىن قورعاۋ ءۇشىن اسكەرگە كەلگەن ءاربىر ازاماتتىڭ ومىرىندەگى ەڭ ماڭىزدى قادامدارىنىڭ  ءبىرى – اسكەري انت قابىلداۋ.

بۇگىن قۇرلىق اسكەرلەرىنىڭ اسكەري ينستيتۋتىتىنىڭ 1 كۋرس كۋرسانتتارى  وتانىنا، پرەزيدەنتىنە، حالقىنا سەرت بەردى.  

انت قابىلداۋ - وتانىنا، ەلىنە، تۋعان جەرىنە اقتىق دەمىڭ شىققانشا ادال بولۋ، ەل باسىنا سىن ساعات تۇسسە - مويىماي كوتەرۋ، قاجەت بولسا، جان قيۋ دەگەن ءسوز.

ينستيتۋت باستىعى گەنەرال-لەيتەنانت كۋربان قاراجانوۆ كۋرسانتتارعا ءوز قۇتتىقتاۋ سوزىندە: - اسكەري انت – ادالدىق رۋحى. حالقىمىز «انتتان اتتاعانى – اردان اتتاعانى»، - دەيدى. ياعني، ادامزات نورمالارىنىڭ قالىپتاسقان شەگى ار بولسا، ونى بۇزۋ وپاسىزدىققا جاتادى. تالاي عاسىر حالقىنىڭ ەركىندىگىن سىرتقى جاۋلاردان قورعاعان سىندى باتىر بابالارىمىزدىڭ، كەشەگى ءفاشيزمنىڭ وتىن وشىرگەن مايدانگەر، اسكەري قولباسشى باۋىرجان مومىش ۇلى اتالارىمىزدىڭ اماناتتاعان وتانىمىزدىڭ تاۋەلسىزدىگىن قىراعى كۇزەتۋ – ەڭ ۇلى قىزمەت. سوندىقتان دا بۇگىنگى بەرگەن انتتارىڭا ءاردايىم ادال بولىڭدار! –دەپ اتاپ كەتتى.