الەۋمەتتىك جەلىلەردە اتىراۋلىق جۇكتى ايەلدىڭ قايتىس بولعانى، ونىڭ سالافيلىك باعىتتى ۇستانعان ءدىندار ەكەندىگى جازىلۋدا. راسىندا دا، 12 قىركۇيەك كۇنى اتىراۋ وبلىستىق پەريناتالدىق ورتالىققا «جەدەل جاردەم» كولىگىمەن جەتكىزىلگەن 25 جاستاعى ايەل قايتىس بولدى.

ورتالىق ديرەكتورى قۋانىش نىسانبايەۆتىڭ جۋرناليستەرگە بەرگەن اقپاراتى بويىنشا، جۇلدىز-1 ىقشاماۋدانى، 4-كوشە، 5ء-شى ءۇيدىڭ تۇرعىنى مارتا بايمۇقانوۆا جۇكتىلىكتىڭ 38ء-شى اپتاسىندا بولعان. تاڭەرتەڭگى ساعات 8.55-تە ەس-تۇسسىز اۋرۋحاناعا تۇسكەن انا مەن بالا ءومىرىن دارىگەرلەر ساقتاپ قالا الماعان.

«وعان سەبەپ – جۇكتى ايەلدىڭ ءدىني سەنىمى بويىنشا ەر دارىگەرگە قارالۋدان باس تارتۋى» دەپ جازادى جەلىدە. ءبىر دەرەكتە مارقۇمنىڭ كۇيەۋى «ايەلىمنىڭ اۋرەتتى جەرىن ەر دارىگەر قاراۋعا بولمايدى» دەپ، شاقىرتۋ بويىنشا جەتكەن «جەدەل جاردەم» دارىگەرىن ۇيىنە كىرگىزبەي قويعان كورىنەدى. سونىڭ كەسىرىنەن كوماعا ءتۇسىپ كەتكەن ايەلدىڭ بەتى بەرى قاراماعان.

ءبىراق مارتانىڭ كۇيەۋى بەكتاس «جاس الاش» تىلشىسىنە بەرگەن جاۋابىندا «جەدەل جاردەم» دارىگەرى ايەل ادام بولعانىن، ايەلىنىڭ ۇيدەگى بالالارعا الاڭداپ، اۋرۋحاناعا بارعىسى كەلمەگەنىن، «بارمايمىن» دەپ قولىنان كولحات جازىپ بەرگەنىن، ەشكىمگە تالاپ-تىلەگىنىڭ جوقتىعىن ايتادى.

الايدا «جەدەل جاردەم» ستانساسىنىڭ اقپاراتى بويىنشا، اتالمىش مەكەنجايدان تۇنگى ساعات 3 شاماسىندا العاشقى شاقىرتۋ قوڭىراۋى تۇسكەن. ىلە جەتكەن «جەدەل جاردەم» دارىگەرىنىڭ ەر ادام ەكەنىن كورگەن ناۋقاستىڭ كۇيەۋى ونى ۇيىنە كىرگىزبەگەنى شىندىق بولىپ شىقتى. تۇنگى ساعات 03-تەن تاڭعى 8.55-كە دەيىن جۇكتى ايەلدىڭ ءوزىنىڭ جانە ءسابيدىڭ ءومىرىن قاۋىپكە تىگىپ ۇيىندە وتىرعانى انىقتالىپ وتىر.

كۇيەۋى بەكتاس اتىراۋلىق جاماعاتقا الەۋمەتتىك جەلى ارقىلى حابارلاندىرۋ بەرگەن. وندا «ايەلىم مەن بالامنىن جانازاسى 14.09.2018 كۇني تان ەرتەن ساعات 10:00 دە وقىلادى. سالافيلەردىن جولىن ۋستانگان جان ەدي. ەگەر كارىزى بولسا ماگان حابارلاسىنىزدار. ەسيمي مارتا بايمۋحانوۆا ادرەس: جۋلدىز 4 كوشە ليدەرگە جەتپەي ونگا بۋرىلادى بەكتاس» دەپ جازىلعان.

بۇگىن انا مەن بالانىڭ دەنەسى جەر قوينىنا تاپسىرىلدى.

بەلگىلى ادۆوكات ايگۇل ورىنبەك Facebook جەلىسىندە «ارتىندا ءۇش بالاسى جەتىم قالدى. وسىنداي قاراڭعىلىقتىڭ ارقاسىندا ادام ءولىمى بولىپ وتىر. اناۋ ساقالدى زومبيعا زاڭدى تۇردە جازاسىن بەرۋ كەرەك» دەپ اشىنا ءۇن قوسقان.

راسىندا دا، سوڭعى جىلدارى يسلامدى بۇرمالاپ، اسىل ءدىنىمىزدى دۇرىس تۇسىنبەي، تەرىس اعىمعا ەرگەن كوپتەگەن اسىرەدىنشىل تاراپىنان كەلەڭسىز ءارى قايعىلى وقيعالاردىڭ ورىن الىپ جاتقانى جاسىرىن ەمەس. ءومىر ەسىگىن اشپاي جاتىپ شەتىنەپ كەتكەن كۇناسىز ءسابيدىڭ وبالى كىمگە سوندا؟ بۇل ورەسكەل قاتەلىكتىڭ ورىن الۋى ءسابيدىڭ تۋعان اكەسىنىڭ تاراپىنان بولسا، ءتىپتى ۇلكەن كۇنا ەمەس پە؟!

دەرەككوز: Durbi.kz