بۇگىن ساياسي تۇتقىن مۇحتار جاكىشيەۆتىڭ اناسى رايسا جاكىشيەۆانىڭ جەرلەۋ ءراسىمى ءوتتى دەپ جازادى Qamshy.kz اقپارات اگەنتتىگى. مۇحتار جاكىشيەۆ اناسىنىڭ قايتىس بولۋىنا بايلانىستى جەرلەۋ راسىمىنە قاتىسۋعا رۇقسات سۇراعان بولاتىن. الايدا بيلىك بۇعان قارسىلىق ءبىلدىردى. وسى جايتقا قاتىستى بەلسەندىلەر فەيسبۋك جەلىسى ارقىلى ءوز ويىن ىشكە بۇگىپ قالماي، پىكىرىن ءبىلدىرىپ، قايعىلى جايتقا كوڭىل ايتتى. قوعام بەلسەندىلەرىنىڭ الەۋمەتتىك جەلىگە جاريالاعان جازباسىن Qamshy.kz اقپارات اگەنتتىگى وقىرمان نازارىنا ۇسىنۋدى ءجون كوردى.
مۇحتار جاكىشيەۆتىڭ اناسى قايتىس بولعانى بەلگىلى بولدى. اناسى بالاسىنىڭ دا، ءوزىنىڭ دە ءومىرىن قۇرتقان جۇيەنى قالاي قارعاعانىن كوز الدىما ەلەستەتە دە المايمىن.
بيلىك تاراپىنان جاسالعان وسىنداي ماسقارا تىيىم — ءبىزدىڭ بۋىنداعى كوزگە تۇسە بىلگەن وكىلگە ساياسي تۇرعىدا جاسالعان ءزابىردىڭ انىق كورىنىسى.
پرەزيدەنتتەن كۇننەن كۇنگە دەنساۋلىعى اسقىنىپ بارا جاتقان مۇحتار جاكىشيەۆتى بوساتۋىن سۇرايمىز!
ايتپەسە بيلىك ەلىمىزدىڭ وركەندەۋىنە ۇلەس قوسا الاتىن تالانتتى باسقارۋشىعا قارسى جاسالىپ وتىرعان جەكە باستىڭ، ساياسي تۇرعىداعى قاندى كەكتىڭ بار ەكەنىن جاسىرا المايدى.
مەن مۇحتار مەن ونىڭ وتباسى، تۋعان-تۋىسىنا كوڭىل ايتامىن!
ساياسي تۇتقىن مۇحتار جاكىشيەۆتىڭ اناسى قايتىس بولدى. ال تۇرمە اكىمشىلىگى مۇحتار جاكىشيەۆتى اناسىن سوڭعى ساپارعا شىعارىپ سالۋىنا رۇقسات بەرمەگەن. مەن وسى جايتقا بايلانىستى بيلىككە ءبىزدىڭ كەڭەستىك زاماندا ەمەس، اتا-بابانىڭ سالتىن ۇستانىپ، «و دۇنيەلىك بولعان ادامدى ماڭگىلىك مەكەنىنە شىعارىپ سالۋ – وتباسىنىڭ، اعايىننىڭ پارىزى»، -دەگەن زاڭدىلىقتى ۇستاناتىن حالىق ەكەندىگىمىزدى ەسكەرتكىم كەلەدى.
مۇحتار جاكىشيەۆ ادام ولتىرگەن قاندى قول قىلمىسكەر ەمەس. وعان قاسىنا جەندەتتەردى جىبەرىپ بولسىن اناسىن سوڭعى ساپارعا شىعارىپ سالۋىنا مۇمكىندىك بەرۋ كەرەك. مۇمكىندىك بەرىلمەگەن جاعدايدا، حالىقتىڭ بۇل قارسىلىقتى اتا-بابا داستۇرىنە قارسى شىعۋ دەپ باعالاعاننان باسقا امالى قالمايدى.
جۇرەك تۇكپىرىندە ادىلدىكتىڭ ورناپ، مۇحتار جاكىشيەۆتى اناسىن سوڭعى رەت كورۋگە رۇقسات بەرەدى دەگەن سەنىم مەن ءۇمىت وتى تۇتانعانداي بولىپ ەدى. بۇل زاڭدا كودەكس رەتىندە دە كورسەتىلگەن. تۇپتەپ كەلگەندە بۇل ادامگەرشىلىك پەن ادامدىق قوي، قۇرىپ كەتكىر. جازاسىن وتەۋشىنىڭ مەيلى مىڭداعان جەندەتپەن بىرگە بولسىن ومىردەگى ەڭ قىمبات جان بولعان اناسىمەن قوشتاسۋىندا تۇرعان نە بار؟
ەگەر جاكىشيەۆتى ءوزى جاساعان قىلمىسقا بولا جازالاعان بولسا، ول جەتكىلىكتى دەڭگەيدە زارداپ شەككەن ازامات. باسقا دا جەمقور جانە ۇرى شەندى-شەكپەندىلەر تۇرمەدە قانشا جىل وتىرعان ەدى؟ كوپ دەگەندە بىرنەشە جىل، ءتىپتى بىرنەشە اي تۇرمەدە وتىرىپ ەمىن-ەركىن بوستاندىققا شىققاندار بار.
جەمقور، بۇرىنعى «قازينجينيرينگ» كومپانيا ءتوراعاسىنىڭ بۇرىنعى ورىنباسارى قانات سۇلتانبەكوۆ 2 ملرد تەڭگە تولەپ، بوستاندىققا شىقتى. ول الگى اقشانى قايدان الدى؟ قالاي تاپتى؟ بۇعان ەشكىم ءمان بەرمەيدى. بوستاندىققا شىعارۋعا شەشىم قابىلدادى، شىعاردى.
ال انتيمونوپوليالىق كوميتەتتىڭ بۇرىنعى باسشىسى مۇرات وسپانوۆ مۇلدەم تۇرمەگە وتىرمادى. ول دا ايىپپۇلمەن قۇتىلدى. بۇل سەكىلدى مىسالداردى ۇزاق ۋاقىت سانامالاپ وتىرا بەرۋگە بولادى.
ال جاكىشيەۆ نە ءۇشىن تۇرمەدە وتىر؟ ول 9 جىلىن ونسىز دا تار قاپاستا، لاگەردە وتكىزىپ، دەنساۋلىعىنان ايىرىلىپ، مۇگەدەككە اينالدى. ەندى ءتىپتى اناسىمەن قوشتاسۋىنا دا، سوڭعى رەت كورىسۋىنە دە رۇقسات بەرمەدى. ادىلدىك قايدا؟ جاكىشيەۆتى اناسىمەن كەزدەسۋىنە قارسى بولعان ادامداردىڭ ادامگەرشىلىگى قايدا؟ ەگەر ول اناسىمەن كەزدەسە سالسا، مىنا وپاسىز جالعاندا نە وزگەرەر ەدى؟
كرەملگە، رەسەيلىك بيلىككە قاراڭىزدارشى. ساياسي رەجيمنىڭ جاۋى ميحايل حودوركوۆسكيي قانداي قىلمىس جاساسا دا، بيلىك سوڭعى رەت اناسىمەن كەزدەسۋىنە مۇمكىندىك بەردى. ول اناسىنىڭ مىنا ومىردەگى سوڭعى ساتتەرىندە قاسىندا بولدى. حودوركوۆسكيي بۇل ساتتەردى ەشقاشان ۇمىتقان ەمەس، ۇنەمى ايتىپ وتىراتىن.
ال جاكىشيەۆتىڭ اناسىمەن قوشتاسۋىنا رۇقسات بەرۋگە نە كەدەرگى؟ ەندى بيلىك ويلانىپ، مۇحتار جاكىشيەۆكە اناسىنىڭ جەرلەۋ راسىمىنە بارۋعا رۇقسات ەتەدى دەپ ۇمىتتەنەمىن. ول اناسىن ءتىرى كەزىندە كورە المادى، ەڭ بولماسا سوڭعى ساپارعا شىعارىپ سالسىن.
مۇxتار جاكىشيەۆتىڭ اناسى قايتىپتى. اپتالداي ازاماتى تۇرمەدە قۋارىپ، سولىپ بارا جاتسا، قاي انانىڭ جۇرەگى شىداسىن... ايتۋعا ءسوز تاپپاي وتىرمىن...
مۇxتار جاكىشيەۆتىڭ وتباسىنا قايعىرىپ كوڭىل ايتامىن. بۇل وتباسىنىڭ تراگەدياسىن، مۇxتار كەشكەن تاعدىردى، اناسى كورگەن قاسىرەتتى ەشكىمنىڭ باسىنا بەرمەسىن. تالاي تاۋ تۇلعامىزدى قولدان قۇلاتىپ، بالا-شاعاسىن جىلاتقان جۇيەگە توقتام بولماي تۇر.
مۇxتار قورشاعان ورتاعا ءقاۋىپتى قىلمىسكەر ەمەس ەدى. اناسىمەن سوڭعى رەت باقۇلداسۋعا رۇقسات ەتپەگەندەر، اقتىق ساپارعا شىعارىپ سالۋعا دا مۇمكىندىك بەرمەگەن شىعار... بوركەمىكپىز... قازاق xالقىنا قايعىرىپ كوڭىل ايتامىن...
بۇعان دەيىن كەيبىرەۋدە كۇمان بولسا، ەندى مۇحتار جاكىشيەۆتى اناسىمەن قوشتاسۋعا جىبەرمەگەن جۇيە ءوزىنىڭ بەت-پەردەسىن تولىق اشتى. نە دەگەن جاۋىزدىق. ءومىرىن قازاق اتوم ءوندىرىسىن دامىتىپ ونى رەسەيدەن تاۋەلسىز ەتۋگە ارناعان مۇحتارداي ازاماتتى ۇلىقتاۋ ورنىنا تۇرمەدە ءشىرىتىپ قويۋ ەشبىر قيسىن مەن ادامگەرشىلىككە جاتپايتىنى ءوز الدىنا. سوندىقتان اناسىنان ايرىلعان مۇحتار مەن ونىڭ تۋىستارىنا عانا ەمەس، بۇگىنگى ءومىر سالتىمەن كەلىسكەن، نامىسى مەن بوستاندىقتارى اياققا تاپتالعان كۇللى قازاققا قايعىرا كوڭىل ايتامىن.
پىكىر قالدىرۋ