2014 جىلى ولار قۇشاقتاسىپ، فوتوعا تۇسەدى. ول كەزدە داعىستاندىق حابيب نۋرماگومەدوۆ كونور ماكگرەگوردىڭ توبەلەسىنە ءتانتى بولىپ جۇرگەن كەزى. 2016 جىل – حابيبتىڭ اكەسى ابدۋلماناپ نۋرماگومەدوۆتىڭ بالاسىنىڭ اتاق-ابىرويىن ويلاپ، اتى شۋلى كونورمەن جەكپە-جەك ۇيىمداستىرۋدى كوزدەگەن ۋاقىتى. الايدا جاراقاتقا بايلانىستى ەكى سپورتشى بىر-بىرىمەن كەزدەسە المايدى. حابيبتىڭ كونورعا قاراعاندا سالماعى اۋىرلاۋ بولۋى دا كەزدەسۋدى مۇمكىن قىلا المادى. ودان كەيىن كونور 1 جىلدىق دەمالىسقا شىعادى. بۇل تۋرالى حابيب بىلاي ازىلدەگەن بولاتىن: «كونوردىڭ ايەلى ەمەس، ءوزى جۇكتى بولىپ قالعان سياقتى. قىسقاسى، كونور دەكرەتتە». حابيبتىڭ بۇل ءازىلى كونوردىڭ شامىنا تيسە بولۋى كەرەك، قارسىلاسىنىڭ اكەسى تۋرالى جازبا جاريالايدى. كونوردىڭ ايتۋىنشا، حابيبتىڭ اكەسى رامزان قادىروۆتىڭ كومەكشىسى. كومەكشىسى دەگەندە، ق ۇلى. كادىروۆتىڭ ارقاسىنان پىشاق سالۋعا اركەز دايار تۇراتىن ابدۋلماناپ نۋرماگومەدوۆ شىن مانىندە كادىروۆقا جاعىمپازدانىپ، جاعىنىپ جۇرگەن قورقاق.  كونوردىڭ بۇل جازباسى دا عالامتوردا ۇلكەن شۋ تۋعىزادى. ارتىنان كورنور حابيب وتىرعان اۆتوبۋسقا شابۋىل جاسايدى. مۇنى ءوزى تاڭدى تاڭعا اتىرىپ ايتىپ بەرۋگە بولاتىن ۇزاق حيكايا. وزدەرىڭىز بىلەتىندەي، حابيب كونوردان قاراعاندا سالماقتىلاۋ. «اۆتوبۋستان ءتۇس» دەپ ايعايلاعان كونوردى حابيب يگنور جاسايدى. ءبىراق داعىستاندىقتى بايسالدى ازامات دەۋگە اۋزىمىز بارماس. «داعىستانعا كەلىپ ءان سالماڭدار» دەپ رەسەيلىك انشىلەرگە ەسكەرتۋ جاساپ، قورقىتپاقشى بولعان حابيبتىڭ اكەسى دە ورايى تۋعاندا ايتىپ قالعاندى جاقسى كورەتىن ادام سياقتى.

ماكگرەگور مەن نۋرماگومەدوۆ اراسىنداعى بىر-بىرىنە دەگەن جەك كورىنىش سەزىمى وسىلاي باستاۋ العان بولاتىن. مۇنىڭ بارلىعى جەكپە-جەككە دەگەن جۇرتتىڭ قىزىعۋشىلىعىن وياتۋ ءۇشىن جاسالىنىپ جاتقان دۇنيە مە، جوق پا، ونىسىن ناقتى بىلمەدىك. ءبىراق كامەرا الدىندا ءبىر-بىرىن جۇلىپ جەۋگە دايىن سپورتشىلاردىڭ كوپتەن كۇتكەن جەكپە-جەگى قازاننىڭ 6-سى كۇنى لاس-ۆەگاس قالاسىندا وتپەك. كەشە عانا ارنايى پرەسس-كونفەرەنسيا دا ۇيىمداستىرىلعان بولاتىن. قىزۋ قاندى ماكگرەگور كونفەرەنسيانى شوۋعا اينالدىرۋعا تىرىسىپ باقتى. قولىنان كەلدى دە. «كونفەرەنسيادا جانكۇيەرلەردىڭ قاراسى نەگە كورىنبەيدى»،- دەپ شاعىمدانعان ماكگرەگور داعىستاندىق جىگىتكە سپيرتتىك ىشىمدىك، انىعىن ايتقاندا، يرلانديالىق ۆيسكي ۇسىندى. وتىرعان ورنىنان تۇرماي قويعان حابيب ىشىمدىكتەن باس تارتىپ، ءوزىن سەنىمدى ۇستادى. بۇكىل داعىستاننىڭ ار-نامىسىن قورعايتىن حابيب اتاقتى كونور ماكگرەگوردى تىزە بۇكتىرە الا ما، ونى تەك جەكپە-جەك اياقتالعان كەزدە عانا بىلە الامىز. ازىرگە ەكى سپورتشىنىڭ جانكۇيەرلەرى ءبىرىن-بىرى سىناپ-مىنەپ، عايباتتاپ، عاسىر جەكپە-جەگىن تاعاتسىزدانىپ اسىعا كۇتۋدە.