كۇنى كەشە التاينيۋس پورتالى جاريالاعان «ابايدىڭ باسى وسكەمەندەگى كۇل-قوقىستىڭ اراسىندا جاتىر» اتتى ماقالانى سايتىمىزعا ءبىز دە جاريالاعان ەدىك. وندا جۋرناليست سەرىك قۇسانبايەۆ كۇل-قوقىستىڭ اراسىندا شاڭ باسىپ جاتقان ابايدىڭ كەۋدە ءمۇسىنى جايلى كۇيىنىپ جازعان ەدى. ارتىنشا رەداكسياعا جاعىمدى جاڭالىق كەلىپ جەتكەن ەكەن. ءمۇسىندى قالا اكىمدىگى ساتىپ الاتىن بولدى. ءسۇيىنشى جاڭالىقتى سەرىك قۇسانبايەۆتىڭ ءوزى جەتكىزدى.

Qamshy.kz اقپارات اگەنتتىگى

ءتۇس قايتا ۇيالى تەلەفونمەن تىلدەسكەن كىشى ۆلاديمير سامويلوۆ الگىندە عانا وسكەمەن قالاسى اكىمىنىڭ رەسمي وكىلدەرى كەلىپ كەتكەندىكتەرىن، ماقالاعا ارقاۋ بولعان ۇلى اقىننىڭ كەۋدە ءمۇسىنىن قالا اكىمدىگى ساتىپ الاتىن بوپ كەلىسكەندەرىن جەتكىزدى. داۋىسى تۇنەۋ كۇنگىدەي ەمەس، جارقىن-جارقىن ەستىلدى.

جاقسى حاباردى الا سالا وسكەمەن قالاسى اكىمدىگىندەگى ازاماتتارعا قوڭىراۋ شالساق، راس ەكەن. اباي اتامىزدىڭ ءمۇسىنىنىڭ كۇل-قوقىستا جاتقانىن ەستىگەن بويدا قارەكەتكە كوشكەن شاھار باسشىسى، ۇلتجاندى ازامات جاقسىلىق وماردىڭ ۇيىمداستىرۋىمەن وسكەمەندىك قوس كاسىپكەر يليا ەلفيموۆ پەن ماديار بارييەۆ قوقىستا قالعان ءمۇسىندى ساتىپ الاتىن بولىپتى.

ەندىگى ماسەلە – ورتامىزعا ورالعان اباي ءمۇسىنىنىڭ قاشان، قاي جەردە ورناتىلۋىندا. قالالىق اكىمدىك وكىلدەرى بۇل ماسەلەنىڭ دە پىسىقتالىپ جاتقاندىعىن ايتتى. سونىمەن قاتار جاقسىلىق ومار ءمۇسىندى ابايعا ۇقساتىپ، قايتا جوندەۋ كەرەكتىگىن ەسكەرتىپتى. وقىرماندارىمىزعا بۇل ماسەلەنىڭ «التاينيۋس» پورتالى مەن «ديدار» گازەتتەرىنىڭ ءجىتى نازارىندا بولتىندىعىن ەسكەرتەمىز.

ەستەرىڭىزگە سالا كەتەيىك،  19 قىركۇيەك كۇنى سايتىمىزدا  وسكەمەندىك ءمۇسىنشى ۆلاديمير سامويلوۆتىڭ اۋلاسىنداعى كۇل-قوقىستىڭ اراسىندا ابايدىڭ ءبيۋستى جاتقانى تۋرالى ماقالا جاريالانعان بولاتىن. ءمۇسىنشىنىڭ ايتۋىنشا، ەسكەرتكىشكە 2014 جىلى تاپسىرىس بەرىلىپ، كەيىن ونى ەشكىم الماي قويعان. سامويلوۆ ءبىر سوزىندە بۇل كەۋدە ءمۇسىندى جاساۋ ءۇشىن كەزىندە 500 مىڭ تەڭگەنىڭ شىعىنى شىققاندىعىن، ەگەر الام دەۋشى تابىلسا، 300 مىڭعا بەرە سالاتىندىعىن جەتكىزگەن.

سەرىك قۇسانبايەۆ، التاينيۋس