ەستەرىڭىزگە سالا كەتسەك، شولپان اتادا وتكەن دۇنيەجۇزىلىك كوشپەندىلەر ويىنىندا قازاق-وزبەك كوكپارشىلارىنىڭ كەزدەسۋى ۇلكەن داۋ تۋدىرعان بولاتىن. جارتىلاي فينالدا ەلىمىزدىڭ شاباندوزدارى الا شاپاندىلارعا ەسە جىبەرىپ، قىرعىزداردىڭ سىنىنا ۇشىراعان. قىرعىزستان رەسپۋبليكاسىنىڭ وش وبلىسىندا دجيۋ-دجيتسۋ (نە-ۆازا) بويىنشا وتكەن حالىقارالىق تۋرنير «Alau open-دە» ەلىمىزدىڭ پالۋاندارى ەسە قايتارىپ، قازاق سپورتشىلارىنىڭ مىقتى ەكەنىن كەزەكتى رەت دالەلدەدى.

اتالعان تۋرنيرگە "Sagadat batyr QTT" سپورت كلۋبىنان 7 مەن 17 جاس ارالىعىندا 23، ال ەرەسەكتەردەن 4 سپورتشى قازاقستان نامىسىن قورعاپ بارعان بولاتىن.

ەرەكشە اتاپ وتەتىن سپورتشىنىڭ ءبىرى – 11 جاستاعى جىبەك قۇلىمبەتوۆا.

تالاي سپورتشىنىڭ جاۋىرىنىن جەر يىسكەتكەن سپورتشى قىزدىڭ قورجىنىندا – «الەم چەمپيونى»، حالىقارالىق تۋرنيرلەردىڭ جەڭىمپازى تيتۋلى بار.  بۇل سايىستا قىرعىز، وزبەك، تاجىك سپورتشىلارىن تىزە بۇكتىرىپ، التىن القا قانجىعالادى. وسى تۋرنيردە جىبەك قۇلىمبەتوۆا قىرعىز، وزبەك، تاجىك سپورتشىلارىن ۇتىپ قانا قويعان جوق، ۇل بالالار اراسىندا چەمپيون اتانعان قىز بولدى.

84 كەلىگە دەيىنگى سالماقتا جەڭىسكە جەتكەن نۇرسۇلتان ورىنباساروۆ اتالمىش كلۋبتىڭ باپكەرى. نۇرسۇلتان ءارتۇرلى سەبەپكە بايلانىستا سپورتتان ءبىرشاما ۋاقىت قول ءۇزىپ قالعان بولاتىن. ءوزىنىڭ تۋعان كۇنىندە وزىنە سىيلىق جاساعان سپورتسمەن سپورتقا قايتا ورالعانىن مالىمدەدى.

سونداي-اق، "Sagadat batyr QTT" كلۋبىنىڭ باپكەرى سامات ايتپانبەت ەل ابىرويىن اسقاقتاتىپ، كوماندا قورجىنىنا التىننان القا قوستى.

نۇرسۇلتان ورىنباساروۆ جەتەكشىلىك ەتەتىن "Sagadat batyr - QTT" سپورت كلۋبىنىڭ قورجىنىندا جالپى 25 مەدال بار: ونىڭ 15 التىن، 5  كۇمىس، 5 قولا مەدال.