راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ وقۋ ورتالىعىندا اسكەرگە مىندەتتى زاپاستاعى وفيسەرلەرگە ارنالعان ءبىر ايلىق جيىن باستالدى.

30 كۇن بويى 300-گە تارتا اسكەري مىندەتتى ازامات راديوتەحنيكا، بايلانىس جانە راديوناۆيگاسيا، اۋە شابۋىلىنا قارسى قۇرلىق اسكەرلەرى جانە زەنيتتى زىمىراندى اسكەرلەر ماماندىقتارى بويىنشا ءبىلىم الادى.

جيىننىڭ ماقساتى – بەيبىت ومىردەن سوعىس ۋاقىتىنا كوشىرۋ بارىسىندا زاپاستاعى وفيسەرلەردىڭ فۋنكسيونالدىق مىندەتتەرىمەن تانىسۋ، جاۋىنگەرلىك دايىندىعىن جانە اسكەري تاپسىرمالاردى ساپالى ورىنداۋ قابىلەتىن ارتتىرۋ.

وقۋ كۋرسى اسكەري ينستيتۋتتىڭ بىلىكتى ۇستازدارىنىڭ قارۋ-جاراق جانە جارىلعىش زاتتار، اسكەري تەحنيكالارمەن، سونداي-اق حيميالىق زياندى زاتتارمەن جۇمىس بويىنشا دارىستەرىمەن باستالىپ، العاشقى مەديسينالىق كومەك كورسەتۋ، دەنە دايىندىعى پاندەرىمەن جالعاسىن تاپتى.

جيىنعا قاتىسۋشى وفيسەرلەر ينستيتۋت تاراپىنان جاتىن ورىنمەن، اسكەري كيىمدەرمەن، سونداي-اق ازىق-تۇلىكپەن تولىقتاي قامتاماسىز ەتىلگەن.

* اسكەري مىندەتتىلەرگە ارناپ دالالىق جاعدايداعى ءدارىس جانە وقۋ-جاتتىعۋ الاڭدارى ارنايى دايىندالدى. ينستيتۋتىمىزدىڭ بىلىكتى وفيسەر-ۇستازدارى كاسىبي شەبەرلىكتەرىمەن ءبولىسىپ، ءبىلىم بەرۋدە، - دەدى ينستيتۋت باستىعىنىڭ ورىنباسارى پولكوۆنيك مۇرات ولجابايەۆ.

پولكوۆنيك م.ولجابايەۆتىڭ ايتۋىنشا، ۇكىمەت قاۋلىسىمەن بەكىتىلگەن اتالعان جيىنعا 22-37 جاس ارالىعىنداعى ءار سالانىڭ ماماندارى شاقىرتىلعان. ولاردىڭ قىزمەت ورنى ساقتالادى، جيىنعا قاتىسقانى ءۇشىن ەڭبەكاقى تولەنەدى.

* مەن راديوبايلانىس ماماندىعى بويىنشا دايىندىقتان وتۋدەمىن. اسكەري انت قابىلدادىم، بۇل مەن ءۇشىن زور قۋانىش. كۇردەلى دالالىق وقۋ-جاتتىعۋلارعا قاتىسىپ، اسكەري بىلىكتىلىگىمدى جەتىلدىرگەنىمدى ماقتان ەتەمىن. قازاقستان ارمياسىنىڭ الەۋەتى ارتا بەرسىن، - دەگەن تىلەكتەمىن دەدى ءوز كەزەگىندە «قازاقستان تەمىر جولى» اق-نىڭ جەتەكشى مامانى 23 جاستاعى زاپاستاعى لەيتەنانت الىبەك شاياحمەتوۆ.

ءار دەمالىس سايىن اسكەري مىندەتتىلەرگە ارناپ راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ «بايلانىس جىگىتتەرى» كوڭىلدى تاپقىرلار كومانداسى ءوز ازىلدەرىمەن بولىسسە، ەلىمىزدىڭ ونەر قايراتكەرلەرى كونسەرت قويىپ كەلەدى. جيىن اياقتالعان سوڭ الماتىنىڭ كورىكتى جەرلەرىنە ساياحات جوسپارلانعان.