ەلىمىز ەگەمەندىك العالى مەديسينا سالاسى قارقىندى دامي باستادى. اسىرەسە جوعارى مامانداندىرىلعان مەديسينالىق كومەك بەلسەندى تۇردە دامۋدا. وسىدان بىرنەشە جىل بۇرىن شەكارا اسىپ جاسالىپ جۇرگەن كۇردەلى وتالار ءوز وتانىمىزدا دا جاسالۋى وسىنىڭ ءبىر ايعاعى ىسپەتتەس. جاقىندا اقتوبە وبلىسىندا بۇيرەك ترانسپلانتاسيالاۋدىڭ كەزەكتى وپەراسياسى جۇرگىزىلىپ، وندا ناۋقاستىڭ ءوز قارىنداسى دونور بولدى. وسىلايشا، ول اعاسىنا ەكىنشى ءومىر سىيلادى. بۇل اقتوبە وڭىرىندەگى ەلۋىنشى وپەراسيا بولعاندىقتان، دارىگەرلەردىڭ ارنايى ەسەبىنە الىندى. سوڭعى جىلدارى اقتوبەلىك دارىگەرلەر بۇيرەكتى ترانسپلانتاسيالاۋ بويىنشا 38 وپەراسيا، باۋىردى ترانسپلانتاسيالاۋ بويىنشا 12 وپەراسيا جاسادى.
اقتوبە وبلىسىندا 2014 جىلدان باستاپ ەنگىزىلگەن ورگانداردى ترانسپلانتاسيالاۋ باعدارلاماسى تابىستى ورىندالۋدا. وسى ۋاقىت ىشىندە ورگاندى ترانسپلانتاسيالاۋدىڭ بارلىق ماسەلەلەرى بويىنشا حالىققا كومەك كورسەتەتىن بارلىق قىزمەت قۇرىلدى. اقتوبە مەديسينالىق كلاستەرى بازاسىندا بۇيرەكتى ترانسپلانتاسيالاۋ بويىنشا وزدىگىنشە وپەراسيالار قازىرگى زامانعى بارلىق ستاندارتتارعا سايكەس كەلەدى. كوپ جاعدايدا ناۋقاستىڭ تۋىستارى دونور بولادى.
اقتوبە مەديسينالىق كلاستەرى ترانسپلانتاسيالاۋدى ودان ءارى دامىتۋ بويىنشا بەلسەندى جۇمىس جاساۋدا. باستى ماقسات — بۇكىل باتىس ءوڭىرىنىڭ تۇرعىندارى ءۇشىن ورگانداردى ترانسپلانتاسيالاۋدى جۇزەگە اسىرۋ، رەسپۋبليكامىزدىڭ تۇرعىندارىنىڭ دەنساۋلىعىن جاقسارتۋ.
وسى ورايدا ايتا كەتسەك، قازاقستان رەسپۋبليكاسىنىڭ «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنە سايكەس دەنساۋلىق ساقتاۋ ۇيىمى مايىتتەن اعزالاردى الۋ ساتىندە اتالمىش تۇلعانىڭ ءتىرى كەزىندە نەمەسە ونىڭ جۇبايى، زايىبى، جاقىن تۋىستارى نەمەسە زاڭدى وكىلى ونىڭ تىندەرى مەن اعزالارىن الۋعا كەلىسىم بەرمەسە، وندا الۋعا بولمايدى. باسقاشا ايتقاندا، مەملەكەتتىڭ بارلىق ازاماتى قازا تاپقاننان كەيىن دونور رەتىندە قارالادى، ءبىراق تىكەلەي كەلىسپەگەن جاعدايلاردى قوسپاعاندا. ال ادامنىڭ اعزالارىن ءماجبۇرلى تۇردە الۋعا جانە ولاردى اۋىستىرىپ قوندىرۋعا تىيىم سالىنادى جانە زاڭ بويىنشا قۋدالانادى. وعان سەبەپ، تەك ءبىزدىڭ ەلىمىزدە ەمەس، الەمنىڭ بارلىق ەلىندە ادامنىڭ اعزاسىن ساتىپ الۋعا جانە ساتۋعا زاڭ جۇزىمەن تىيىم سالىنعان بولاتىن.
