اقتوبە وبلىسىنىڭ ورتالىعىندا «اناعا تاعزىم» رەسپۋبليكالىق سلەتى ءوتتى. شارانىڭ «انا الەمدى تەربەتەدى» اتتى سەكسيالىق جۇمىسىندا قوعامداعى وتباسىلىق تاربيە، ونەگە تۋرالى كەڭ تالقىلانعان بولاتىن.

شارانىڭ قۇرمەتتى قوناقتارى جازۋشى، ۇلتتىق ءداستۇردى ناسيحاتتاۋشى زەينەپ احمەتوۆا، ق ر بالالار ىستەرى جونىندەگى ۋاكىلى ساۋلە ايتپايەۆا، قازاقستاننىڭ حالىق جازۋشىسى ءا. كەكىلبايەۆتىڭ زايىبى، دارىگەر كلارا جۇمابايەۆا جينالعان جۇرتشىلىققا قوعامداعى انا مەن بالانىڭ ءرولى جانە جاستارعا تاربيەلىك ءمانى بار اڭگىمەلەردى ايتىپ بەردى.

«ايەل ءبىر قولىمەن بەسىكتى، ەكىنشى قولىمەن الەمدى تەربەيدى» دەيدى دانا حالقىمىز. ءقازىر ەلىمىزدە ۇل-قىزىن تاربيەلەپ، وعان قوسا قوعام ىسىنە بىلەك سىبانا كىرىسىپ جۇرگەن ايەلدەر كوپ. دەرەكتەرگە سۇيەنسەك، ەلىمىزدە مەملەكەتتىك قىزمەتتەگى ايەلدەردىڭ ۇلەسى 58 پايىز بولسا، سولاردىڭ ىشىندە جوعارى لاۋازىمداعى ايەلدەردىڭ ۇلەسى — 10 پايىز. ال ءبىزدىڭ وبلىستا ءبىلىم سالاسىنىڭ 83 پايىزى — ايەلدەر. كەزدەسۋدە وبلىستىق ءبىلىم باسقارماسىنىڭ باسشىسى ءلاززات ورازبايەۆا وسى دەرەكتەرگە توقتالىپ، شارانىڭ ءمانىن ءتۇسىندىرىپ ءوتتى. كەش قوناعى ساۋلە ايتپايەۆا قوعامداعى انا مەن بالا رولىنە توقتالدى. بۇگىنگى ءوتىپ جاتقان انالار سلەتىنىڭ ماڭىزى زور ەكەنىن ايتتى. ال زەينەپ احمەتوۆا ۇلتتىق سالت-داستۇرگە بايلانىستىرىپ جاستارعا اقىل-كەڭەسىن بەردى.

— ەلباسىمىز رۋحاني جاڭعىرۋ تۋرالى ايتتى. رۋحاني جاڭعىرۋ دەگەنىمىز — ەكى ءانشىنى شاقىرىپ، ءان ايتقىزۋ ەمەس، ول — سانانىڭ جاڭعىرۋى. ءقازىر قازاقتىڭ سان عاسىر سارابىنان ءوتىپ كەلگەن ونەگە، تاريبەسىنىڭ جۇلىم-جۇلىمىن شىعاردىق. مۇلدە باسقا جاققا قاراي بۇرىلىپ كەتتى. سوندىقتان ءبىز بۇگىندە تالاي نارسەدە تىعىرىققا تىرەلىپ وتىرمىز. تاۋەلسىزدىك الدىق، شەكارانى اشىپ، قۇشاعىمىزدى جايدىق. جاقسى دا، جامان دا كەلدى. «كورمەگەنگە كوسەۋ تاڭ» دەگەن، كورگەنىمىزدىڭ ءبارىن قابىلدادىق. ءبارىن «مادەنيەت» دەپ ۇقتىق. باتىس كەلىپ جالاڭاشتادى، شىعىس كەلىپ تۇمشالادى. ات توبەلىندەي قازاقتىڭ شاقشاداي باسى شاراداي بولدى، — دەگەن باتىردىڭ كەلىنى جاستاردى ۇلتتىق تالىم-تاربيەدەن الىستاماۋعا شاقىردى. سونداي-اق كەزدەسۋدە انانى قۇرمەتتەۋ، ۇلكەندى سىيلاۋ توڭىرەگىندە تاربيەلىك ءمانى بار اڭگىمەلەر ايتىلدى. كلارا جۇمابايەۆا ەنەسىمەن قىرىق جىل بىرگە تۇرعانىن، ۇلكەندى قالاي سىيلاۋ كەرەكتىگىن ايتىپ بەردى.

— «اناعا تاعزىم» اتتى شارانى ۇيىمداستىرۋشىلارعا ريزامىن. بۇنداي شارا جاستارىمىزدى انانى قۇرمەتتەۋگە ۇندەيدى. ءومىر انادان باستاۋ الادى. انا — مەيىرىمنىڭ باستاۋى. دۇنيەگە بالا اكەلەدى، ونى ازامات قىلىپ ءوسىرىپ، تىلەگىن تىلەپ، بارلىق اۋىرتپالىقتى ارقالاپ جۇرەدى. مىسال رەتىندە ءابىشتىڭ اناسى، ەنەمدى ايتسام، ول كىسىدەن كوپ نارسەنى ۇيرەندىم. جولداسى سوعىسقا كەتكەندە ءابىش ەكى جاستان اسقان ەكەن. ءۇش قىزى مەن جالعىز ۇلىن اسىراۋ ءۇشىن بارلىق قيىندىقتى كورگەن. ماڭعىستاۋداعى كومىر شاحتاسىندا جەتى جىل جۇمىس ىستەگەن. ءومىر باقي جالعىز ۇلىنىڭ تىلەگىن تىلەدى. بار تابىسىمەن جالعىز بالاسىن وقىتتى. ۇلى ەڭبەگىن اقتادى. قىرىق جىل بالاسى ءۇشىن بەينەت كوردى، قىرىق جىل سونىڭ زەينەتىن كوردى. ەنەمى سابىرلى، قوناقجاي

كىسى ەدى. توقسان سەگىز جاسىندا ومىردەن ءوتتى. قىرىق جىل كەلىنى رەتىندە ەنەمنىڭ كوڭىلىن تابۋعا تىرىستىم، — دەگەن كلارا جۇمابايەۆا جاس كەلىندەرگە كەڭەسىن ايتتى.

كەزدەسۋدىڭ سوڭىندا جاستار، ۇستازدار سۇراق قويدى. ونەرلى بالدىرعاندار ءان ايتىپ، بي بيلەپ قوناقتاردى شىعارىپ سالدى.