قانت باعاسىنىڭ قىمباتتاۋى اقشاعا قۇنىققان وتكىزۋشىلەر مەن الىپساتارلاردىڭ سالدارىنان بولۋدا. اۋىل شارۋاشىلىعى مەن ۆەتەريناريا باسقارماسى الماتى قالاسىنداعى سۋپەرماركەتتەردەگى، دۇكەندەردەگى جانە بازارلارداعى ازىق- تۇلىك تاۋارلارىنا كۇن سايىن مونيتورينگ جاساۋدا. سوڭعى اپتا ىشىندە قانت باعاسىن ەش نەگىزسىز كوتەرگەن وقيعالار بايقالدى.

«قانت باعاسىنىڭ كوتەرىلۋى الىپساتارلىق سيپاتقا يە. قانت تاپشى دەگەن جايسىز حاباردى ەستي سالا ونى جەتكىزۋشىلەر مەن وتكىزۋشىلە بازارداعى قات باعاسىز كوتەرگەن، سونىڭ سالدارىنان قولدان جاسالعان الاڭداۋشىلىق پايدا بولعان» - دەپ حابارلادى تاماق ءوندىرىسى ءبولىمىنىڭ باسشىسى دامير تازابەك.

ايتا كەتەرلىگى، ءىرى ساۋدا ورىندارىندا قانت باعاسى كوتەرىلمەگەن. تۇراقتاندىرۋ قورى تاۋار ينتەرۆەنسياسىن جوسپارلى جۇرگىزۋدە. ونىڭ ۇستىنە، تۇراقتاندىرۋ قورى وتاندىق وندىرۋشىلەردەن تاعى دا 1500 توننا قانت ساتىپ الۋدا جوسپارلاعان.

جاسالعان ساراپتاماعا ساي بازارداعى ساتۋشىلار مەن دەلدالدار وتكىزىلەتىن ءونىمنىڭ وزىندىك قۇنىن 40%-عا دەيىن كوتەرۋدە. ال سۋپەرماركەتتەردە الەۋمەتتىك ءمانى بار تاۋارلاردىڭ كوتەرمە باعاسى نەبارى 11%-دى قۇرايدى. قازىرگى كەزدە قالاداعى قانتتىڭ ورتاشا باعاسى - 245 تەڭگە، ءونىمدى الماتىعا دەيىن جەتكىزۋدەگى ءار توننانىڭ باعاسى 220 مىڭ تەڭگە.

ەسكە سالساق، 1 قازاننان باستاپ الماتى جانە جامبىل وبلىستارىندا (اقسۋ، كوكسۋ، مەركە) 150 مىڭ توننا قانت وندىرەتىن 3 زاۋىت ىسكە قوسىلادى دەپ كۇتىلۋدە. دەمەك، قانت تاپشىلىعى مەن ونىڭ باعاسىنىڭ كوتەرىلۋى ەش قيسىنسىز.

بۇدان وزگە، باسقارما حابارلاعانداي، ءقازىردىڭ وزىندە 10492 توننا قانت بار، ولاردىڭ1500 تونناسى قويمالاردا، 4000 تونناسى كاسىپورىنداردا، 2236 تونناسى ۋاقىتشا ساقتاۋ الاڭىندا، 2756 تونناسى جولدا.