شىمكەنتكە جۇمىس ساپارىمەن بارعان مەملەكەت باسشىسى نۇرسۇلتان نازاربايەۆ قالانىڭ الەۋمەتتىك-ەكونوميكالىق دامۋى جونىندەگى كەڭەستە ەلدىڭ جالپى جاعدايىنا توقتالىپ، مەملەكەت قارجىسىن ۇنەمدەۋدى ۇيرەنۋ كەرەك ەكەنىن ەسكەرتتى، دەپ حابارلادى Qamshy.kz اقپارات اگەنتتىگى Sputnik قازاقستاننىڭ دەرەگىن نەگىزگە الىپ. 

نۇرسۇلتان نازاربايەۆ شىمكەنتتە تەاتر، سيرك سىندى مادەني ورىندار جەتەرلىك، ال كەيبىر قالالاردا مۇنداي ورىنداردى تابۋ قيىن ەكەنىن ايتتى. قالا باسشىلىعى الداعى ۋاقىتتا شىمكەنتتىڭ تۋريزم سالاسىن دامىتۋدى مىقتاپ قولعا الۋ قاجەتتىگىن اتاپ ءوتتى.

"قازاقستاندى بىلمەيتىن، ءبىراق كورگىسى، كەلگىسى كەلەتىن جۇرت كوپ. ول ءۇشىن تەمىرجول، اۋەجاي، قوعامدىق كولىك جاعىن رەتتەۋ كەرەك. شىمكەنت تۋريستەر ءۇشىن تارتىمدى ورتالىققا اينالۋى كەرەك. حالىقارالىق دەڭگەيدە دامۋ قاجەت… وزدەرىڭىز كورىپ وتىرسىزدار، وزبەكستانمەن ءقازىر قارىم-قاتىناسىمىز جاقسى. بيزنەستەگى قارىم-قاتىناسىمىز نىعايىپ كەلەدى. قالانىڭ جاڭا مارتەبەسى قۇرىلىس سالاسىنىڭ دامۋىنا وڭ اسەرىن تيگىزەدى دەگەن ويدامىن. شىمكەنتتىڭ ءوز كەلبەتى، ساۋلەتى بولۋى قاجەت. شىمكەنتكە جەكە قالا دەگەن اتاق بەرىلدى. سوندىقتان وسى مۇمكىنشىلىكتىڭ ءبارىن پايدالانىپ، الداعى ۋاقىتتا جۇمىس ىستەۋ كەرەك"، —  دەگەن ەلباسى قالادا قۇقىق قورعاۋ سالاسىنا قاتىستى سىننىڭ بار ەكەنىن، تەك جۇمىس ىستەيتىندەردىڭ جالاقىسىن ارتتىرۋ كەرەكتىگىن ايتتى.

مەملەكەت باسشىسى ەلدىڭ جاعدايى تۋرالى ويىمەن ءبولىستى.  

"ءبىز ءالى كۇنگە دەيىن مەملەكەت اقشاسىن ۇنەمدەۋدى ۇيرەنگەنىمىز جوق. قالاي بولسا، سولاي شاشامىز. ەشكىم ەسەپتەمەيدى… نەگىزى ەلدىڭ جاعدايى جامان ەمەس قوي. قازاق ءدال قازىرگىدەي ەشقاشان ءومىر سۇرگەن جوق. ءالى دە تالاي جاقسىلىق الدا"، — دەدى مەملەكەت باسشىسى.

ايتا كەتەيىك، مەملەكەت باسشىسى بۇگىن جەرگىلىكتى بيلىكپەن كەڭەس وتكىزبەس بۇرىن شىمكەنت قالاسىنىڭ الەۋمەتتىك قىزمەت كورسەتۋ ورتالىعىندا بولدى. 

"Shymkent"  اكك ءتوراعاسى راشيد ايۋپوۆ ءۇشىنشى مەگاپوليستى سيفرلاندىرۋ جوبالارى، ماسەلەن، ءموبيلدى قوسىمشا ارقىلى دارىگەردى ۇيگە شاقىرۋ، قابىلداۋىنا ەسەپكە تۇرۋ، "ءقاۋىپسىز قالا"، "قوعامدىق كولىك" جوبالارى تۋرالى بايانداما جاسادى. 

شىمكەنتتەگى الەۋمەتتىك قىزمەت كورسەتۋ ورتالىعى استانا قالاسىنىڭ 20 جىلدىعىنا وراي اشىلعان. وندا تۇرعىندارعا كاسىپكەرلىك، جۇمىسپەن قامتۋ جانە الەۋمەتتىك باعدارلامالار بويىنشا قىزمەت كورسەتىلەدى.