قىرعىزستان ميليسياسى قىتايدان كەلگەن كاسىپكەرلەردى كونتەينەردە ۇستاپ، ولاردى قورقىتۋ فاكتىسىن تەكسەرەدى. ولار كادامجاي اۋدانى مايدان اۋىلىنداعى شامبەساي كەشەنىندە جۇمىس ىستەيدى دەپ جازادى Qamshy.kz اقپارات اگەنتتىگى centralasian.org سايتىنىڭ دەرەگىن نەگىزگە الىپ.
باتكەن وبلىسى اكىمشىلىگىنىڭ باسپا ءسوز حاتشىسى چولپون بەرديكۋلوۆانىڭ ايتۋىنشا، تەرگەۋدى اۋداندىق ىشكى ىستەر ءبولىمى جەرگىلىكتى بيلىكپەن بىرگە اتقارادى. تەرگەۋ ءوز بەتىمەن جازالاۋ فاكتىسى بويىنشا جۇرگىزىلەدى.
بەرديكۋلوۆانىڭ سوزىنە قاراعاندا، وقيعا 25 قىركۇيەكتە بولعان. كادرلاردا جەرگىلىكتى حالىق قىتايدىڭ بىرنەشە ازاماتىن قورشاپ الىپ، ولاردى قورقىتىپ-ۇركىتكەنى انىق كورىنەدى. ودان سوڭ تۇرعىندار جۇڭگو كاسىپكەرلەرىن تۇرمىسقا بەيىمدەلمەگەن كونتەينەرگە قاماپ قويعان.
ايتا كەتەيىك، شامبەساي كەنىشىندە 8 توننا التىن بار دەپ بولجانعان. گەولوگيالىق بارلاۋ جۇمىستارى مۇندا 2007 جىلى باستالعان، 2012 جىلى التىن وندىرۋگە ليسەنزيا بەرىلگەن. سوڭعى بىرنەشە جىلدا ليسەنزيانىڭ بىرنەشە قوجايىنى اۋىستى. ءقازىر ونى قىتايدىڭ "تياندي" كومپانياسى ءوندىرىپ جاتىر. بۇل جۇمىستارعا جەرگىلىكتى حالىق ۇنەمى كەدەرگى كەلتىرىپ كەلەدى.
