تۇركىستان وبلىسىنا رەسمي ساپارمەن بارعان ەلباسى رۋحاني استاناداعى ەتنواۋىلدا حالىقپەن كەزدەسىپ، كونە قالا تاريحىنا توقتالدى دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ. 

"حالقىمىز ءۇشىن تاريحى باي، تاعىلىمى تەرەڭ تۇركىستاننىڭ ەلىمىز ءۇشىن ورنى وتە بولەك. ول بۇكىل ورتالىق ازياداعى ەڭ كونە قالالاردىڭ ءبىرى. تۇركىستان — قازاق ەلىنىڭ رۋحاني جۇرەگى، قازاقتىڭ كوپتەگەن اياۋلى پەرزەنتتەرى ماڭگىگە جاي تاپقان قاسيەتتى قالا. وسىندا جەرلەنگەن 164 ايگىلى تۇلعانىڭ 21ء-ى ەل باسقارعان قىراندار، 30-دان استامى قول باستاعان باتىرلار، اۋقىمدى ءسوز باستاعان بيلەر. تۇركىستان تاريحى — كۇللى قازاقتىڭ تاريحى"، — دەگەن ەلباسى وبلىس ورتالىعىن تۇركىستان قالاسىنا كوشىرۋدەگى نەگىزگى سەبەپتەردى دە اتاپ ءوتتى.

"قاسيەتتى تۇركىستانعا دەگەن ماقتانىش سەزىمى ءار قازاقتىڭ جۇرەگىندە ۇيالاعان. تۇركىستان تەك بىزگە عانا ەمەس، كۇللى تۇرىك جۇرتشىلىعىنا قاسيەتتى ءارى ءقادىرلى مەكەن. حالقىمىزدا "ءمادينادا مۇحاممەد، تۇركىستاندا ياساۋي" دەگەن ءسوز بار. وسىنداي سان الۋان فاكتورلار تۇركىستاندى تۇتاس تۇران دوداسىنىڭ، ءتۇبى ءبىر تۇركى جۇرتىنىڭ رۋحاني ورتالىعىنا اينالدىردى. بىلتىر تۇركى مەملەكەتتەرى تۇركىستان قالاسىن تۇرىك الەمىنىڭ مادەني استاناسى دەپ جاريالادى. وسىعان وراي مۇندا تۇركسويدىڭ قولداۋىمەن 40-تان استام ءىس-شارا وتكىزىلدى. تۇركى الەمىنىڭ مادەني ورتالىعى دەپ تانىلدى. وسىنىڭ بارلىعى  تۇركىستاندى وبلىس ورتالىعى دەپ جاريالاۋىمىزعا سەبەپ بولدى"، — دەدى مەملەكەت باسشىسى.

حالىق الدىندا ءسوز سويلەگەن ەلباسى تۇركىستان وبلىسىنىڭ ورتالىعىن جاستار قالاسى دەپ اتادى.

"تۇركىستان — جاستاردىڭ قالاسى. سوندىقتان جاستارعا قىزمەت بەرۋ ءۇشىن، ولارعا جاقسى قالادا تۇرۋ مۇمكىندىگىن جاساۋ ءۇشىن وسىلاي جاساپ وتىرمىز"، — دەگەن نۇرسۇلتان نازاربايەۆ وبلىس ورتالىعى تەك قازاقستاندىق ەمەس، الىس-جاقىن شەتەلدەن قۋانا كەلەتىن كوپتەگەن تۋريستەردىڭ ورداسىنا اينالۋى تيىستىگىن اتاپ ءوتتى. بۇل رەتتە قالانىڭ ادەمى بولۋى تەك اسەم عيماراتتارىمەن عانا ەمەس، مۇندا تۇرعان حالىقتىڭ مادەنيەتىمەن، پاراساتىمەن بايلانىستى ەكەنىن جەتكىزدى.  

ايتا كەتەرلىگى، تۇركىستانعا رەسمي ساپارعان بارعان پرەزيدەنت جاڭا اكىمشىلىك ورتالىقتاعى مەموريالدى تاس قالاۋ راسىمىنە قاتىستى. 

وبلىس اكىمى جانسەيىت تۇيمەبايەۆ مەملەكەت باسشىسىنا تۇركىستان شاھارىنىڭ دامۋ بارىسى تۋرالى بايانداما جاسادى. مۇنان سوڭ ەلباسى قوجا احمەت ياساۋي كەسەنەسىنە بارىپ، "ازىرەت سۇلتان" تاريحي-مادەني قورىق-مۋزەيىنىڭ دامۋ جوسپارىمەن تانىستى. سونداي-اق، پرەزيدەنت تۇركىستان وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزىپ، جاۋاپتىلارعا ءبىرقاتار تاپسىرمالار بەردى. ودان وزگە نۇرسۇلتان نازاربايەۆ ءدال وسى ساپارى كەزىندە ءبىرقاتار شەشىمدەر قابىلداعانىن مالىمدەدى.

"بۇگىن بىرىنشىدەن، تۇركىستان قالاسىنىڭ نەگىزگى دامۋ جوباسىن بەكىتۋ ءۇشىن، ەكىنشىدەن، شاھاردى ەركىن ەكونوميكالىق ايماق ەتىپ جاريالانسىن دەگەن جارلىقتارعا قول قويدىم. امان بولساق، 2-3 جىلدىڭ ىشىندە تۇركىستان جايناپ، باسقا قالا بولىپ، ەڭسەسى كوتەرىلىپ، ءبارىمىزدىڭ قۋانىشىمىزعا ءوسىپ وركەندەيتىن بولادى"، — دەدى ەلباسى.