باتىس قازاقستان وبلىسىندا جەڭىل اۆوتوكولىك پەن اۆتوبۋس ءتۇيىسىپ، سالدارىنان ءبىر ادام كوز جۇمدى، دەپ جازادى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ. وقيعا 29 قىركۇيەك كۇنى ءتۇس اۋا ورال-اتىراۋ كۇرە جولى بويىندا، اقجايىق اۋدانى اۋماعىندا بولعان.
كۋا بولعانداردىڭ ايتۋىنشا، «مەرسەدەس» كولىگى مەن اتىراۋعا جەتكىزىلمەك بولعان جاڭا اۆتوبۋس سوقتىعىسقان. سوندىقتان وندا جولاۋشىلار بولماعان.
بقو ىشكى ىستەر دەپارتامەنتىنىڭ باسپا ءسوز قىزمەتىنەن ءمالىم ەتكەندەي، جول اپاتى سالدارىنان «مەرسەدەستىڭ» جۇرگىزۋشىسى جەدەل جاردەم كەلگەنگە دەيىن قازا بولدى، جولاۋشىسى ءتۇرلى جاراقاتتارمەن اۋرۋحاناعا جەتكىزىلدى. «وقيعانىڭ سەبەپ-سالدارى انىقتالۋ ۇستىندە»، - دەدى ىىد-دەن.
