ابەل سانچەس قازاقستاندىق بوكسشى WBA "تۇراقتى" چەمپيونى جانە WBO چەمپيونى بەلبەۋلەرى ءۇشىن جۇدىرىقتاسۋى مۇمكىن ەكەنىن ايتتى دەپ جازادى Qamshy.kz اقپارات اگەنتتىگى Sports.kz سايتىنىڭ دەرەگىن نەگىزگە الىپ. 

گەنناديي گولوۆكيننىڭ باپكەرى (38-1-1، 34 كو) ابەل سانچەس ورتا سالماقتاعى الەم چەمپيونى تيتۋلى ءۇشىن وتەتىن ەكى جەكپە-جەككە تۇسىنىكتەمە بەردى.

اڭگىمە WBA "تۇراقتى" چەمپيونى ريوتا مۋراتامەن (14-1، 11 كو) وتكىزىلۋى مۇمكىن جەكپە-جەك پەن بيللي دجو سوندەرس (26-0، 12 كو) دوپينگ-تەستەن سۇرىنۋىنە بايلانىستى بەلبەۋىنەن ايىرىلىپ قالعان جاعدايدا، بوس قالعان WBO تيتۋلى ءۇشىن ۇيىمداستىرىلاتىن ايقاس جايلى بولىپ وتىر. 

"مۋراتا دەيسىز بە؟ ونىمەن كەزدەسۋىمىز مۇمكىن. بۇعان دەيىن ونىڭ پروموۋتەرى اكيحيكو حوندانىڭ ءوزى بۇل ماسەلەنى كوتەرگەن ەدى. ول بۇل جەكپە-جەك ۇنايتىنىن ايتتى. سوندىقتان ءبارى دە مۇمكىن. سونىمەن قاتار دوپينگ-تەستەن سۇرىنگەن سوندەرستىڭ بەلبەۋىنە دە كوز تىگىپ وتىرمىز – ەگەر ونىڭ بەلبەۋىن قايتارىپ السا، ءبىز بوس قالعان تيتۋل ءۇشىن جۇدىرىقتاساتىن شىعارمىز، كىم ءبىلسىن"، — دەدى سانچەس. 

ايتا كەتەيىك، دۇنيەجۇزىلىك بوكس كەڭەسىنىڭ (WBC) باسشىسى ماۋريسيو سۋلەيمان سونداي-اق گولوۆكيننىڭ مەكسيكالىق ساۋل الۆارەسپەن ءۇشىنشى جەكپە-جەگى ءوتۋى مۇمكىن ەكەنىن مالىمدەگەن بولاتىن. ونىڭ پىكىرىنشە، گولوۆكيننىڭ ريەۆانش وتكىزۋ جايلى ۇسىنىسى ەسكەرۋسىز قالماۋى كەرەك.

"كانەلو" بەلبەۋىن قورعاۋعا مىندەتتەلۋى مۇمكىن، الايدا ءوز ەركىمەن قورعايتىن جولدارى دا بار. سونداي-اق ءبىز گولوۆكين ريەۆانش سۇراعانىن بىلەمىز. ازىرگە بۇل جەكپە-جەك رەسمي جاريالانعان جوق، الايدا ول ونى وتكىزگىسى كەلەتىنىن جەتكىزدى"، — دەپ اتاپ ءوتتى سۋلەيمان.