بۇل تۋرالى بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆتىڭ استانادا «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىن باقىلاۋ بارىسىندا بەلگىلى بولدى.
ازامات پەن جانار استاناعا بالقاش قالاسىنان كوشىپ كەلگەن. ءبىر جىل بويى پاتەر جالداپ تۇرعان ولار، «7-20-25» باعدارلاماسى بويىنشا باسپانالى بولعان جاس وتباسىلاردىڭ ءبىرى. ولار قۇجاتتارىن ءتيىستى جەرلەرگە وتكىزگەننەن كەيىن بار بولعانى 10 كۇننىڭ ىشىندە ءوز پاتەرلەرىنىڭ كىلتىن قولدارىنا العان.
«ەندى ءبىزدىڭ دە استانانىڭ قاق ورتاسىندا ءوز ءۇيىمىز بار. مەملەكەتتىك باعدارلاما ارقىلى «Millennium Park» كەشەنىنەن ەكى بولمەلى پاتەرگە قول جەتكىزدىك»، – دەيدى قۋانىشى قوينىنا سىيماعان ازامات قونايەۆ.
ماۋلەن اشىمبايەۆ جاس وتباسىن قۇتتىقتاپ، بۇل ەلباسى باستامالارىنىڭ ناقتى ناتيجەسى ەكەنىن ايتتى. سونداي-اق ول بەس الەۋمەتتىك باستامادا كوتەرىلگەن ماسەلەلەردىڭ بارلىعى استانا ءۇشىن وتە وزەكتى ەكەنىنە نازار اۋداردى.
– استانا – ەلىمىزدىڭ باس قالاسى. ۋاقىت وتكەن سايىن جان-جاقتى دامىپ، تۇرعىندار سانى دا ارتىپ كەلەدى. بۇگىندە ەلوردامىزدا 1 ميلليوننان استام حالىق تۇرادى. سوندىقتان استانا ءۇشىن باسپانا ەڭ وزەكتى ماسەلەلەردىڭ ءبىرى. وسى رەتتە ەلباسىنىڭ بەس الەۋمەتتىك باستاماسى، سونىڭ ىشىندە «7-20-25» باعدارلاماسى بۇل ماسەلەنى شەشۋگە جانە قازاقستاندىقتاردىڭ ءوز باسپانالارىنا قول جەتكىزۋىنە ۇلكەن سەپتىگىن تيگىزىپ وتىر. سول سەبەپتى باعدارلاماعا حالىق، سونىڭ ىشىندە استانالىقتار كوبىرەك قاتىسىپ، مۇمكىندىكتى ءمۇلت جىبەرمەۋى كەرەك، – دەدى ماۋلەن اشىمبايەۆ.
«7-20-25» باعدارلاماسىنىڭ وپەراتورى «باسپانا» يپوتەكالىق ۇيىمىنىڭ مالىمەتىنە سۇيەنسەك، بيىلعى 1 شىلدەدەن باستاپ استانادا جالپى سوماسى 12،7 ملرد. تەڭگەنى قۇرايتىن 840 ءوتىنىم قابىلدانعان. ونىڭ ىشىندە 8،8 ملرد. تەڭگەنى قۇرايتىن 584 ءوتىنىم ماقۇلداندى.
سونىمەن قاتار «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىن باقىلاۋ جونىندەگى رەسپۋبليكالىق قوعامدىق كەڭەستىڭ ءتوراعاسى، سەنات دەپۋتاتى باقىتجان جۇماعۇلوۆ جانە پارتيا استانا قالالىق فيليالىنىڭ ءتوراعاسى، استانا قالاسىنىڭ اكىمى باقىت سۇلتانوۆ باستاعان توپ «جوعارى ءبىلىم بەرۋدىڭ قولجەتىمدىلىگى مەن ساپاسىن ارتتىرۋ جانە ستۋدەنت جاستاردىڭ جاتاقحاناداعى جاعدايىن جاقسارتۋ» باستاماسىن ىسكە اسىرۋعا قاتىسۋشى «ءال-قۋات» حوستەلىندە بولدى. بۇگىندە ەلوردادا جوعارى وقۋ ورىندارى مەن كوللەدجدەردىڭ 16 مىڭعا جۋىق ستۋدەنتى جاتاقحاناعا مۇقتاج. وسى ماسەلەنى شەشۋ ءۇشىن قالالىق اكىمدىك ەكسپو حالىقارالىق كورمەسىنەن كەيىن بوس قالعان حوستەلدەردى ۋاقىتشا جاتاقحانا رەتىندە پايدالانۋدى قولعا العان. بۇل ارينە پيلوتتىق جوبا. ياعني الداعى ۋاقىتتا جاڭا جاتاقحانالار سالىنادى. ءبىراق سوعان دەيىن ستۋدەنتتەر وسىنداي ورىنداردا تۇرماق.
ايتا كەتەيىك، بانكتەر بيىل شىلدە ايىنان باستاپ «7-20-25» باعدارلاماسى بويىنشا يپوتەكالىق نەسيە بەرۋدى باستاپ كەتتى. ال جەڭىلدەتىلگەن يپوتەكانى كىمدەر الا الادى؟ بۇل ساۋالعا ق ر ۇلتتىق بانك ءتوراعاسى دانيار اقىشيەۆ جاۋاپ بەردى. ايتۋىنشا، يپوتەكالىق باعدارلاماعا تۇراقتى جۇمىس بار كەز كەلگەن ادام قاتىسا الادى. الايدا ول ازاماتتىڭ اتىندا باسپانا بولماۋى ءتيىس. جانە نەسيە تاريحى دا دۇرىس بولۋى كەرەك. بۇدان بۇرىن ەلباسى «7-20-25» باعدارلاماسىن جۇزەگە اسىرۋ ءۇشىن ۇلتتىق بانك پەن ۇكىمەت بىرلەسىپ جۇمىس ىستەۋ كەرەك.
«ۇلتتىق بانكتىڭ، ەكىنشى دەڭگەيلى بانكتەر مەن قور نارىعىنىڭ مۇمكىندىكتەرىن ىسكە قوسۋ كەرەك. ۇلتتىق بانك كەمىندە 1 تريلليون تەڭگە قارجىنى تارتاتىن ارنايى كومپانيا قۇرىپ، ونى بانكتەردىڭ جوعارىدا ايتىلعان شارتتارىنا جاۋاپ بەرەتىن جاڭا يپوتەكالىق نەسيەلەرىن ساتىپ الۋعا جۇمساۋى قاجەت. باعدارلامانى جۇزەگە اسىرۋ ناتيجەسىندە ميلليون قازاقستاندىق باسپانا الۋ مۇمكىندىگىنە يە بولادى»، – دەگەن ەدى نۇرسۇلتان نازاربايەۆ.
