قازاقستانداعى ۇلتارالىق جانە ءدىنارالىق تاتۋلىقتى نىعايتۋ، ەل بىرلىگى مەن بەيبىتشىلىك يدەياسىن ناسيحاتتاۋ ماقساتىندا «ەتنوسارالىق كەلىسىمنىڭ قازاقستاندىق ۇلگىسى» اتتى دوڭگەلەك ۇستەل ءوتتى. ونى الماتى قالاسى ىشكى ساياسات باسقارماسىنىڭ قولداۋىمەن «ادىرنا» ۇلتتىق-ەتنوگرافيالىق بىرلەستىگى ي.ا.كرىلوۆ اتىنداعى بالالار كىتاپحاناسىنىڭ كونفەرەنسيا زالىندا وتكىزدى.

دوڭگەلەك ۇستەلگە «قازاقستان دۇنعان قوعامى» قوعامدىق بىرلەستىگىنىڭ ءتورعاسى ابۋباكير ۆوينسە، گرۋزين ەتنو-مادەني بىرلەستىگىنىڭ ءتوراعاسى كاحابەر گابەلاشۆيلي، «سومونيەن» تاجىك ەتنو-مادەني بىرلەستىگى ءتوراعاسىنىڭ ورىنباسارى ينوياتۋلو ۆالييەۆ، «احىسكا» حالىقارالىق گازەتىنىڭ جاۋاپتى حاتشىسى ايناگۇل تولەۋتايەۆا، الماتى قۇرىلىس جانە حالىقتىق كاسىپشىلىك كوللەدجىنىڭ، الماتى تەحنولوگيا جانە فلورەستيكا كوللەدجىنىڭ ستۋدەنتتەرى قاتىستى. جيىنعا بەلگىلى قوعام بەلسەندىسى باتىرجان سەيدومار مودەراتورلىق ەتتى.

العاشقى ءسوز العان ابۋباكير ۆوينسە ستۋدەنتتەرگە: “قازاق حالقىنىڭ ەجەلدەن باسقا ۇلتتارمەن ءتاتۋ-تاتتى بولعانىن، جانە قوناقجايلىلىقپەن قامقور بولعانىن”،- ايتتى. كاحابەر گابەلاشۆيلي ەلباسىنىڭ ۇلتارالىق جانە ءدىنارالىق تاتۋلىقتى نىعايتۋ بويىنشا ساياساتىنىڭ وڭدى ناتيجەلەرىنەن مىسالدار كەلتىرىپ سويلەدى. ينوياتۋلو ۆالييەۆ وسى تاقىرىپ بويىنشا ءوز ويىمەن ءبولىسىپ كەتتى. مادەنيەتتانۋشى بەردالى وسپانوۆ اعامىز ەجەلگى اتا-بابامىزدان قالىپتاسقان ۇلتارالىق تاتۋلىقتان بىرنەشە مىسالدار كەلتىرىپ، قازىرگى ءبىز ۇرپاقتار سول جولدىڭ جالعاستىرۋشىسى ەكەنىمىزدى جەتكىزدى. دوڭگەلەك ۇستەلدە 70-تەن استام ستۋدەنت اسسامبلەيا مۇشەلەرىمەن ەتنومادەني بىرلەستىكتەر باسشىلارىنا سۇراقتار قويىپ، كوپتەگەن پايدالى اقپاراتتار الدى. قاتىسۋشىلار ءبىر ساعاتتىق كەزدەسۋدىڭ قالاي تەز وتكەنىن بايقاماي قالدى. كەزدەسۋ سوڭىندا ستۋدەنتتەر اسسامبلەيا مۇشەلەرىمەن جانە ۇيىمداستىرۋشىلارمەن بىرگە ەستەلىك فوتوعا ءتۇستى.