الماتىداعى «الاتاۋ» ءداستۇرلى ونەر تەاترىندا رەسپۋبليكا كولەمىندە ۇيىمداستىرىلعان «تۇلپار ءمىنىپ، تۋ العان» اتتى ۇلتتىق بايقاۋدىڭ جەڭىمپازدارىن ماراپاتتاۋ ءراسىمى ءوتتى. اتالمىش شارا الماتى قالاسىنىڭ ىشكى ساياسات باسقارماسىنىڭ قولداۋىمەن ۇيىمداستىرىلعان.

رەسپۋبليكا بويىنشا ۇلتتىق بايقاۋدا باعىن سىناپ كورۋگە بەكىنگەن 1300-گە جۋىق بالا قاتىستى. 10-19 قىركۇيەك ارالىعىندا ءار اۋداندا ىرىكتەۋ شارالارى ۇيىمداستىرىلىپ، ءاربىر اۋداننان 3 جەڭىمپاز انىقتالىپ، 8 اۋداننان جالپى 24 بالا قالالىق قورىتىندى كەزەڭگە جولداما العان.24 بالانىڭ ىشىنەن ۇزدىك بولىپ وزا شاۋىپ جۇلدەلى ورىنداردى يەلەنگەن ءۇش قاتىسۋشى ارناي سىي-سىياپاتتارمەن ماراپاتتالدى.

مانشۇك ارىستانبەك، شىڭعىسحان ارميا جانە سانات عازيز ۇلى اتتى بايقاۋ قاتىسۋشىلارى ىنتالاندىرۋ سىيلىعىنا يە بولدى. ءۇشىنشى ورىنعا №152 مەكتەپ-گيمنازياسىنىڭ 9-سىنىپ وقۋشىسى بەكزات شارداربەك يە بولسا، ەكىنشى ورىن №178 ليسەيدىڭ 6-سىنىپ وقۋشىسى ابىلاي بەرداشيەۆكە بۇيىردى. رەسپۋبليكا كولەمىندە ۇيىمداستىرىلعان بۇل بايقاۋدا بارلىق قاتىسۋشىلاردان وزا شاۋىپ، جۇلدەلى ءبىرىنشى ورىنعا №180 مەكتەپتىڭ 9-سىنىپ وقۋشىسى ارۋجان ابساتتار يە بولدى. بەلگىلى بولعانداي، ءۇشىنشى ورىن يەگەرىنە 500 000 تگ، ەكىنشى ورىنعا 1 ميلليون بەرسە، ءبىرىنشى ورىن يەگەرىنە 1 500 000 تگ كولەمىندە قارجىلاي سىياقى تاپسىرىلدى. سونىمەن قاتار، تەك بايقاۋعا قاتىسۋشىلار عانا ەمەس، ولاردىڭ تالىمگەرلەرى دە وكسفورد قالاسىنا بارىپ ءتىلدى جەتىك مەڭگەرۋگە جولداما الدى.

«تاۋەلسىز ەلدىڭ بالاسى تۇلپار مىنەدى، تۋ الادى. ەلباسىمىزدىڭ باستاماسىمەن، رۋحاني جاڭعىرۋ باعدارلاماسىنىڭ نەگىزگى مىندەتى بىزگە بابامىز اڭساعان تاۋەلسىزدىگىمىزدى باياندى ەتۋ. جوبا باستالعالى بەرى وقۋشىلارىمىز قانشام كەزەڭدەردەن ءوتتى.  ۇيىمداستىرۋشىلارمەن، قازىلار القاسىمەن اقىلداسا وتىرىپ دۇنيەگە كەلگەن بۇل جوبا قازاقتىڭ تالاي بالاسىنىڭ رۋحىن كوتەرىپ، ۇلتتىق سەزىمىن ارتتىرا تۇسكەنىنە سەنىمدىمىز. تەك قازاق حالقىنا عانا ەمەس، بارشا تۇركى حالىقتارىنا ورتاق «الپامىس جىرىن» جاتتاتقىزۋ ارقىلى ءبىز جاستارىمىزدىڭ رۋحىن شىڭدادىق جانە بولاشاقتا ەلباسىمىز ايتقانداي باسەكەگە قابىلەتتى ەتۋگە ءبىر قادام بولسا دا العا جول اشتىق دەپ بىلەمىن»، - دەدى الماتى اكىمىنىڭ ورىنباسارى ارمان قىرىقبايەۆ.

اتالمىش بايقاۋدىڭ قازىلار القاسىنىڭ قۇرامىندا  ومىربەك ايتبايەۆ، ۋاليحان قاليجان، قالي سارسەنباي، تىنىسبەك قوڭىراتبايەۆ، تەمىرحان تەبەگەنوۆ، سەرىكقازى قوراباي جانە ماماي احمەت سىندى عالىمدار مەن قالامگەرلەر بولعان.