تۇركىستان وبلىسىندا مەكتەپ وقۋشىسى قۇرداستارىنان زورلىق كورگەنىن ايتىپ، شاعىمداندى. بۇل جولى دا وقيعا سارىاعاش اۋدانىندا مەكتەپ وقۋشىلارى اراسىندا بولعان. 13 جاستاعى بالا ءبىر مەكتەپ-ينتەرناتتا وقيتىن ءوزىنىڭ قۇرداسى مەن ونىڭ 9-شى سىنىپتاعى اعاسىنان ءبىر جىل بويىنا ءجابىر كورگەنىن ايتادى. سونىڭ سالدارىنان وقۋشى دەرتكە شالدىققان. مەكتەپ ىشىندەگى بۇل ارەكەت جايلى ءتىپتى تاربيەشىلەر دە بىلگەن كورىنەدى. بۇل تۋرالى Qamshy.kz اقپارات اگەنتتىگى كتك ارناسىنا سىلتەمە جاساپ حابارلادى. 

مەكتەپ-ينتەرناتتا كورگەن قورلىعى جايلى بالا اناسىنا دا، ءتىپتى، تۋعان اعاسىنا دا كوپكە دەيىن ءلام دەمەي جۇرگەن. تەك سىنىپتاستارىنىڭ ءبىرى بولمەدەگى جايتتى سۋرەتكە ءتۇسىرىپ الىپ، ونى وزگە ۇلدار اراسىندا تاراتىپ جىبەرگەن سوڭ ايتۋىنا تۋرا كەلىپتى.           

"جاتقىزىپ قويىپ، دامبالىمدى شەشتى.  ءبىرىنشىسى باعلان، ەكىنشىسى جاسۇلان. بولمەدە ايقايلادىم، ەشكىم ەستىمەدى. دالىزگە شىعىپ ايقايلايىن دەپ ەدىم، ۇرىپ تاستادى.  ايتاتىن بولساڭ، بىت-شىتىڭدى شىعارامىن دەپ قورقىتتى"، - دەيدى جابىرلەنۋشى. 

ال ايىپتاپ وتىرعانى ءوزىنىڭ اۋىلداستارى ەكەن. اناسىنىڭ ايتۋىنشا، ولاردىڭ تۋىستارى دا، مەكتەپ باسشىلىعى دا «شۋ شىعارمايىق» دەپ اقشا ۇسىنعان كورىنەدى.       

"ويباي،  اۋىلداسپىز عوي، كورشىلەسپىز، ۇيات بولادى دەدى   ينتەرناتتىڭ مەڭگەرۋشىسى مەن  مەكتەپ ديرەكتورى. «قانشا بەرەيىك؟ وسى ءىستى جابا سالايىق؟ ءبارىمىز قازاقپىز عوي؟ نەمەنەگە جان-جاققا جاياسىڭ؟ جايما!» دەيدى. مەنىڭ بالامنىڭ ءومىرى عوي دەپ ۇرىستىم ولارعا"، - دە كۇيىندى جابىرلەنۋشىنىڭ اناسى.

ال زورلىق-زومبىلىق بىلتىر قىركۇيەكتەن باستالعان كورىنەدى. سوندا بالا بىردەن تاربيەشى اعايىنا ايتقان. الايدا كتك تىلشىلەرى ونى ىزدەپ تابا الماعان. سويتسەك، ول وسى ايدىڭ 10-ى كۇنى پوليسياعا ارىز تۇسسە، 13ء-ى كۇنى جۇمىستان كەتىپ قالعان. ال مەكتەپ باسشىلىعى بىزدە مۇنداي جاعداي بولۋى مۇمكىن ەمەس دەپ وتىر.

 "جان جاقتى زەردەلەۋ جۇمىستارىن جۇرگىزىپ جاتىرمىن. ونداي جاعداي بولۋ مۇمكىن ەمەس دەپ  ءبىر بولمەدە جاتقان وقۋشىلاردىڭ وزدەرى ايتىپ جاتىر.  اتا-اناسىمەن سويلەستىك. بىتىمگەرشىلىككە شاقىردىق. ەكى جاقتى تابىستىرۋعا ءبىر ارەكەت جاساپ كوردىك. بۇل ىسپەن ءقازىر پوليسيا اينالىسىپ جاتىر"، - دەدى مەكتەپ ديرەكتورى تالعات احمەتوۆ.

پورليسيانىڭ دەرەگىنشە، سوتقا دەيىنگى تەرگەۋ امالدارى باستالدى.

"قازىرگى تاڭدا ق ر قىلمىستىق كودەكسىنىڭ 121-بابى بويىنشا، ول «سەكسۋالدىق سيپاتتاعى ىس-ارەكەتتەر»، سوتقا دەيىنگى تەرگەۋ امالدارى جۇرگىزىلۋدە. ساراپتامالار تاعايىندالدى. وسى وقيعانىڭ ءمان-جايى پوليسيا قىزمەتكەرلەرىمەن انىقتالۋدا"، -  دەدى تۇركىستان وبلىستىق ءىىد رەسمي وكىلى سالتانات قاراكوزوۆا.

سوراقىسى سول، ءجاسوسپىرىمنىڭ ايتقانىنا قاراماستان تاربيەشىسى بيىل دا ۇلداردى بىرگە جاتقىزىپتى.  اناسىنىڭ ايتۋىنشا، وسى قورلىقتان سوڭ بالا ۇلكەن دارەتىن ۇستاي الماي قالعان. ونى تەكسەرگەن الماتىلىق دارىگەرلەر تىك ىشەگىندە جاراقات بارىن ايتىپتى. ال تىر-جالاڭاش سۋرەتى وقۋشىلار اراسىندا تاراپ كەتكەن ءجاسوسپىرىمنىڭ ءوزى مەكتەپكە ەندى مۇلدەم بارعىسى جوق.