وبلىستىق كاسىپكەرلىك جانە يندۋستريالىق-يننوۆاسيالىق دامۋ باسقارماسى ەلباسىنىڭ ەتنواۋىلداردى دامىتۋ جونىندەگى تاپسىرماسىنا وراي يگى شارالار لەگىن قولعا الدى. سونىڭ اياسىندا جاقىندا سارايشىق اۋىلىندا قىش قۇمىرا جاساۋدان شەبەرلىك ساباعىن ۇيىمداستىردى.

جەرگىلىكتى كاسىپكەر سارا سارسەمبايەۆا از قامتىلعان وتباسىلار بالالارى مەن ۇلگەرىمى جاقسى وتىز وقۋشىعا قازىناتال ۋچاسكەسىنەن ون كيىز ءۇي تىگىپ، تاعامنان ءدام ۇلەستىردى. شارانىڭ مازمۇندى وتۋىنە اۋىلدىق وكرۋگ اكىمشىلىگى مەن ق.قاراشا ۇلى اتىنداعى مەكتەپ ۇجىمى قولداۋ ءبىلدىردى. ماقسات – كونەنىڭ كوزىنە اينالعان جادىگەرلەردى جاستارعا ناسيحاتتاۋ، تۋعان ولكە تاريحىن تانىتۋ.

شەبەرلىك ساباعىن جۇرگىزۋگە قىزىلقوعا اۋدانىنان قىش قۇمىرا جاساۋ ءىسىنىڭ شەبەرى جايلاۋ تالاسوۆ شاقىرىلدى. ول وقۋشىلارعا ۇمىتىلۋعا اينالعان ساز سىرناي جاساۋدىڭ قىر-سىرىن كورسەتتى.

– تۇرمىستىق بۇيىمداردىڭ كوبىسى ءقازىر حيميالىق قوسپا ارقىلى جاسالادى. ال، بۇل – دەنساۋلىققا زيان. سوندىقتان ۇلتتىق قولونەردى قايتا جاڭ-عىرتۋىمىز قاجەت. بۇگىندە «كەراميكا»، «فارفور» دەپ جۇرگەنىمىزدىڭ ءبارىنىڭ دە قۇرامى – ساز. ونى 700 گرادۋس تەمپەراتۋرادا كۇيدىرىپ، قاراپايىم جانە كۇردەلى زاتتار جاسالادى. ماسەلەن، ەۋروپالىق ۇيلەردىڭ شاتىرى كوبىنەسە قىزىل ءتۇستى بولىپ كەلەدى. سەبەبى، ول تازا كەراميكادان جاسالعان. ايتسە دە، ونىڭ باعاسى وتە قىمبات. ەسەسىنە، تابيعي تازا نارسەدەن ەشقانداي رادياسيا تارامايدى.

ءبىز بۇرىنعى كيىز بەن تەكەمەتتى تارك ەتىپ، سينتەتيكالىق ءونىمدى پايدالانعاندى قۇپ كورەمىز. بۇل – دۇرىس ەمەس. جاستار اراسىندا اۋرۋ تۇرلەرىنىڭ كوبەيىپ كەتۋى دە سوندىقتان. ماسەلەن، قاراپايىم كيىز ءۇيدىڭ ءوزى – ءبىزدىڭ ەڭ باي مۇرامىز. وندا تەرىس ەنەرگيا ساقتالاتىن بۇرىش بولماعاندىقتان، ول شەڭبەر بويىمەن سىرت اينالىپ كەتەدى، – دەيدى شەبەر.

شەبەرلىك ساباعى بارىسىندا بالالار قۇمىرانىڭ قالاي جاسالاتىنىن عانا تاماشالاپ قويماي، ۇلتتىق ويىندار مەن سپورتتىق سايىستاردان سىنعا ءتۇستى.