وسلوداعى نورۆەگيالىق كوميتەت 2018 جىلى سەكسۋالدى زورلىققا قارسى جاساعان ەڭبەگى ءۇشىن دەنيس مۋكۆەگە مەن نادە مۋرادقا نوبەل سىيلىعى بەرىلگەنىن حابارلادى، دەپ جازادى Qamshy.kz اقپارات اگەنتتىگى.    

نادە مۋراد باسە تاحا – يراكتىڭ قۇقىق قورعاۋشىسى. بۇۇ-نىڭ ەسىرتكى مەن قىلمىسقا قارسى باسقارماسىنىڭ ەرىكتى ىزگى نيەت ەلشىسى، ادام قۇقىقتارى بويىنشا ۆاسلاۆا گاۆەلا جۇلدەسىنىڭ لاۋرەاتى جانە اندرەي ساحاروۆتىڭ پىكىر ەركىندىگى جۇلدەسىنىڭ يەسى.

نادە مۋراد دايش-تا سەكسۋالدى قۇلدىقتا بولعان. دايش سودىرلارى نادەنىڭ تۇرىپ جاتقان اۋىلىن باسىپ الىپ، اتا-اناسىن ءولتىرىپ، ءوزىن قۇلدىققا الىپ كەتكەن. نادە قاشىپ كەتكەننەن كەيىن جۋرناليستەرگە دايش-تىڭ ادامدارعا جاساعان وزبىرلىعىن، ونىڭ ىشىندە ايەلدەردى قالاي قورلاپ جاتقانىن ايتىپ بەرگەن. 

دەنيس مۋكۆەگە – گينەكولوگ، قۇرمەت وردەنىنىڭ يەگەرى. توپپەن زورلانعان ايەلدەرگە مەديسينالىق كومەك كورسەتەتىن پانزي اۋرۋحاناسىنىڭ ديرەكتورى. مۋكۆەگە گينەكولوگيالىق جاراقاتتاردى ەمدەيتىن ەڭ جاقسى مامان بولىپ تانىلدى.  

بيىل نوبەل سىيلىعىنا 329 ۇمىتكەر تىركەلدى. ونىڭ 112ء-سى قوعامدىق جانە حالىقارالىق ۇيىمدار.

2018 جىلى نوبەل سىيلىعىنىڭ سومماسى  - ءبىر ميلليون دوللار.