قاراعاندىدا «نۇرلى جەر» باعدارلاماسىمەن سالىنعان بەس قاباتتى، 60 پاتەرى بار تۇرعىن ءۇي پايدالانۋعا بەرىلدى. بيريۋزوۆ كوشەسىندە بوي كوتەرگەن ۇيدەن باسپاناعا مۇقتاج بولىپ وتىرعان 16 وتباسى پاتەرلى بولدى.

ولارعا جاڭا پاتەرلەردىڭ كىلتىن قالا اكىمى نۇرلان اۋباكىروۆ تابىس ەتتى.

جالعا بەرىلەتىن باسپاناعا جەتىم بالالار، كوپ بالالى وتباسىلارعا بەرىلدى. سونداي-اق بيۋدجەت قىزمەتكەرلەرى، اسكەري جانە مەملەكەتتىك قىزمەتشىلەر دە پاتەرلى بولدى.

بۇدان تىس، جىل سوڭىنا دەيىن باسپانا قۇرىلىسى باعدارلاماسى بويىنشا قاراعاندىدا تاعى 325 پاتەردى پايدالانۋعا بەرۋ جوسپاردا بار. ۇيلەر قالاداعى 12، 14 جانە 15-شاعىن اۋدانداردا سالىنىپ جاتىر. 

2 جانە 3 بولمەلى پاتەرلەردىڭ كىلتى سالتاناتتى جاعدايدا تاپسىرىلدى. اۋماعى 962 شارشى مەتردى قۇرايتىن ەكى قاباتتى تۇرعىن ءۇيدىڭ قۇرىلىسى «قولجەتىمدى باسپانا-2020» باعدارلاماسى بويىنشا جۇرگىزىلىپتى. ول ءۇشىن رەسپۋبليكالىق بيۋدجەتتەن 86 ميلليون تەڭگە قارجى بولىنگەن. قونىس تويىن تويلاعانداردىڭ ءبىرى وقاسوۆتار جانۇياسى. ۇستاز بولىپ ەڭبەك ەتەتىن وتاناسى ءار جەردە ءۇي جالداپ كەلگەن. ەندى ءۇش بولمەلى كەڭ پاتەرگە جايعاستى. تاعى ءبىر قۋانىش، ءقازىر اۋدان ورتالىعى اتاسۋ كەنتىندە «نۇرلى جەر» باعدارلاماسى اياسىندا 4 بىردەي كوپ قاباتتى ءۇيدىڭ قۇرىلىسى ءجۇرىپ جاتىر. جۋىردا تاعى 56 وتباسى وسىنداي قۋانىشقا كەنەلەدى.

ايتا كەتۋ كەرەك، ءقازىر اۋدان بويىنشا 600-دەن استام وتباسى پاتەر كەزەگىندە تۇر.

ايگەرىم وقاسوۆا، جاڭاارقا اۋدانىنىڭ تۇرعىنى:

- كوڭىل-كۇيىم وتە تاماشا. كوپتەن كۇتكەن قۋانىشقا بۇگىن قولىم جەتىپ وتىر. وسى باسپاناعا 9 جىل كەزەكتە تۇردىم. «سابىر ءتۇبى سارى التىن» دەيدى، مىنەكي قولىمىز 3 بولمەلى پاتەرگە جەتىپ وتىر. قۇرىلىس ساپاسىنا كوڭىلىم تولادى. جىلۋ قازاندىعىنا قوسۋلى، سۋى اعىپ تۇر.