ق ر ينۆەستيسيالار جانە دامۋ ءمينيسترى جەڭىس قاسىمبەكتىڭ ايتۋىنشا، «باسپانا» يپوتەكالىق ۇيىمى نەسيەلىك تۇرعىن ءۇي قۇرىلىسىنا 150 ملرد. تەڭگە سوماسىندا ءوز ۇلەسىن قوسۋعا نيەتتى.
ەگەر كومپانيا وسىنداي شەشىم قابىلداسا، ايتارلىقتاي سوما نەسيەلىك باسپانا قۇرىلىسى نارىعىندا اينالىمدا بولادى.
7-20-25-كە قاتىسۋشىلار سانى بويىنشا الماتى، استانا قالالارى، سونىمەن قاتار ماڭعىستاۋ وبلىسى كوش باستاپ كەلەدى. اقتوبە، شىعىس قازاقستان جانە اقمولا وبلىستارىندا نەسيە بەرۋ قارقىنى وسۋدە.
باستاپقى تۇرعىن ءۇي بويىنشا ۇسىنىستاردى ۇلعايتۋ ماقساتىندا «باسپانا» يپوتەكالىق ۇيىمى 7-20-25 بويىنشا تۇرعىن ءۇي قۇرىلىسى ءۇشىن جەرگىلىكتى اتقارۋشى ورگاندارعا 150 ملرد تەڭگە ءبولۋ مۇمكىندىگىن قاراستىرۋدا.
جاو – مەن بىرگە جاس وتباسىلار جانە بيۋدجەتتىك سالا قىزمەتكەرلەرى ءۇشىن 7-20-25 شەڭبەرىندە باستاپقى جارنانى قىسقارتۋ بويىنشا جۇمىس باستالدى. باسپانامەن «جاس ارمان» جانە «قامقور باسپانا» ونىمدەرى ازىرلەندى. جاو–مەن جوعارىدا اتالعان ساناتتاعى ازاماتتارعا باستاپقى جارنانى قىسقارتۋ ءۇشىن سۋبسيديا بەرىلەدى دەپ بولجانۋدا. سونىمەن قاتار، تىزىمدەردى جاساۋ، ونىمگە قاتىسۋ ءۇشىن ازاماتتاردى ىرىكتەۋدى اكىمدىكتەر وزدەرى جۇرگىزەدى. جوبا بويىنشا شىمكەنت اكىمدىگى 2 مىڭعا جۋىق تۇرعىنعا قولداۋ كورسەتۋ ءۇشىن 2 ملرد. تەڭگە سۋبسيديا بولەدى. سونداي-اق، ۇلتتىق بانكتىڭ قاۋلىسىمەن شىمكەنت قالاسى ءۇشىن تۇرعىن ءۇيدىڭ ەڭ جوعارعى قۇنىنىڭ مولشەرى 25 ملن. تەڭگەگە دەيىن ۇلعايتىلدى.
7-20-25-كە 11 قىركۇيەكتەن باستاپ قازاقستان حالىق بانكى جانە ForteBank قوسىلدى. وسىلايشا، وتىنىمدەردى 7 بانك-سەرىكتەس قابىلدايدى: سەنتركرەديت بانكى، اتفبانك، سەسنابانك، BankRBK، ەۆرازيالىق بانك، حالىق بانكى جانە ForteBank.
«بۇگىندە باسپانا قۇرىلىسىندا ريەۆولۆەرلىك تۇرعىدا، ياعني نەسيەلىك تۇرعىن ۇيگە ءاربىر ەكى جىلدا 270 ملرد تەڭگە اينالىپ تۇرادى. ەندى وسى باعدارلاماعا ۇلتتىق بانكپەن قۇرىلعان «باسپانا» ۇيىمى ءوز ۇلەسىن قوسۋعا نيەتتى. اتاپ ايتقاندا، وسى يپوتەكالىق ۇيىمى نەسيەلىك تۇرعىن ءۇي قۇرىلىسى ماقساتىندا وڭىرلەرگە قوسىمشا 100-150 ملرد تەڭگە ءبولۋ باستاماسىن كوتەردى. سوڭعى شەشىمدى كومپانيا قاشان قابىلدايتىندىعى تۋرالى مالىمەت مەندە جوق. الايدا بۇعان دەيىن وسىنداي ۇسىنىس جاسالعان ەدى»، - دەپ توقتالدى مينيستر.
ج. قاسىمبەكتىڭ سوزىنە قاراعاندا، ەگەر دە وسىنداي شەشىم قابىلدانسا، وندا ايتارلىقتاي قوماقتى سوما ريەۆولۆەرلىك نەگىزدە تۇراقتى تۇردە نەسيەلىك باسپانا قۇرىلىسى نارىعىندا اينالىمدا بولادى.
ەكىنشى تۇرعىن ءۇي نارىعى وبەكتىلەرىن يپوتەكالىق نەسيەلەندىرۋ ماقساتىندا باسپانا «باسپانا حيت» جاڭا ءونىمىن ىسكە قوسادى. باستاپقى جارنا - 20% قۇرايدى، جىلدىق مولشەرلەمەسى – ۇلتتىق بانكتىڭ بازالىق مولشەرلەمەسى + 1،75%. نەسيە مەرزىمى 15 جىلعا دەيىن. قازىرگى ۋاقىتتا ۇلتتىق بانكتىڭ بازالىق مولشەرلەمەسى 9% قۇرايتىنىن ەسكەرە وتىرىپ، «باسپانا حيت» ءونىمىنىڭ جىلدىق باعامى 10،75% كولەمىنە ەسەپتەلگەن.
