ماڭعىستاۋدا  500- گە  جۋىق  وتباسى باسپانالى بولدى.

«نۇرلى جەر» مەملەكەتتىك باعدارلاماسى اياسىندا 500 وتباسىنا جاڭا پاتەرلەر كىلتتەرى سالتاناتتى تۇردە تابىستالدى. شاراعا ماڭعىستاۋ وبلىسىنىڭ اكىمى  ەرالى توعجانوۆ،  «قازاقستان يپوتەكالىق كومپانياسى» يۇ» اق باسقارما ءتوراعاسىنىڭ ورىنباسارى  رۋسلان كاكىم قاتىستى.

  قازاقستان يپوتەكالىق كومپانياسى اقتاۋ قالاسىنىڭ 55 جىلدىق مەرەكەسى قارساڭىندا كەزەكتە تۇرعان 478 وتباسىنا: 161 ءبىر بولمەلى، 237 ەكى بولمەلى  جانە 80 ءۇش بولمەلى پاتەر كىلتتەرىن تابىستادى. جاڭادان سالىنعان كوپ قاباتتى تۇرعىن ءۇيدىڭ جالپى اۋدانى  26 122،4 شارشى مەتر. پاتەرلەر تازا ارلەۋدەن وتكەن. ولاردىڭ بارلىعىندا  قاجەتتى كوممۋنيكاسيالار مەن گاز پليتاسى جانە سانتەحنيكا ورناتىلعان. جاڭا تۇرعىن ءۇي ەلباسى نۇرسۇلتان نازاربايەۆتىڭ «نۇرلى جەر» باعدارلاماسىنىڭ «ساتىپ الۋمەن جالعا بەرۋ» باعىتى اياسىندا جۇزەگە اسىپ وتىر.

  «نۇرلى جەر» باعدارلاماسى بويىنشا ەلىمىزدە 1،5 ميلليونعا جۋىق قولجەتىمدى تۇرعىن ءۇي سالۋ جوسپارلانعان. سونىمەن بىرگە سالىناتىن عيماراتتاردىڭ ساپاسىنا، ەكولوگيالىق تازالىعىنا جانە ەنەرگيالىق تيىمدىلىگىنە جوعارى تالاپ قويىلۋدا. وسىعان وراي ۇكىمەتكە، جەرگىلىكتى اتقارۋشى بيلىك ورگاندارىنا حالىقتى تۇرعىن ۇيمەن قامتاماسىز ەتۋ ءىسىن جەدەل ءارى ءتيىمدى جۇرگىزۋ بويىنشا ۇلكەن سالماق سالىنىپ، جاۋاپكەرشىلىك جۇكتەلدى. بۇكىل ەلىمىزدەگى سياقتى، ءقازىر بۇل باعىتتاعى ناقتى جۇمىستار اقتاۋ قالاسىندا دا ىسكە اسىرىلىپ جاتىر.اقتاۋ قالاسىنداعى جاڭا شاعىن اۋدانداردى يگەرۋ، بارلىق ينفراقۇرىلىمىمەن جاڭادان ۇيلەر تۇرعىزۋ، مۇنىڭ بارلىعى دا تۇپتەپ كەلگەندە الەۋمەتتىڭ الەۋەتىن ارتتىرۋعا باعىتتالعان جوسپارلى جۇمىستاردىڭ ناتيجەسى»،-دەدى ەرالى توعجانوۆ.

  اقتاۋ قالاسىندا «ساتىپ الۋمەن جالعا بەرۋ» باعىتى بويىنشا بۇگىنگە دەيىن جالپى اۋدانى 56664،9 شارشى مەتردى قۇرايتىن 986 پاتەرى پايدالانۋعا بەرىلدى. «قازاقستان يپوتەكالىق كومپانياسى ءۇشىن قازاقستاندىقتاردىڭ، ءبىرىنشى كەزەكتە، حالىقتىڭ ەڭ وسال توپتارى – كوپ بالالى جانە تولىق ەمەس وتباسىلاردىڭ، مۇمكىندىكتەرى شەكتەۋلى ادامداردىڭ، جەتىمدەردىڭ تۇرعىن ۇيگە قولجەتىمدىلىگىن ارتتىرۋ باسىمىراق. بۇل ەلباسىمىزدىڭ باستاماسىمەن جۇزەگە اسىرىلعان ءبىزدىڭ ورتاق ءىسىمىز. بىزگە جاۋاپتى ميسسيا جۇكتەلدى جانە ءبىز ورتاق كۇش-جىگەرىمىزدى بىرىكتىرە وتىرىپ، جوعارى ناتيجەلەرگە قول جەتكىزە الاتىنىمىزدى دالەلدەي الدىق»، -دەپ اتاپ ءوتتى رۋسلان كاكىم.