قوستاناي وبلىسى بيىلعى قىسقى جىلىتۋ ماۋسىمىنا دايىندىق جۇمىستارى اياقتالۋعا جاقىن.

الداعى ەكى اپتانىڭ ىشىندە قوستانايعا جىلۋ بەرۋ باستالادى. بيىلعى قىسقى جىلىتۋ ماۋسىمىنا دايىندىق جۇمىستارى اياقتالۋعا تاياۋ. تەك استىق جيناۋ ناۋقانىنا بايلانىستى ەلەكتر قۇرىلعىلارىنىڭ جوندەۋ جۇمىستارى عانا كەشەۋىلدەپ تۇر. وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى المات يسەنبايەۆتىڭ ايتۋىنشا، وڭىردەگى 102 جىلىتۋ قازاندىعى مەن 741 اۆتونومدى جىلىتۋ جۇيەسى ساقاداي ساي.

 «20 شاقىرىم جىلۋ جانە 115 شاقىرىم سۋ قۇبىرى مەن كارىز جەلىلەرى جوندەلدى. قوستانايداعى بارلىق ءبىلىم، دەنساۋلىق ساقتاۋ، الەۋمەتتىك نىسانى مەن 2643 كوپ قاباتتى تۇرعىن ءۇيى تولىق ءازىر. گيدراۆليكالىق سىناقتار كەزىندە جارىلعان جىلۋ قۇبىرلارىنداعى اقاۋلار قالپىنا كەلتىرىلدى. تەك قوستانايدىڭ التىنسارين كوشەسىندەگى جوندەۋ وسى اپتانىڭ سوڭعى جۇمىس كۇنىنە دەيىن اياقتالادى. دالاداعى اۋا تەمپەراتۋراسى ءۇش تاۋلىك بويى +10°س كورسەتسە، جىلۋ بەرىلەدى. ال قازىرگى ورتاشا تەمپەراتۋرا +13°س. سوندىقتان جىلۋ جەلىلەرىن ىسكە قوسا المايمىز»، - دەدى ا.يسەنبايەۆ.

 وبلىس اكىمى جىلىتۋ ماۋسىمى بارلىق اۋدان-قالالاردىڭ باسشىلارىنىڭ نازارىندا بولسىن دەدى. ءقازىر وڭىردە بيىلعى قىسقا 485،4 مىڭ توننا كومىر جاعىلادى دەپ جوسپارلانسا، ونىڭ 443 مىڭ تونناسى اكەلىندى. ال 63،7 مىڭ توننا كومىر حالىققا ساتىلماق. ارحيمەد مۇحامبەتوۆ قالعان تاسىمالداۋ جۇمىستارىن كەشەۋىلدەتپەۋدى تاپسىردى.

 «وبلىس ورتالىعىنان شالعاي اۋداندارعا كومىردىڭ ۋاقتىلى ءارى جەتكىلىكتى مولشەردە جەتكىزىلۋىن نازاردا ۇستاڭىزدار. وتىننىڭ ساپاسىن تەكسەرىپ، ءجىتى ءمان بەرىڭىزدەر. تاعى ءبىر ماسەلە، تۇرعىنداردىڭ جىلۋ-ەنەرگەتيكالىق مەكەمەگە وتكەن جىلدان قالعان بەرەشەگى ءالى بار. قارىزدى قايتارۋ جۇمىستارىن تەزدەتۋ كەرەك»، - دەدى ايماق باسشىسى.

 ايتا كەتۋ كەرەك، وبلىس ورتالىعىندا جىلۋعا قارىز 394 ملن تەڭگەدەن اسادى، بۇل كورسەتكىش وتكەن جىلعىعا قاراعاندا، 30 ملن-عا جۋىق تەڭگەگە ارتقان. ءجىتىقارا مەن ليساكوۆتىڭ ءارقايسىسىندا بەرەشەك 39 ملن-نان اسسا، اۋليەكول اۋدانى تۇرعىندارى 2،7، ال تاران اۋدانى 3،5 ملن تەڭگە قارىز بولىپ وتىر.