2019-2021 جىلدارى ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى بازاسىندا 3 بلوكتان تۇراتىن 2 467 ورىندىق جاتاقحانا سالىنادى. بۇل تۋرالى كەشە اتالمىش ۋنۆەرسيتەتتىڭ رەكتورى، ق ر ۇعا اكادەميگى ەرلان سىدىقوۆ ءداستۇرلى ەسەپ بەرۋ كەزدەسۋىندە ءمالىم ەتتى.

قازاقستان رەسپۋبليكاسىنىڭ پرەزيدەنتى، ۇلت كوشباسشىسى ن. نازاربايەۆ «قازاقستان-2050» ستراتەگياسى قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا «مەن جەرگىلىكتى باسقارۋدى دامىتۋ تۇجىرىمداماسىن بەكىتتىم. ول اۋىلدىق، سەلولىق دەڭگەيدە باسقارۋ سالاسىن ارتتىرۋعا مۇمكىندىك جاسايدى جانە ازاماتتاردىڭ جەرگىلىكتى ماڭىزى بار ماسەلەلەرگە قاتىسۋىن كەڭەيتەدى» دەپ اتاپ كورسەتكەن بولاتىن. ەلىنىڭ ەرتەڭىن ويلاعان ەلباسىنىڭ بۇل تۇجىرىمدى ءسوزىنىڭ ءتۇپ توركىنىن تەرەڭ تۇسىنگەن ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، ق ر ۇعا اكادەميگى ەرلان سىدىقوۆ بيىل دا العاشقى بولىپ ەل الدىندا ەسەپ بەردى.

ەۋرازيا ۇلتتىق ۋنيۆەرسيتەتىندە وتكەن ەسەپتى كەزدەسۋدە عىلىمي كەڭەس مۇشەلەرى، پروفەسسور-وقىتۋشىلار، سالا قىزمەتكەرلەرى جانە اتا-انالار مەن ستۋدەنت-جاستار رەكتوردىڭ 2017-2018 وقۋ جىلىندا اتقارعان جۇمىستارى مەن الداعى جوسپارىن تىڭدادى. 

ەسەپتى باياندامادا جىلدىڭ ءبىلىم جانە عىلىم سالاسىنداعى جەتىستىكتەرىنە باسا ءمان بەرىلدى. ەۇۋ مەملەكەتتىك باعدارلامالاردى ۇستانادى. وعان مىسال ەلباسىمىزدىڭ 2020 جىلعا دەيىنگى قويىلعان ماقساتتاردى ىسكە اسىرۋ ءۇشىن جاسالىپ جاتقان جۇمىستار.

جيىندا ايتىلعانداي، بيىل دا ەۋرازيا ۇلتتىق ۋنيۆەرسيتەتىندە ق ر پرەزيدەنتىنىڭ ستراتەگيالىق باعدارلامالارىن وقۋ ورنى كولەمىندە ىسكە اسىرۋ، پروفەسسور-وقىتۋشىلار مەن ستۋدەنتتەردىڭ الەۋمەتتىك جاعدايىن قامتامسىز ەتۋ، تۇرمىس جاعدايىنىڭ جاقسارۋىنا ىقپال ەتۋگە جۇيەلى جۇمىستار جۇرگىزىلە بەرمەك. ولاي دەيتىنىمىز، وتكەن جىلى ۋنيۆەرسيتەت رەكتورى ەرلان سىدىقوۆ ەلباسى قابىلداۋىندا بولعاندا، نۇرسۇلتان ءابىش ۇلى: «مەملەكەت پەن قوعامنىڭ بەرەكە-بىرلىگى، ءال-اۋقاتى مەن دامۋى جەتەكشى ۋنيۆەرسيتەتتەردىڭ ساپاسىنا تىكەلەي قاتىستى» دەپ، قاداۋ-قاداۋ تاپسىرما بەرگەن بولاتىن.

2017-2018 وقۋ جىلى ۋنيۆەرسيتەت وسى تاپسىرما ۇدەسىنەن شىعۋ ءۇشىن ەڭبەكتەنگەنى كورىنىپ تۇر. اسىرەسە ۇلت كوشباسشىسىنىڭ «رۋحاني جاڭعىرۋ: بولاشاققا باعدار» اتتى باعدارلامالىق ماقالاسى اياسىندا وتكەن جىلدا ۋنيۆەرسيتەت وسى ەلدىك-مەملەكەتشىلدىك باستامانىڭ جۋان ورتاسىندا ءجۇردى. ويتكەنى ۋنيۆەرسيتەت رەكتورىنا مەملەكەتتىك دەڭگەيدە وسى باعدارلامانىڭ «تۋعان جەر» باعىتىن باسقارۋ جۇكتەلىپ، ۋنيۆەرسيتەت – «رۋحاني جاڭعىرۋدىڭ» تۇتاستاي عىلىمي-ادىستەمەلىك الاڭىنا اينالدى. قازاقستاننىڭ ءتورت وڭىرىندە بولىپ، جاڭعىرۋ ءىس-شارالارىن جۇيەلەۋدى ۇيلەستىردى. ءتىپتى وسى باعدارلامانىڭ يۋنەسكو شتاب-پاتەرىندەگى (پاريج) تانىستىرىلىمىنا دا قاتىسىپ قايتتى.

ۋنيۆەرسيتەت عالىمدارى «الەمدىك 100 وقۋلىقتى اۋدارۋ»، «سيفرلى قازاقستان»، «قازاقى لاتىن ءقارپى» جوبالارىن ورىنداۋعا دا اتسالىسىپ كەلەدى.

بىلتىر ەكسپو حالىقارالىق كورمەسىن ۇيىمداستىرۋ مەن وتكىزۋدەگى ەۇۋ-دىڭ كەشەندى قىزمەتى ەلباسى، استانا اكىمى تاراپىنان جوعارى باعالانعانىن بىلەمىز.

«سىرت كوز – سىنشى» دەگەن، QS رەيتينگى بويىنشا ەۇۋ جاس جوو ىشىندە الەمدىك كوشباسشى توپ-50ء-دىڭ ىشىندە (46-ورىن). شىعىس ەۋروپا مەن ورتالىق ازيا ەلدەرىنىڭ «QS: EECA» ايماقتىق   رەيتينگىندە 24-ورىنعا كوتەرىلگەن. QS World University Ranking 2018 رەيتينگىندە توپ-400-دىكتە. QSء-تىڭ «فيزيكا جانە استرونوميا» باعىتىنداعى پاندىك رەيتينگىندە توپ-500-دىك ىشىندە.

عالىمدارىمىزدان سىلتەمە جاساۋ يندەكسى بويىنشا Webometrics «Transparent Ranking: Top Universities by Google Scholar Citations» رەيتينگىندە قازاقستان وقۋ ورىندارى ىشىندە كوش باستادى. تاياۋدا عانا «ەۇۋ اسا بەدەلدى الەمدىك Times Higher Education رەيتينگىنە ەندى» دەگەن تاعى ءبىر ءسۇيىنشى حابار الدى.

سونداي-اق ەۇۋ ءوز ەلىمىزدەگى باستى ۇلتتىق رەيتينگتە دە توپ باستاپ، 1، 2، 3 جۇلدەلى ورىندا تۇر. قالىپتاسقان اببريەۆياتۋرامەن ايتساق، نكاوكو مەن ناار، كاسىپكەرلەردىڭ «اتامەكەن» ۇلتتىق پالاتاسى وسىنداي باعا بەرگەن.

ينستيتۋسيونالدىق جانە ارنايى اككرەديتتەۋدەن ءوتۋ – ءومىر تالابى. 2017-2018 جىلى وقۋ ورنى باكالاۆريات، ماگيستراتۋرا، دوكتورانتۋرانىڭ 169 ءبىلىم باعدارلاماسىن اككرەديتتەۋدەن وتكىزدى. بۇل - 100 پايىز ءبىلىم باعدارلاماسىنىڭ 97 پايىزى دەگەن ءسوز.

30-عا جۋىق ءبىلىم باعدارلاماسى گەرمانيانىڭ ACQUIN جانە ASIIN اگەنتتىكتەرىنىڭ اككرەديتتەۋىنەن ءوتتى. ويتكەنى بىلىمدەگى ساپا – ۋنيۆەرسيتەتتىڭ العا قويعان باستى مىندەتى. وسى باعىتتا مينيسترلىكپەن جانە جەتەكشى جوو-لارمەن بىرىگىپ «اكادەميالىق ادالدىق ليگاسىن» قۇرعان.

ەڭ باستىسى، بيىل ەۋرازيا ۇلتتىق ۋنيۆەرسيتەتىنە 7 مىڭنان استام ءبىلىم الۋشى ءتۇستى. رەكوردتىق كورسەتكىش! ونىڭ 80 پايىزدان استامى – مەملەكەتتىك گرانت يەگەرلەرى. بۇل – ەل سەنىمى، جاستار سەنىمى.

ۋنيۆەرسيتەتتىڭ باستى مىندەتى – ءبىلىم بەرۋ. ءبىلىم بولعاندا دا ساپالى، جاڭا زامانعا لايىق، باسەكەگە قابىلەتتى ءبىلىم! سوندىقتاندا بولار، ءار اتا-انا ەۇۋ-دى وسى ءۇشىن دە تاڭدادى.

ۇلتتىق ۋنيۆەرسيتەتتەگى 13 فاكۋلتەت – الەۋەتتى باعىتتاردىڭ ارناسى. 2 مىڭ پروفەسسور-وقىتۋشى – جاستار قۋاتىنا دەم بەرۋشى تالىمگەرلەر. ولاردىڭ اراسىندا دابىسى الەمگە كەتكەن اكادەميكتەر، مەملەكەتتىك سىيلىقتىڭ جانە تمد سىيلىعىنىڭ يەگەرلەرى، مەملەكەت جانە قوعام قايراتكەرلەرى بار. ءبىرتۋار تۇلعالار وسى عيماراتتاردا ءدارىس وقيدى. 20 مىڭ ءبىلىم الۋشىنىڭ دەنى – «التىن بەلگى»، «قىزىل ديپلوم» يەگەرلەرى، وليمپيادا مەن سپورتتىق جارىستاردىڭ جەڭىمپازدارى، ءوز اۋىلى مەن ءوڭىرىنىڭ تالانتتارى مەن تالاپتىلارى.

گپيير دەپ قىسقارتىلىپ ايتىلاتىن مەملەكەتتىك يندۋستريالدىق-يننوۆاسيالىق دامۋ باعدارلاماسى ماماندارىن دا وسى وقۋ ورنى دايارلايدى. تالاپتى جاستار باكالاۆرياتتىڭ – 71، ماگيستراتۋرانىڭ – 68، دوكتورانتۋرانىڭ – 39 ماماندىعى بويىنشا ءبىلىم الىپ شىعادى. 22 بىرلەسكەن ءبىلىم باعدارلاماسى جۇزەگە اسىرىلۋدا. وسىنىڭ ناتيجەسىندە جاستار ەۇۋ مەن شەتەل ۋنيۆەرسيتەتىنىڭ قوس ديپلومىن الىپ شىعادى.

بيىل ۋنيۆەرسيتەت ءبىلىم ايدىنىنا «IT-مەنەدجمەنت»، «IT-اۋديت»، «ەكولوگيالىق اۋديت»، «ەسەپتەۋ لينگۆيستيكاسى»، «سيفرلىق كريميناليستيكا» سياقتى بۇرىن-سوڭدى بولماعان جانە ايرىقشا ماماندىقتاردى شىعاردى.

عىلىمي دەڭگەيى 70 پايىز: بۇل ساپتا 259 عىلىم دوكتورى، 665 عىلىم كانديداتى، 180 PhD ءدارىس بەرەدى. پرەزيدەنتتىڭ «بولاشاق» باعدارلاماسىنىڭ تۇلەكتەرى – 200. سونىمەن قاتار بيىل شەتەلدەن بىلىكتى 90 پروفەسسور شاقىرىلسا، 327 پروفەسسور-وقىتۋشىلارى شەت ەلدە بىلىم-بىلىگىن كوتەرىپ قايتتى.

ءبىلىم دە ءومىردىڭ ءوزى سەكىلدى: جاڭارىپ-جاڭعىرىپ تۇرادى. ەلباسى يننوۆاسيا جانە رۋحاني جاڭعىرۋ مىندەتىن العا قويعاندا، كەمەل كەلەشەككە باتىل كوز جىبەرگەنى انىق.

تاياۋدا استانا بولاشاعى تۋرالى دەرەكتى فيلمدە ۇلت كوشباسشىسى: «ءبىز استاناداعى جەتەكشى جوعارى وقۋ ورىندارىنا زور ءۇمىت ارتامىز» دەدى. ەۋرازيا ۇلتتىق ۋنيۆەرسيتەتى سول ءۇمىتتى اقتاۋ جولىندا، ياعني ەلگە قاجەتتى ءبىلىم مەن عىلىمدى جاڭعىرتۋ ۇستىندە.

ەۇۋ رەكتورى ەرلان سىدىقوۆتىڭ ەسەپتى بايانداماسىندا ستۋدەنتتەردىڭ الەۋمەتتىك-ازاماتتىق دامۋ جاعدايلارى ۇنەمى نازاردا ەكەنى باسا ايتىلدى. ەلباسىنىڭ «الەۋمەتتىك 5 باستاما» باعدارلاماسى زور سەرپىن بەرگەنى كورىنىپ تۇر. ءوز تاراپتارىنان دا قاراپ جاتپاي ءار جىلى كەمىندە ءبىر الەۋمەتتىك نىساندى ىسكە قوسىپ كەلگەن. مگۋ فيليالىنىڭ جاتاقحاناسى، №7 ستۋدەنتتەر ءۇيى ءتۇرلى ەكونوميكالىق قيىندىققا قاراماي ۋاقىتىندا تاپسىرىلعان.

«راس، جاتاقحانا بويىنشا ءبىرشاما پروبلەما بار. ونى ەلباسىعا دەيىنگى ەل تۇلعالارى ءبىلىپ وتىر. ءبارى بىرتە-بىرتە شەشىلەدى»، - دەيدى رەكتور ەرلان ءباتتاش ۇلى ەسەپتى بايانداماسىندا. قازىرگى 7 وقۋ-زەرتحانالىق عيماراتى، 7 ستۋدەنتتەر ءۇيى، جاس عالىمدار ءۇيى، «ەۋرازيا» سپورت كەشەنى، «تۇمار» سپورت-ساۋىقتىرۋ بازاسى، عىلىمي كىتاپحانا، ستارتاپ – ءبارى دە الەۋمەتتىك يگىلىكتەرى.

جاڭا № 7 ستۋدەنتتەر ۇيىندە جاستارعا ارنالعان كوۆوركينگ-ورتالىق اشىلىپ، سپورت ورتالىعى جوسپارلانىپ وتىر. مۇندا ۇتقىرلىق بايلانىسپەن كەلگەن شەتەلدىك ستۋدەنتتەر دە لايىقتى ورنالاستىرىلعان. بۇيىرسا، 2019-2021 جىلدارى 3 بلوكتان تۇراتىن 2467 ورىندىق جاتاقحانا قۇرىلىسىن باستاماق. بۇل – ەلباسى تاپسىرماسىن ورىنداۋدىڭ جولىنداعى جاۋاپتى ءىس-شارا.

تاعى ءبىر ايتا كەتەتىن جايت، ءبىلىم الۋشىلاردىڭ عىلىمي-زەرتتەۋ جۇمىسىن جۇرگىزۋىنە بارلىق قولايلى جاعداي تۋعىزىپ وتىر. جاڭا فورماتتاعى جاس عالىمدار كەڭەسى، ستۋدەنتتەردىڭ عىلىمي قوعامى بەلسەندى قىزمەت ەتۋدە. تۇڭعىش پرەزيدەنت قورىنىڭ بايقاۋىندا ەۇۋ-دىڭ جاس عالىمدار كەڭەسى رەسپۋبليكاداعى «ەڭ ۇزدىك كەڭەس» اتاعىن جەڭىپ العان.

ءتۇرلى عىلىم سالاسى بويىنشا باكالاۆريات، ماگيستراتۋرا، دوكتورانتۋرا ءبىلىم الۋشىلارىنىڭ رەسپۋبليكالىق بايقاۋىندا 2017 جىلى 48 عىلىمي جۇمىس، 2018 جىلى 39 عىلىمىي جۇمىس جەڭىمپاز دەپ تابىلعان. 400 ستۋدەنت حالىقارالىق جانە رەسپۋبليكالىق بايقاۋدا توپ جارسا، وتكەن وقۋ جىلى قۇرىلعان جاستاردىڭ بيزنەس-ينكۋباتورى 100 جوبانى كۇن تارتىبىنە شىعارىپ، 26-سىن جۇزەگە اسىرىپ ۇلگەردى. ءسويتىپ، 87 جاس ازاماتقا جۇمىس تاۋىپ بەردى. ولاردىڭ جاڭا 10 بيزنەس-جوباسى سىناق مەرزىمىنەن وتكەن.

ەۋرازيا ۇلتتىق ۋنيۆەرسيتەتى ءىت باعىتىنا ايرىقشا كوڭىل بولەدى، ويتكەنى «سيفرلىق قازاقستاننىڭ» ءماقسات-مانى دە وسىندا. «ەلەكتروندى ينجينيرينگ» زەرتحانا كەشەنى، «كيبەر قاۋىپسىزدىك» زەرتحاناسى، سوتسبي-گە (تەلەفون جۇيەلەرىنىڭ – اقپارات قورىنىڭ سەرتيفيكاسيالانعان قۇرىلعىسى) قاتىستى ينتەراكتيۆتى 2 زەرتحانا ءىزاشار جۇمىسىنا كىرىستى. سونداي-اق گپيير نەگىزىندە جاساقتالعان عىلىمي زەرتحانا اككرەديتتەۋدەن وتكەن.

ءار ۋنيۆەرسيتەت ءۇشىن كىتاپحانا – ءبىلىم مەن عىلىمنىڭ كىلتى. جاڭا زاماندا ونىڭ فورماتى دا، قىزمەت اياسى دا جاڭارعان. ەۇۋ كىتاپحاناسىنىڭ قورى 1.644.032 دانا كىتاپ. 2017 جىلى قوردىڭ جاڭارۋ كوەففيسيەنتى 26،4% ارتسا، الەمدىك بەدەلدى عىلىمي اقپارات، مۋلتيپاندىك عىلىمي دەرەك قورىنا ەنۋدىڭ جاڭا تەحنولوگيالىق نەگىزدەرى جۇزەگە اسىرىلعان.

شىعارماشىلىقتا شەك جوق. رەكتوردىڭ يدەياسىمەن ءىت ماماندىعىنىڭ ءبىر توپ ستۋدەنتى توعىزقۇمالاقتىڭ موبيلدىك قوسىمشاسىن ويلاپ تاۋىپ، الەمدىك بايقاۋلارعا جولداما الدى.

قازاق «جاقسىدا جاتتىق جوق» دەيدى.

ەۇۋ الەمنىڭ 52 ەلىنىڭ جوعارى وقۋ ورىندارىمەن، عىلىمي ۇيىمدارىمەن ىنتىماقتاستىق جونىندە 343 كەلىسىم-شارت جاساسقان. مۇنىڭ نەگىزگى ءمانى – اكادەميالىق ۇتقىرلىق، ماگيسترانت، دوكتورانت تاعىلىمداماسى، بىرىككەن عىلىمي زەرتتەۋلەر، پروفەسسورلار مەن توپ-مەنەدجەرلەر شاقىرۋ مەن الماسۋ.

مىسالى، وتكەن جىلى اكادەميالىق ۇتقىرلىق اياسىندا ەۋروپا، اقش، ازيا جانە تمد ەلدەرىنىڭ 19 جوعارى وقۋ ورنىنان 68 ءبىلىم الۋشىنى (باكالاۆريات – 57، ماگيستراتۋرا – 11) قابىلدادى.

2017-2018 وقۋ جىلى شىعىس اكادەميالىق ۇتقىرلىق باعدارلاماسى بويىنشا ەۇۋ-دىڭ 338 ءبىلىم الۋشىسى اقش، ەۋروپا، ازيا جانە تمد ەلدەرىنىڭ 71 جوعارى وقۋ ورنىنا ءبىلىم الۋعا اتتاندى. ونىڭ ىشىندە ق ر بعم قارجىلاندىراتىن باعدارلاما بويىنشا – 53، ەرازمۋس+ باعدارلاماسى بويىنشا – 26، Mevlana – 2، UGRAD – 1، ءوز ەسەبى بويىنشا – 219، جوعارى وقۋ ورنىنىڭ ەسەبىنەن – 5، قوس ديپلوم باعدارلاماسى بويىنشا – 28، JASSO – 1، ن.كەنجەبەكوۆ اتىنداعى ستيپەنديالىق باعدارلاما بويىنشا – 1، كورەي ۇكىمەتىنىڭ ستيپەندياسى بويىنشا – 1 ءبىلىم الۋشى دەڭگەيىن لايىقتى كوتەرىپ قايتتى.

وسى وقۋ جىلى وزبەكستان، موڭعوليا، قىرعىزستان، اۋعانستان، تاجىكستان، تۇركيا، يران، ليۆيا، سيريا، جۇڭگو، رەسەي جانە باسقا ەلدەردەن كەلگەن شەتەلدىك ستۋدەنتتەردىڭ جالپى سانى 574 ادامدى قۇرايدى.

قازاقستاندا ءبىلىم بەرۋ حابىن قالىپتاستىرۋ – ماڭىزدى شارا. وسى باعدارلامانى ورىنداۋ اياسىندا شەتەلدىك ستۋدەنتتەردىڭ سانى جىلدان-جىلعا ارتۋى ءتيىس. بۇل رەتتە شەتەل ۋنيۆەرسيتەتتەرىندە فيليال، وكىلدىك، مادەني ورتالىق اشۋ ورتاق ىسكە سەرپىن بەرەدى. ەۋرازيا ۇلتتىق ۋنيۆەرسيتەتى وتكەن جىلى قىتايدا، يراندا، تۇركيادا، بەلورۋسسيادا ءوز ورتالىعىن اشتى.

2017-2018 وقۋ جىلى ەۇۋ-دا اشىلعان دايىندىق ءبولىمى - ءبىلىم بەرۋ قىزمەتىنىڭ جاڭا باعىتى دەۋگە بولادى. بيىل تىڭداۋشىلار سانى 2 ەسەگە ءوستى. بۇل دا – جۇيەلى ەڭبەك پەن ساپالى ءبىلىمنىڭ ناتيجەسى.

«شەتەلدىك ستۋدەنتتەرىمىز ءالى-اق قازاقستاننىڭ، استانا مەن ەۋرازيا ۋنيۆەرسيتەتىنىڭ ادال دوسىنا، مادەني ەلشىسىنە اينالاتىنىنا سەنىمدىمىن»، -دەيدى ەرلان سىدىقوۆ.

عىلىمي-زەرتتەۋ – كەز كەلگەن ۋنيۆەرسيتەت ءۇشىن ايرىقشا باسىم باعىت. ونىڭ ۇستىنە ەۇۋ زەرتتەۋ ۋنيۆەرسيتەتى مارتەبەسىن الۋ جولىندا ەكەنى بەلگىلى. عالىمداردىڭ عىلىمي بەلسەندىلىگى، اسىرەسە جوعارى رەيتينگتى جۋرنالداردا ماقالا جاريالاۋى – الەمدىك ورتاق تالاپ.