«ازاماتتارعا ارنالعان ۇكىمەت» مەملەكەتتىك كورپوراسياسى ق ر ىشكى ىستەر مينيسترلىگىمەن بىرلەسىپ الماتى قالاسىندا ميگراسيالىق حالىققا قىزمەت كورسەتۋ ورتالىعىن اشتى.

قالادا جىلدىڭ باسىنان بەرى ميگراسيا باعىتى بويىنشا  50 مىڭنان اسا قىزمەت كورسەتىلگەن. ەندى ەڭبەك ميگرانتتارى مەملەكەتتىك قىزمەتتەردى حالىققا قىزمەت كورسەتۋ ورتالىقتارىنىڭ ستاندارتىنا ساي «ءبىر تەرەزە» قاعيداتى بويىنشا الا الادى.

بۇل - ەلىمىزدەگى كوشى-قون قىزمەتتەرىن كورسەتەتىن  ءۇشىنشى ورتالىق، العاشقىسى وسى جىلدىڭ باسىندا استانادا، ەكىنشىسى شىلدە ايىندا شىمكەنتتە  اشىلعان بولاتىن.

بۇرىن شەتەلدىكتەر جۇمىس ىستەۋگە رۇقسات الۋ ءۇشىن قاجەتتى قۇجاتتارىن راسىمدەپ، بىرنەشە كۇن جۇرەتىن. جسن الىپ، سالىق ماسەلەسىن شەشىپ، مەديسينالىق تەكسەرىستەن، داكتيلوسكوپيادان ءوتىپ، ساقتاندىرۋ انىقتاماسىنا قول جەتكىزۋ ءۇشىن بىرنەشە مەكەمەنى ارالاۋعا ءماجبۇر ەدى. ەندى شەتەلدىكتەر قۇجاتتاردى ءبىر جەردە، ءبىر ساعاتتىڭ ىشىندە راسىمدەۋ مۇمكىندىگىنە يە بولدى.

«ميگراسيالىق حقو-دا شەتەل ازاماتتارى مەملەكەتتىك قىزمەتتەردى بەلگىلەنگەن ۋاقىت ىشىندە رەگلامەنتكە ساي بيزنەس ءۇردىس جانە ەلەكتروندىق كەزەك ارقىلى ارنايى جابدىقتالعان جۇمىس ورىندارىندا الا الادى. بۇل ميگرانتتار ءۇشىن عانا ەمەس، جۇمىس بەرۋشى ءۇشىن دە وتە قولايلى. جاڭا ميگراسيالىق حقو جۇمىس بارىسىن جەڭىلدەتىپ قانا قويماي، سىبايلاس جەمقورلىق ارەكەتتەرىنىڭ الدىن-الۋعا جول اشادى»، - دەيدى «ازاماتتارعا ارنالعان ۇكىمەت» مەملەكەتتىك كورپوراسياسىنىڭ الماتى قالاسى بويىنشا فيليالىنىڭ ديرەكتورى عالىم قارقىنبايەۆ.

جاڭا فرونت-كەڭسە العاباس-1 ىقشاماۋدانى، «اتلەتيكالىق قالاشىقتا» اۋدانى 576 شارشى مەتر، زاماناۋي عيماراتتىڭ ەكىنشى قاباتىندا ورنالاسقان. ورتالىقتا مەملەكەتتىك كورپوراسيانىڭ 31 مامانى تاڭعى ساعات 09.00-دەن كەشكى ساعات 18.30-عا دەيىن، تۇسكى ءۇزىلىسسىز، كۇنىنە شامامەن 1،5 مىڭداي ازاماتقا قىزمەت كورسەتەدى. 

اعىمداعى جىلدىڭ قاڭتار ايىندا ق ر ۇكىمەتىندە وتكەن باسپا ءسوز قىزمەتىندە «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسشىسى ابىلايحان وسپانوۆ «ازاماتتارعا ارنالعان ۇكىمەت» مەملەكەتتىك كورپوراسياسى بيىل شاھاردا ءبىرىڭعاي كوشى-قون ماسەلەسىمەن اينالىساتىن حالىققا قىزمەت كورسەتۋ ورتالىعىن (حقكو)  اشاتىن بولادى دەپ مالەمدەگەن بولاتىن.

سونىڭ وزىندە مۇنداي حقكو ءقازىردىڭ وزىندە ەلوردامىز استانادا اشىلىپ ۇلگەرگەن. ەندىگى جەردە ونداي ورتالىقتى الماتىدا ىسە قوسىلدى.

وسىنى اتاپ وتكەن ا.وسپانوۆ ودان ءارى ءوز سوزىندە «ەندىگى جەردە كوشى-قون پوليسياسى اتقاراتىن بارلىق جۇمىستار وسى كوشى-قون حقكو-نان وتەتىن بولادى. وسى رەتتە ءبىز بۇل قىزمەتتى الدىن-الا وڭتايلاندىرۋ ماقساتىندا تەرەڭ تالداپ-تارا­زىلادىق. بۇل جۇمىستار الداعى ۋاقىتتا قازاقستان اۋماعىندا شەتەلدىك ازاماتتاردىڭ ءتۇرلى جاعدايمەن بولۋىن ايتارلىقتاي جەڭىلدەتپەكشى. وسىعان بايلانىستى، بۇرىن شەت ەل ازاماتىنان ەلىمىزدە جۇمىس ىستەۋگە رۇقسات الۋ ءۇشىن – الدىمەن جسن، سالىق ءوتىنىشى، ساقتاندىرۋ سەكىلدى ءتۇرلى قىزمەت­تەردەن ءتۇرلى قۇجاتتار تالاپ ەتىلەتىن بولسا، ەندىگى جەردە مامانداندىرىلعان حقكو-نىڭ ارقاسىندا ونىڭ ءبارىن «ءبىر تەرەزە» قاعيداتىمەن جۇزەگە اسىراتىن بولامىز»، – دەگەن ەدى.

ناتيجەسىندە، قازاقستانعا ءتۇرلى ماسەلەلەرمەن كەلگەن شەتەلدىكتەر ەلىمىزدە ءوز قالاۋىمەن ەمىن-ەركىن  جۇرە الاتىن بولادى.