ەكونوميكالىق زەرتتەۋ ينستيتۋتىنىڭ الەۋمەتتىك-دەموگرافيالىق دامۋدى زەرتتەۋ ورتالىعىنىڭ ديرەكتورى باتجان اقمولدينا قازاقستاندىق قوعامداعى دەموگرافيالىق تەندەنسيا تۋرالى ايتىپ بەردى.

«ءبىز بالا تۋۋ مەن ءولىم-جىتىمى جوعارى كورسەتكىشكە يە ەلدەن بالا تۋۋ مەن ءولىم-جىتىمى تومەن كورسەتكىشكە يە ەلگە اينالىپ كەلەمىز. بۇل دەموگرافيالىق اۋىسىم دەپ اتالادى. دامىعان ەلدەر 50-60 جىل بۇرىن باسىپ كەتكەن الەمدىك تەندەنسيا ءبىزدىڭ ەلدە جىل ساناپ ايقىن بايقالۋدا. بىزدە ءداستۇرلى بالا تۋۋ كورسەتكىشىنىڭ تومەندەۋىمەن بۇل پروسەسس انىق بايقالادى. ساۋالناما جۇرگىزىپ، جاستاردان قانشا بالالى وتباسى بولعىڭ كەلەدى دەپ سۇراعانىمىزدا، جارتىسىنان كوبى 2-3 بالا دەپ جاۋاپ بەرەدى. ودان ارتىق بالا تابۋدى ءجون كورمەيدى»، - دەدى ول استانادا وتكەن «قازاقستاندىق قوعامدى جاڭعىرتۋ پروسەسىندەگى وتباسىنىڭ ءرولى» اتتى دوڭگەلەك ۇستەل وتىرىسىنىڭ الدىندا.

ساراپشىنىڭ ايتۋىنشا، بۇعان الەۋمەتتىك-ەكونوميكالىق فاكتورلار سەبەپ بولىپ وتىر.

«ادامدارعا: «بالا سانىن جوسپارلاۋ كەزىندە ماتەريالدىق جاعداي ەسەپكە الىنۋى كەرەك پە؟» دەگەن سۇراق قويىلدى. ساۋالناماعا قاتىسۋشىلاردىڭ 83 پايىزى بۇل سۇراققا «ءيا» دەپ جاۋاپ بەرىپ وتىر. دەمەك، ءبىز ءداستۇرلى قالىپتان اۋىتقىپ بارامىز. ءبىز ءداستۇردى ۇستانعان ازيالىق مەملەكەت بولعانىمىزعا قاراماستان، دەموگرافيالىق اۋىسىمنىڭ تەندەنسياسى بىزدە ايقىن بايقالىپ كەلەدى»، - دەيدى ول.

باتجان اقمولدينا سونىمەن قاتار، قازاقستاندا جاستاردىڭ اجىراسۋ جاعدايى كورشىلەس ەلدەردەن قاراعاندا كوپ ەكەنىن اتاپ ءوتتى.

«تمد ەلدەرىنىڭ ىشىندە وزبەكستان، تاجىكستان سەكىلدى مەملەكەتتەردەي نەكەگە تۇرۋ كورسەتكىشى بىزدە جوعارى بولعانىمەن، ول ەلدەرمەن سالىستىرعاندا قازاقستاندا اجىراسۋ جاعدايى كوپ كەزدەسەدى. دەمەك، بىزدە وتباسى ينستيتۋتى داستۇردەن تىس تەگەۋرىندەرگە تاپ بولعان. اجىراسۋ جاعدايلارىنىڭ كوپ بولعانى - دەموگرافيالىق اۋىسىمعا دا وزىندىك اسەرىن تيگىزىپ جاتىر»، - دەيدى ول.