قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسى ءوتتى.

وتىرىستى اشقان گ.ءابدىقالىقوۆا مەملەكەت باسشىسى نۇرسۇلتان نازاربايەۆتىڭ: «كۇن ساناپ وزگەرىپ جاتقان ءدۇبىرلى دۇنيەدە سانا-سەزىمىمىز بەن دۇنيەتانىمىمىزعا ابدەن ءسىڭىپ قالعان تاپتاۋرىن قاعيدالاردان ارىلماساق، كوش باسىنداعى ەلدەرمەن تەرەزەمىزدى تەڭەپ، يىق ءتۇيىستىرۋ مۇمكىن ەمەس. وزگەرۋ ءۇشىن ءوزىمىزدى مىقتاپ قولعا الىپ، زامان اعىمىنا يكەمدەلۋ ارقىلى جاڭا ءداۋىردىڭ جاعىمدى جاقتارىن بويعا ءسىڭىرۋىمىز كەرەك»، - دەگەن سوزىنە باسا نازار اۋداردى.

مەملەكەتتىك حاتشى «رۋحاني جاڭعىرۋ»، «پرەزيدەنتتىڭ بەس الەۋمەتتىك باستاماسى» باعدارلامالارى قوعامدىق سانانى جاڭعىرتۋعا جانە ءومىر ءسۇرۋ ساپاسىن ارتتىرۋعا باعىتتالعانىن اتاپ ءوتتى. بۇل تۇرعىدا وسكەلەڭ ۇرپاقتىڭ رۋحاني-ادامگەرشىلىك قاسيەتتەرىن دامىتۋ جانە ولاردىڭ قۇقىقتارى مەن زاڭدى مۇددەلەرىن قامتاماسىز ەتۋ ماسەلەلەرى ەرەكشە مانگە يە بولىپ وتىر.

ءبىلىم جانە عىلىم مينيسترلىگىنىڭ اقپاراتى بويىنشا، قازاقستاندا بالالاردىڭ قۇقىقتارى مەن مۇددەلەرىن قامتاماسىز ەتۋ ءۇشىن ينستيتۋسيونالدىق نەگىز قۇرىلعان. بۇل رەتتە 15 حالىقارالىق قۇجات راتيفيكاسيالاندى، بالالار قۇقىقتارى جونىندە ۋاكىل ينستيتۋتى، بالالاردىڭ قۇقىقتارىن قورعاۋ كوميتەتى، قيىن احۋالداعى بالالارعا قولداۋ كورسەتۋ ورتالىقتارى جۇمىس ىستەۋدە.

پيلوتتىق جوبا رەتىندە 71 ءبىلىم بەرۋ ۇيىمىندا «ءوزىن-وزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ ينتەگراسيالاۋ مودەلى جۇزەگە اسىرىلۋدا. باس پروكۋراتۋرامەن بىرلەسە وتىرىپ، كامەلەتكە تولماعاندار اراسىنداعى زورلىق-زومبىلىقتىڭ الدىن الۋعا باعىتتالعان «بالالاردى بىرگە قورعايمىز» اتتى جول كارتاسى ىسكە اسۋدا. بۇگىندە مەكتەپتەردە 8362 پسيحولوگ، 4268 الەۋمەتتىك پەداگوگ، 2177 پوليسيا ينسپەكتورى جۇمىس ىستەيدى.

دەنساۋلىق ساقتاۋ مينيسترلىگىنىڭ اقپاراتىنا سايكەس، قازاقستاننىڭ 2030 جىلعا دەيىنگى وتباسىلىق جانە گەندەرلىك ساياساتى تۇجىرىمداماسىن ىسكە اسىرۋ ماقساتىمەن ازاماتتاردىڭ رەپرودۋكتيۆتى دەنساۋلىعىن نىعايتۋ جانە انا مەن بالا دەنساۋلىعىن قورعاۋ جونىندە جۇيەلى شارالار قابىلدانۋدا. ناتيجەسىندە، 2017 جىلى انا ءولىمىنىڭ دەڭگەيى 1،5 پايىزعا، بالالار ءولىمى 7 پايىزعا تومەندەدى. وڭىرلەردە 60 ۇكىمەتتىك ەمەس ۇيىمنىڭ قاتىسۋىمەن وتباسىن جوسپارلاۋ، انا مەن بالا دەنساۋلىعىن قورعاۋ بويىنشا 112 الەۋمەتتىك جوبا ىسكە اسىرىلدى. 5 جاسقا دەيىنگى بالالارعا پاتروناجدىق پروفيلاكتيكالىق باقىلاۋ جۇرگىزىلىپ، 600-دەن استام بالالار دەنساۋلىعى بولمەلەرى ۇيىمداستىرىلدى. جاستار دەنساۋلىعىنىڭ 81 ورتالىعىندا 125 مىڭنان اسا ادامعا رەپرودۋكتيۆتىك دەنساۋلىقتى ساقتاۋ ماسەلەلەرى بويىنشا كونسۋلتاسيالىق، زاڭ جانە مەديسينالىق-پسيحولوگيالىق كومەك كورسەتىلدى.

وتىرىس سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا مەملەكەتتىك ورگاندارعا ءبىرقاتار ناقتى تاپسىرما بەردى.