قازاقستان پرەزيدەنتى نۇرسۇلتان نازاربايەۆ "قازاقستان ۇلتتىق قاۋىپسىزدىكتى قامتاماسىز ەتۋ مەن ءدىني ەركىندىكتى قورعاۋدى تەڭدەي اتقارىپ وتىرعانىن" مالىمدەدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. بۇل تۋرالى پرەزيدەنت استانادا اشىلعان الەمدىك جانە ءداستۇرلى دىندەر جەتەكشىلەرىنىڭ 6- قۇرىلتايىنىڭ اشىلۋ سالتاناتىندا ايتتى.

"ازاماتتارىمىزدىڭ كوپشىلىگى ءوزىن مۇسىلمان ساناعانىمەن، ول باسقا دىندەردىڭ ەركىندىگىنە كەدەرگى كەلتىرمەيدى. سىزدەر بۇنى ءتۇرلى دىندەردىڭ حرامدارى سالىنعان جانە ادامدار قۇلشىلىق جاساۋعا ەركىن بارا الاتىن استانامىزدى ارالاپ كورۋلەرىڭىزگە بولادى" دەدى نازاربايەۆ.

قازاقستان پرەزيدەنتى ەلدە 18 ءدىني كونفەسسيا مەن 3،5 مىڭنان استام ءدىني سۋبەكت تىركەلگەنىن ايتىپ، "كونفەسسياارالىق بەيبىتشىلىك پەن كەلىسىمنىڭ قازاقستاندىق مودەلى قالىپتاسقانىن" جەتكىزدى.

اقش مەملەكەتتىك دەپارتامەنتى 19 قىركۇيەكتە جاريالاعان تەرروريزم تۋرالى جىل سايىنعى ەسەبىندە قازاقستاندا تەرروريزمگە قارسى ءىس-قيمىل تۋرالى نورماتيۆتىك-قۇقىقتىق بازا جەتكىلىكتى ەكەنىن جانە ەل بيلىگى "ەكسترەميزممەن" كۇرەس ماقساتىندا ءدىني ازشىلىق توپتار مەن مۇسىلمانداردىڭ ءدىن ۇستانۋ قۇقىقتارىن شەكتەيتىنىن مالىمدەگەن.

قۇرىلتايعا 46 ەلدەن 82 دەلەگاسيا، ونىڭ ىشىندە الەمدىك جانە ءداستۇرلى ءدىني كونفەسسيالار مەن دىندەر جەتەكشىلەرى، ساياساتكەرلەر، حالىقارالىق ۇيىمداردىڭ وكىلدەرى كەلدى. قۇرىلتايدا ەكى پلەنارلىق سەسسيا جانە ءتورت سەكسيا بويىنشا وتىرىس وتەدى. سەكسيا جيىندارىندا قۇبىلمالى گەوساياساتتاعى ءدىن، ادامزاتتى بىرىكتىرۋدەگى جاڭا مۇمكىندىكتەر، ءدىن جانە جاھاندانۋ، ەكسترەميزم مەن تەرروريزمنىڭ الدىن الۋدا ءدىني جانە ساياسي قايراتكەرلەردىڭ ءرولى دەگەن تاقىرىپتاردا تالقىلاۋ بولادى.