الماتىدا استانانىڭ كۇندەرى اۋقىمدى تويلانىپ جاتىر. ونىڭ اياسىندا جوسپارلانعان شارالار 19 قىركۇيەكتە باستالعان. الداعى دەمالىس كۇندەرى قىزىقتى قويىلىم، كونسەرت جانە كورمەلەر وتەدى.

استانا كۇنى اياسىندا وتكەن العاشقى شارالاردىڭ ءبىرى – «ءازىل الەمى» ءازىل-سىقاق تەاترىنىڭ كونسەرتى. ارتىستەر قويىلىمدا ومىردەن الىنعان شىنايى ازىلدەر، ونىڭ ىشىندە اۋىلداعى اعايىن، ەرلى-زايىپتىلار اراسىندا كەزدەسەتىن ءتۇرلى جايتتار، قالالىقتاردىڭ ءومىرى سىندى تاقىرىپتاعى سىقاق اڭگىمەلەردى ايتىپ، ساحنالادى.

بۇدان بولەك، اشىق اسپان استىندا ەڭ العاش رەت «Open Air» اتتى «فورمات» توبى مەن ءانشى قايرات باەكەنوۆتىڭ جەكە شىعارماشىلىق كونسەرتى وتەدى دەپ كۇتىلۋدە. ول دەمالىس كۇنى «استانا» الاڭىندا ساعات 19:00 دە باستالادى.

«الماتىعا الىپ كەلگەن باعدارلامامىز وتە اۋقىمدى. تەك كونسەرتتەر ەمەس، تەاترلانعان قويىلىمدار دا كورسەتپەكپىز. اتاپ ايتقاندا، ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، م.گوركيي اتىنداعى مەملەكەتتىك ورىس دراما تەاترى، جاستار تەاترى، قۋىرشاق تەاترلارى الماتىعا كەلىپ، جەرگىلىكتى تۇرعىندارعا ونەرلەرىن كورسەتەتىن بولادى»، – دەيدى استانا قالالىق مادەنيەت جانە سپورت باسقارماسى باسشىسىنىڭ ورىنباسارى ناريما ابىل قىزى.

ءابىلحان قاستەيەۆ اتىنداعى ونەر مۇراجايىندا وتاندىق جانە شەتەلدىك سۋرەتشىلەردىڭ ەڭبەكتەرى ۇسىنىلعان «شەكارا» كورمەسى اشىلدى. مۇندا ەۋروپا مەن ازيانىڭ 11 ەلىنىڭ 16 قالاسىنان كەلگەن شەبەرلەردىڭ جۇمىستارى قويىلعان. ەرەكشە تۋىندىلار اراسىندا ءان سالۋعا، كينو كورۋگە جانە ەستەلىككە ورامال الۋعا بولادى. تۋىندىلار مۋزەيدىڭ بارلىق زالىن الىپ جاتىر. 20-دان استام ەڭبەك بۇعان دەيىن رەسەيدىڭ سانكت-پەتەربۋرگ، كراسنويارسك، كييەۆ، مينسك جانە دورتمۋند قالالارىندا كوپشىلىك نازارىنا ۇسىنىلعان.  

«ەلىمىزدىڭ اتىنان بىرنەشە سۋرەتشى ءوز جۇمىستارىن ۇسىنىپ وتىر. سونىڭ ىشىندە ساۋلە دۇيسەنبينا، ول ەۋروپا ستيليستيكاسىن قولدانا وتىرىپ، ءتۇرلى ءتۇسقاعازداردى جاساعان. تەماتيكاسى – ۇلتتىق. وسى ارقىلى ەۋروپا مەن ازيانى بىرىكتىرىپ وتىر. ودان بولەك، ءازىربايجاننان كەلگەن سۋرەتشى فارحاد فارزالييەۆ «مۋگام-كاراوكە» ەڭبەگىن ۇسىنعان. بۇل جوبا اياسىندا ءجۇز جىلدان اسا تاريحى بار ۇلتتىق مۋزىكا جاڭا تەحنولوگيا ارقىلى جاڭعىرتىلىپ وتىر»، – دەيدى ءا.قاستەيەۆ اتىنداعى ونەر مۇراجايىنىڭ باسپا ءسوز قىزمەتى جەتەكشىسى كلارا يسابايەۆا.

ال، جەكسەنبى كۇنى مەدەۋ شاتقالىندا «مەدەۋ» باسپالداق شاراسى وتپەك. وعان كەز كەلگەن ازامات قاتىسا الادى. بۇقارالىق شارانىڭ ەڭ كىشى جانە ەڭ جاسى ۇلكەن قاتىسۋشىلارى 100 باسپالداقتا سىنعا تۇسەدى. بۇدان بولەك جاس ەرەكشەلىگىنە بايلانىستى تاعى 5 كەزەڭ بار. ەڭ مىقتىلارى 841 باسپالداقتى ەڭسەرۋى قاجەت.