الماتى تۇرعىندارىن مەديسينا ۇيىمدارىنا تىركەۋ ناۋقانى باستالدى. جىل سايىنعى ناۋقان 15 قىركۇيەكتەن باستاپ، 15 قاراشاعا دەيىن جالعاسادى. ازاماتتار «مەديسينالىق ساقتاندىرۋ قورىنىڭ» «حالىقتىق باقىلاۋ» ءموبيلدى قوسىمشاسى ارقىلى كلينيكالارمەن تانىسىپ، وزىندىك تاڭداۋ جاساي الادى. 

«بيىلعى جىلى تىركەلۋ بارىسىندا 1 دارىگەرگە تۇسەتىن جۇكتەمە 1700 ادامنان اسپاۋى ءتيىس. بۇرىن بىزدە 1 دارىگەرگە 2 مىڭ ادامعا دەيىن قىزمەت كورسەتۋگە رۇقسات بەرىلگەن بولاتىن. بىزدىڭشە، بۇل جاڭا ۋچاسكەلەردىڭ اشىلۋىنا تۇرتكى بولۋى ءتيىس جانە بۇل ماسەلەدە بيزنەس وكىلدەرى، جەكە بيزنەس وكىلدەرى وزدەرىنىڭ بەلسەندىلىگىن تانىتادى دەپ كۇتىپ وتىرمىز»، – دەدى «الەۋمەتتىك مەديسينالىق ساقتاندىرۋ قورى» الماتى قالالىق فيليالىنىڭ ديرەكتورى تىلەۋحان ابىلدايەۆ.

الماتى تۇرعىندارىنا 77 ەمدەۋ مەكەمەسى قىزمەت كورسەتەدى. ونىڭ ىشىندە، 7 كومپانيا العاش رەت قاتىسىپ وتىر. ءتىپتى، ارالارىندا جەكەمەنشىك كلينيكالار دا بار. ولار تىركەلگەندەر ءۇشىن تەگىن قىزمەت كورسەتەدى. ماماندار تاڭداۋ جاساۋ بارىسىندا ۇيگە جاقىن ماڭداعى ەمحانانى تاڭداۋعا جانە وتباسىلىق قىزمەت كورسەتۋ ۇستانىمدارىنا باسىمدىق بەرۋگە شاقىردى. ەرىكتى مەديسينالىق ساقتاندىرۋ ءپوليسى بار ازاماتتار قازاقستان اۋماعىنداعى ەمحانالار جەلىسىنە تىركەلىپ، كەز كەلگەن قىزمەتكە جۇگىنە الادى.