الماتىدا جىلىتۋ ماۋسىمىنا دايىندىق اياقتالۋدا. قازىرگى تاڭدا كوشەلەردەگى جوندەۋ جۇمىستارى ءبىتىپ، قازىلعان جولدار تەگىستەلىپ جاتىر. الماتى جىلۋ جۇيەلەرى مەكەمەسى قۇبىرلاردى جاڭارتۋدى قىركۇيەك ايىندا بىتىردىك دەپ وتىر. ونىڭ ۇستىنە، بيىل ىسىنە سالعىرت قاراعان مەردىگەر مەكەمەلەر بولماپتى.  سوندىقتان، جىلۋ كەشىكپەي بەرىلەدى دەپ سەندىردى ماماندار.    

الماتى جىلۋ ماۋسىمىنا ساقاداي ساي. ماماندار بيىل دا جاز بويى توت باسقان كوممۋنالدىق جەلىلەردى جاڭارتىپ ۇلگەرگەن. ءقازىر ولار ىسكە قوسىلىپ، قالىپتى رەجيمدە جۇمىس ىستەپ جاتىر. سونداي-اق، قۇبىرلار گيدراۆليكالىق سىناقتان وتكىزىلىپ، كەتكەن كەمشىلىكتەر تولىقتاي قالىپقا كەلتىرىلدى. ەنەرگەتيكا كەشەنى كومىر مەن مازۋتتىڭ اپاتتى جاعدايداعى قورىمەن تولىق قامتاماسىز ەتىلگەن.

«وتىن-ەنەرگەتيكا كەشەنىنىڭ كاسىپورىندارى 96 پايىزعا دايىن. قالاداعى «الماتىجىلۋكوممۋنەنەرگو» مەكەمەسىنىڭ جوندەۋدەن شىققان 78 دانا جىلۋ قازاندىعى بۇگىندە 100 پايىزعا دايىن بولدى. سونىمەن قاتار، مازۋت جانە جىل سوڭىنا دەيىن كوگىلدىر وتىن تاسۋعا كەلىسىم-شارت قويىلعان. قوس جىلۋ ەلەكتر ستانسياسى جانە الماتى جىلۋ جۇيەلەرىنىڭ باتىس جىلۋ كەشەنىندەگى دايىندىعى 80 پايىزعا اياقتالدى. كەستەلەر، قاجەتتى قۇرال-جابدىقتار قۇرامى دا جىلۋ ماۋسىمىنا دايىن»، – دەدى الماتى قالاسى ەنەرگەتيكا جانە كوممۋنالدىق شارۋاشىلىق باسقارماسى باسشىسىنىڭ ورىنباسارى ەربولات امانعالييەۆ.

بيىل 12 شاقىرىم جىلۋ جەلىسى، 23 كيلومەتر ەلەكتر جەلىسى، 300 شاقىرىمعا جۋىق سۋ جانە 267 كيلومەتر كارىز جۇيەسى قايتا جاسالعان. حالىقتى جىلۋمەن قامتيتىن ماماندار الدىمەن الەۋمەتتىك نىسانداردىڭ دايىندىعىن پىسىقتاپ جاتىر.

«كوپ قاباتتى تۇرعىن ۇيلەر، الەۋمەتتىك نىساندار، ياعني دەنساۋلىق ساقتاۋ جانە ءبىلىم بەرۋ مەكەمەلەرى بۇگىنگى تاڭدا جىلۋ ماۋسىمىنا 100 پايىزعا دايىن دەپ سەنىممەن ايتا الامىز. دايىندىقتارىن دالەلدەيتىن اكتىنى قولدارىنا الدى»، – دەدى ەربولات امانعالييەۆ.

ماماندار جىلۋ بەرىلەر كەزدە اۋا تەمپەراتۋراسى ەسكەرىلەتىنىن ايتادى. جىلۋ بيىل دا جىلداعىداي قازان ايىنىڭ ورتاسىندا جىبەرىلۋى بەك مۇمكىن.