الماتىدا العاش رەت ۇيىمداستىرىلىپ وتىرعان «الاتاۋ الابىندا» اتتى حالىقارالىق ءداستۇرلى ونەر فەستيۆالى ءوز مارەسىنە جەتتى. تۇركى ەلدەرىنەن جينالعان ونەرپازدار كەشە اباي اتىنداعى وپەرا جانە بالەت تەاترىنان باستاپ، پانفيلوۆ، جىبەك جولى كوشەلەرىن انگە بولەپ، قالا تۇرعىندارىنىڭ كوڭىلىن كوتەرگەن بولاتىن. «الاتاۋ ءداستۇرلى ونەر تەاترىندا» تۇركى حالىقتارى ونەر شەبەرلەرىنىڭ قاتىسۋىمەن گالا-كونسەرت ءوتتى.

گالا كونسەرتكە جينالعانداردىڭ قاراسى قالىڭ. وسىدان ءبىر ساعات بۇرىن باستالعان شارادا تۇركى ەلدەرىنەن جينالعان جىرشىلار ونەر كورسەتىپ ۇلگەردى. مۇندا تۇركى حالىقتارىنىڭ ءداستۇرلى اندەرى مەن جىرلارى، سونىمەن قاتار، كۇيلەرى دە ءتۇرلى اسپاپتا ورىندالىپ جاتىر. فەستيۆالدىڭ ەرەكشەلىگى – ونەرپازدار تۋىندىلاردى كومەيمەن ايتادى. سونداي-اق، ءار ەلدىڭ جىراۋلىق-جىرشىلىق ءداستۇرىنىڭ ماقامدارىمەن ورىنداۋدا. فەستيۆالگە قاتىسۋشىلار دا وزدەرىنىڭ العان اسەرلەرىمەن ءبولىستى.

«الاتاۋ الابىندا» اتتى فەستيۆال قالا كۇنىنە ارنايى وتكىزىلىپ وتىرعان شارا. مەرەكەلىك كونسەرتتە تۇركيا، ازەربايجان، وزبەكستان، سولتۇستىك كيپر، تاتارستان، تاۋلى التاي، حاكاسيا جانە تىۆا سىندى 11 ەلدەن بارلىعى 16 جىرشى ونەر كورسەتۋدە. ۇيىمداستىرۋشىلار فەستيۆالدىڭ تۇركى ەلدەرىن جاقىنداستىرىپ قانا قويماي، قازاق دالاسىنداعى ءداستۇرلى ونەردى وزگە تۇركى ەلدەرىنە كەڭىنەن تانىستىرۋعا مۇمكىندىك بەرەتىنىن ايتادى.

ەسكە سالايىق، اتالعان فەستيۆال ەلىمىزدە العاش رەت ءوتتى. شارانى «الاتاۋ» ءداستۇرلى ونەر تەاترى مەن «تۇركسوي» حالىقارالىق ۇيىمى بىرلەسە ۇيىمداستىرعان. مۇنداي تۇركى ەلدەرىنىڭ ءداستۇرلى ونەرىن ءدۇيىم جۇرتقا دارىپتەيتىن شارا الداعى ۋاقىتتا دا الماتىدا كوپتەپ وتكىزىلمەك.