الماتىدا ەندى كينو ءتۇسىرۋ وڭايىراق بولادى. جىل سوڭىنا دەيىن شاھاردا قۇرىلاتىن ارنايى كوميسسيا كينوپروديۋسەرلەرمەن تىكەلەي جۇمىس ىستەپ، قالاداعى كينوتۇسىرىلىمدەردى ۇيىمداستىرىپ بەرۋمەن اينالىسادى.

گولليۆۋد ماماندارى تۇسىرگەن The Lord of the Rings (ۆلاستەلين كولەس) تريلوگياسىن كورمەگەن جان بۇگىندە وتە از دەپ سەنىممەن ايتۋعا بولادى. فيلم پروكاتتان 3 ملرد دوللارعا جۋىق تابىس تاپقان. ال، الەم تۇرعىندارىنىڭ كوبى جاڭا زەلانديانىڭ سۇلۋلىعىن وسى فيلم ارقىلى ءتانىپ-بىلدى. ميلليونداعان ادام كينونىڭ ءتۇسىرىلىمى بولعان جەرگە جىل سايىن اعىلىپ جاتىر. ماسەلەن، تۋىندى جارىق كورگەننەن كەيىن جاڭا زەلاندياعا باراتىن تۋريستەر سانى 40 پايىزعا ارتقان. وندا فيلمدە قولدانىلعان دەكوراسيالار قاز-قالپىندا ساقتاۋلى تۇر.

الماتى اكىمدىگى كينوماركەتينگ سالاسىن بىزدە دە دامىتۋدى قولعا الدى. ەندى مەگاپوليستە ارنايى كوميسسيا قۇرىلماق. ولار كينوپروديۋسەرلەرمەن بىرلەسە جۇمىس ىستەيدى. ياعني، ءتۇسىرىلىمدى ۇيىمداستىرۋعا كومەكتەسەدى. ماسەلەن، قالاداعى تاريحي ورىنداردا ءتۇسىرىلىم جاساۋعا، ۋاقىتشا كوشەنىڭ بەلگىلى ءبىر بولىگىن جابۋعا سەپتەسەدى. كوميسسيا ءبىر تەرەزە قاعيداسى بويىنشا جۇمىس ىستەمەك.      

«مىسالى، مەن پروديۋسەر رەتىندە الماتىدا فيلم تۇسىرگىم كەلدى. ول ءۇشىن الدىمەن كينوكوميسسياعا تولىق سەناريدى كورسەتەمىن. قالادا ناقتى نە كەرەكتىگىن تۇسىندىرەمىن. سودان كەيىن ول ۇيىم جاۋاپتى دەپارتامەنتپەن كەلىسىم جۇرگىزەدى. ءبىز الدىمەن ۋاقىتتى ۇنەمدەيمىز. ءار ورگانعا، مەكەمەگە ءوتىنىش حات جازۋدىڭ دا قاجەتى بولمايدى»، - دەيدى پروديۋسەر ەرنار قۇرماشيەۆ.

بۇل جۇمىستاردىڭ بارلىعىن «الماتى فيلم» كوميسسياسى ىستەيدى. مامانداردىڭ ايتۋىنشا، كينوپروديۋسەرلەرگە جاردەمدەسەتىن ۇيىمدار الەمنىڭ 40-قا جۋىق ەلىندە بار ەكەن.  

«فيلم ءتۇسىرۋ بارىسىندا ۋاقىت وتە قىمبات. ال، ۇيىمداستىرۋ ماسەلەسى تەز شەشىلىپ وتىرسا، ول بىزگە ۇلكەن كومەك بولادى. نەگىزى پروديۋسەرلەردىڭ جاعدايىن جاسايتىن ۇيىم جاس رەجيسسەرلەردى قولداۋمەن قاتار، قالانى جارنامالاۋعا ۇلكەن مۇمكىندىك تۋعىزادى»، - دەيدى امەريكالىق پروديۋسەر دريۋ فەلمەن.

«الماتى فيلم» كوميسسياسى تۇسىرىلىمدەردى ۇيىمداستىرىپ قانا قويماي، قالانىڭ ءيميدجىن كوتەرۋمەن دە اينالىسادى. كينوگەرلەردىڭ سوزىنشە، قالادا ءتۇرلى جانردا كينو تۇسىرۋگە تولىق مۇمكىندىك بار.

«پروديۋسەرلەر وسى قالاعا كەلىپ، قۇنى 100 ميلليون دوللارعا دەيىن جەتەتىن فيلم تۇسىرەدى. مەگاپوليستە تەحنيكالاردى، دەكوراسيالاردى جانە ترانسپورتتى جالعا الادى. مۇنىڭ بارلىعى ەكونوميكانىڭ دامۋىنا دا كوپ سەپتەسەتىنى ءسوزسىز»، - دەيدى پروديۋسەر ەرنار قۇرماشيەۆ.  

كينوكوميسسيا وسى جىلدىڭ سوڭىنا دەيىن جۇمىسىن باستايدى. ەندى بىرنەشە جىلدان كەيىن الماتىعا دا جاڭا زەلاندياعا تۋريستەردىڭ اعىلعانى سەكىلدى الەم حالىقتارىنىڭ كوپتەپ كەلۋى ابدەن مۇمكىن.