ەلباسىنىڭ 5 الەۋمەتتىك باستاماسىنىڭ ىسكە اسىرىلۋىن تالقىلاۋ «نۇر وتان» پارتياسىنىڭ الماتى قالاسىنداعى فيليالىندا جالعاستى. قوعامدىق وتىرىستا شاھار باسشىسى باۋىرجان بايبەك استانادان كەلگەن قوناقتارعا اتالمىش باستاما اياسىندا اتقارىلعان جۇمىستاردى باياندادى.
بۇگىندە قالادا 22 مىڭنان استام ادام تۇرعىن ءۇي كەزەگىندە تۇر. سوندىقتان بولاشاقتا حالىقتى باسپانامەن قامتۋ ءۇشىن قارقىندى قۇرىلىس جۇرگىزىلمەك. بولجام بويىنشا، 2035 جىلعا قاراي الىپ شاھار تۇرعىندارىنىڭ سانى 3 ميلليونعا جەتەدى. وسىعان وراي، قولجەتىمدى باسپانا سالۋعا باسىمدىق بەرىلمەك.
بىلتىر قالادا 1 ملن 920 مىڭ شارشى مەتر تۇرعىن ءۇي سالىنسا، وسى جىلى 15 مىڭ 400 پاتەر بوي كوتەرمەك. پاتەرلەر مەملەكەت ۇسىنعان ءتۇرلى ءتيىمدى باعدارلامالار ارقىلى ۇلەستىرىلەدى. ماسەلەن، «7-20-25» باعدارلاماسى اياسىندا نەسيە الۋعا ءوتىنىش بىلدىرگەن وتانداستارىمىزدىڭ 38 پايىزى الماتىدان ءۇي الۋعا نيەتتەنگەن. ونىڭ تەڭ جارتىسى ءقازىردىڭ وزىندە ماقۇلدانىپتى. سونىڭ ارقاسىندا 480 وتباسى باسپانالى بولماق. ال «نۇرلى جەر» باعدارلاماسى اياسىندا بيىل 6 مىڭنان استام پاتەر قولدانىسقا بەرىلەدى.
«الماتى جاستارى» قالالىق تۇرعىن ءۇي باعدارلاماسى بويىنشا سوڭعى ەكى جىلدا 3 ملرد تەڭگە ءبولىندى. وتكەن جىلى جەڭىلدەتىلگەن شارتپەن 108 جاس وتباسى پاتەر الدى. ال بيىل وسى باعدارلاما ارقىلى كەمىندە، 200 پاتەر بولىنەدى. ءبىز كوپ بالالى جانە از قامتىلعان وتباسىلارعا، سونداي-اق مۇمكىندىگى شەكتەۋلى جاندارعا قولجەتىمدى باسپانا سالۋدى جالعاستىرامىز. مەملەكەت ينجەنەرلىك جەلىلەردى تارتۋ ارقىلى قۇرىلىستى سۋبسيديالايدى»، –دەدى الماتى قالاسىنىڭ اكىمى باۋىرجان بايبەك.
تۇرعىن ۇيدەن بولەك، جيىندا «جوعارى ءبىلىم بەرۋ»، «شاعىن نەسيە بەرۋدى كوبەيتۋ» جانە «ەلدى گازبەن قامتاماسىز ەتۋ» ماسەلەسى دە قوزعالدى. ءقازىر الماتىنىڭ 96 پايىزى گازداندىرىلعان بولسا، جىل سوڭىنا دەيىن جەكە سەكتوردىڭ بارلىعى كوگىلدىر وتىنعا كوشىرىلەدى. بۇل قالا تازالىعىن ساقتاپ، ەكولوگيالىق احۋالدى جاقسارتۋعا مۇمكىندىك تۋعىزادى.
ال از قامتىلعان وتباسىلارعا الەۋمەتتىك كومەك بەرۋ ءۇشىن قالا تاراپىنان قولداۋ ءالى دە جالعاسىن تاپپاق. ياعني، الەۋمەتتىك از قامتىلعان وتباسىلاردى قولداۋ ءۇشىن قالا بيۋدجەتىنەن بولىنەتىن 179 ملرد تەڭگە كەلەر جىلى دا كەمىمەيدى. ساناق بويىنشا، 210 مىڭ الماتىلىق 25 ايلىق ەسەپتىك كورسەتكىشتەن تومەن جالاقى الادى ەكەن. ەندى ولاردىڭ سالىق مولشەرى تومەندەتىلمەك.
«مەملەكەت باسشىسىنىڭ ەكىنشى باستاماسى بويىنشا سالىق زاڭناماسىنا بارلىق قاجەتتى وزگەرىستەر 2 شىلدەدە ەنگىزىلدى. وسىعان وراي، 25 ايلىق ەسەپتىك كورسەتكىشتەن تومەن جالاقى الاتىن جۇمىسشىلار ءۇشىن سالىعى 10 ەسەگە تومەندەتىلدى. اتالعان مەحانيزم 2019 جىلدىڭ 1 قاڭتارىنان باستاپ ىسكە قوسىلادى»، – دەدى «پرەزيدەنتتىڭ 5 الەۋمەتتىك باستاماسىن» ىسكە اسىرۋدى باقىلاۋ بويىنشا قوعامدىق كەڭەستىڭ ءتوراعاسى باقىتجان جۇماعۇلوۆ.
«الماتىدا ءبىزدىڭ ويىمشا، ەلباسىنىڭ 5 الەۋمەتتىك باستاماسى ناتيجەلى جۇزەگە اسىرىلىپ جاتىر. ەلباسىمىزدىڭ بۇل باستاماسى حالىقتىڭ ءال-اۋقاتىن ارى قاراي ارتتىرۋعا باعىتتالعان. وسى جۇمىستاردىڭ تولىقتاي، ۋاقىتىلى جانە ساپالى تۇردە جۇزەگە اسۋىنا ءبىزدىڭ پارتيامىز قوعامدىق باقىلاۋ جۇرگىزۋدە»، – دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ.
