الماتىلىقتار قالا كۇنىن دۋمانداتىپ اتاپ ءوتتى. كەشە مەرەكە الاڭدارىندا 100 توننادان استام الما ساۋدالاندى. الىپ شاھاردىڭ تۋعان كۇنىنە وراي ۇيىمداستىرىلعان Apple Fest الما فەستيۆالىندە قالانىڭ باستى جەمىسىن شارۋا قوجالىقتارى تۇرعىندارعا قولجەتىمدى باعامەن ساتتى.
ءداستۇرلى الما فەستيۆالىنىڭ بيىل اۋقىمى كەڭ. مەگاپوليس باسشىسى باۋىرجان بايبەك قالا تۇرعىندارىن ايتۋلى مەرەكەمەن قۇتتىقتاپ، الماتىنى دامىتۋ جولىندا اتقارىلىپ جاتقان جۇمىستاردى ايتىپ ءوتتى.
بۇگىندە «ادامدارعا ارنالعان قالا» جوباسى اياسىندا تاريحي ورتالىقتىڭ 60 پايىزى جاڭاردى. قالانىڭ ءسانى كەلىسىپ، ءال-اۋقاتى ارتىپ كەلەدى. سالتاناتتى شارا بارىسىندا «الماتى قالاسىنىڭ قۇرمەتتى ازاماتى» اتاعىن العان ازاماتتارعا ماراپاتتار تابىستالدى.
«مىڭ جىلدىق تاريحى بار كيەلى مەكەن – الماتى ەڭ الدىمەن، ەلباسى اتاپ وتكەندەي، تاۋەلسىزدىگىمىزدىڭ التىن بەسىگى. بۇگىندە الماتى ەلىمىزدىڭ ونەر مەن ءبىلىم، ادەبيەت پەن مادەنيەت، ءقارجى، سپورت پەن تۋريزم ورتالىعىنا اينالدى. ءومىر سۇرۋگە، ءبىلىم الۋعا، ەڭبەك ەتۋگە، بيزنەس جۇرگىزۋگە قولايلى، تۋريستەر ءۇشىن تارتىمدى، ورتا ازياداعى ءىرى وڭىرلىك ماگنيت»، – دەدى الماتى قالاسىنىڭ اكىمى باۋىرجان بايبەك.
قالا تۇرعىندارى مەن قوناقتارىنىڭ الاڭسىز تىنىعۋى ءۇشىن مەرەكەلىك شارالاردا بار جاعداي جاسالدى. المادان جاسالعان ءارتۇرلى ينستاللياسيالار قۇرىلدى. ءبىر مەزگىلدە ءبىر الاڭدا بىرنەشە شارا ءوتتى.
«26 سورت جەتكىزىلدى. ولاردىڭ اتاۋىن تۇگەل ءتىزىپ ايتىپ شىعۋ مۇمكىن ەمەس، اپورتتان باستاپ «امەريكانكا»، «ۆوسحود»، «زولوتوە پريەۆوسحودنوە»، «تيۋلپان» سياقتى تۇرلەرى تولىپ جاتىر. الما وسىرۋمەن اينالىساتىندىقتان، اۋداندا، وبلىستا ءبارى قۇرمەت كورسەتىپ، ىزگى نيەت-تىلەكتەرىن ءبىلدىرىپ وتىرادى. مەن وسى المالاردى كۇتىپ-باپتاپ ءجۇرىپ، كەيدە شارشاعانىمدى ۇمىتىپ كەتەمىن»، – دەيدى اقليما بەكماعامبەتوۆا.
