الماتى اۆتوبۋستارىندا ۆاليداتورلار ورناتىلمايدى. ويتكەنى، قوعامدىق كولىكتە جۇرگىزۋشىمەن ەسەپ ايىرىساتىن جولاۋشىلار سانى سيرەپ كەلەدى. جولاۋشىلاردىڭ تەك 2 پايىزى جولاقىسىن قولما-قول تولەسە، 97 پايىزى «وڭاي» كارتاسىن قولدانادى. سوندىقتان، قوعامدىق كولىكتەردە قوسىمشا ۆاليداتور قويۋعا قاجەتتىلىك جوق دەيدى الماتىنىڭ كولىك حولدينگىندەگىلەر.
بۇگىن ءبىرقاتار ب ا ق قالاداعى اۆتوبۋستارعا 2019 جىلى ۆاليداتورلار قايتا ورناتىلادى دەگەن اقپار جاريالاعان بولاتىن. ءتىپتى، قوعامدىق كولىكتەر ۇشىرايتىن جول اپاتتارىنىڭ 90 پايىزى جۇرگىزۋشىنىڭ جولاۋشىدان تولەم قابىلداۋى كەزىندە بولاتىنىن جازعان. الايدا، كولىك حولدينگى بۇل اقپاراتتىڭ دا جاڭساق ەكەنىن مالىمدەپ وتىر.
«قوعامدىق كولىكتەرگە ۆاليداتورلار قايتا ورناتىلادى دەگەن اقپارات جالعان. كەزىندە، جولاقى تولەمى «وڭاي» كارتاسى ارقىلى جانە اقشالاي جاسالعان ۋاقىتتا، جولاۋشىلاردىڭ 45 پايىزى اقىنى جۇرگىزۋشىگە بەرەتىن. كەيىن سارالانعان تاريف ەنگىزىلىپ، قولما-قول تولەم قۇنى قىمباتتادى. وسى تۇستا تۇرعىندار جاپپاي «وڭاي» كارتاسىنا كوشتى. ءقازىر ءبىر قوعامدىق كولىكتە كۇنىنە 10-15 ادام عانا جول اقىسىن جۇرگىزۋشىگە بەرسە، 97 پايىزى كارتامەن ەسەپتەسەدى. سوندىقتان بىزگە ۆاليداتور قويۋعا قاجەتتىلىك جوق. ۆاليداتور ورناتۋ قوسىمشا شىعىن ءارى اۆتوبۋس جەلىلەرىنە قوسىمشا جۇكتەمە بولادى»، – دەدى «الماتى قالاسى كولىك حولدينگى» ج ش س ديرەكتورى سادير حامرايەۆ.
حولدينگ ەسەبى بويىنشا، قوعامدىق كولىكتەردە تولەم كارتاسى ەنگىزىلگەلى بەرى كولەڭكەلى اقشا اينالىمى جويىلعان. ماسەلەن، قولما-قول تولەم كەزىندە تاسىمالداۋشى كومپانيالار ءبىر ايلىق تابىسىن 800 ميلليون تەڭگەمەن شەكتەپتى. ال ەلەكتروندى بيلەت جۇيەسى ەنگىزىلگەلى تابىس ەسەلەنە ءتۇسىپ، ولاردىڭ اي سايىنعى تابىسى 1،5 ميلليردقا جەتەتىنى بەلگىلى بولعان. ءقازىر قوعامدىق كولىكتەردەن اي سايىن 2 ملرد تەڭگە تۇسەدى. سوندىقتان «وڭاي» كارتاسىن قولدانۋشىلاردىڭ سانىن بۇدان ارى كوبەيتۋ كوزدەلىپتى. سونداي-اق، قولما-قول تولەمدى تۇبەگەيلى توقتاتىپ، جۇرگىزۋشىدەن جۇكتەمەنى الۋ ءۇشىن تولەم جاساۋدىڭ جاڭا ءادىسىن دە ىسكە اسىرماق.
«ءبىز جىل سوڭىنا دەيىن جول اقىسىن سمس ارقىلى تولەۋ جۇيەسىن ەنگىزەمىز. وعان قازاقستاننىڭ بارلىق ۇيالى بايلانىس وپەراتورلارى قاتىسادى. ەگەر جولاۋشى كارتاسىن ۇمىتىپ كەتسە، جول اقىسىن جۇرگىزۋشىگە تولەمەي، سمس-پەن وتەسە بولادى. ول ءۇشىن ارنايى ءبىرىڭعاي ءنومىر قۇرىلادى. ول نومىرگە «وڭاي» تەرمينالىندا جازىلعان قوعامدىق كولىكتىڭ كودىن جىبەرەسىز. بىردەن جولاقىسى تولەنىپ، سىزگە حابارلاما كەلەدى»، – دەدى سادير حامرايەۆ.
