–جانكۇيەرلەر مەنىڭ رينگكە توبەلەسكە شىققانىمدى عانا كورەدى. ءومىرىمنىڭ باسقا جاعىنان كوپ حابارسىز. وسى ۋاقىتقا دەيىن ماعان قانشاما رەت وپەراسيا  جاسالدى. اياعىما، قولىما، ارقاما، قابىرعاما... وسىدان ءبىر –ەكى جىل بۇرىن «سالماق قۋامىن» دەپ ءولىم اۋزىنان قالدىم. سپورتتىڭ جولى وتە اۋىر. سەن سپورت جولىندا جانكەشتى تەر توگەسىڭ، ءبىراق ءبىر ساتتە مۇگەدەك بولىپ قالۋىڭ مۇمكىن.

بالام دا بولاشاقتا سپورتپەن اينالىساتىن بولادى. ءبىراق تەك قانا وليمپيادالىق سپورت تۇرىمەن:  دزيۋدو، بوكس، كۇرەسپەن عانا.  اقيقاتىن ايتسام، ول مەنىڭ جولىمدى قايتالاعانىن قالامايمىن. بىزگە مىقتى، قايسار جىگىتتەر كەرەك. وتانىمىزدى، وتباسىمىزدى قورعاۋ ءۇشىن. ال مىقتى بولعان سايىن سەنى كورە المايتىندار دا كوبەيەدى.

سوڭعى 15 جىلدا مەنىڭ كوزىم كوگەرگەن جوق. قاتتى سوققى العان دا جوقپىن. ميىم ورنىندا، دەمەك باعىتىم، ويىم، ويلاۋ قابىلەتىم دە  دۇرىس.

ايقاستان كەيىن اكەم ماعان «ءوزىڭدى ەندى دۇرىس ۇستا»، –دەدى. ونىمەن تولىق كەلىسەمىن. مەن توبەلەسىپ جاتقان كەزدە ول قاتتى تولقىعان سياقتى. كەيىننەن «جۇيكەڭىز سىر بەردى مە؟» دەپ سۇرادىم. ول «ەگەر سەنىڭ بالاڭ ايقاس الاڭىنا شىقسا، سوندا عانا مەنىڭ جايىمدى تۇسىنەسىڭ» دەپ جاۋاپ بەردى.

ارينە، رەسەيدە مەن سەكىلدى قايسار جىگىتتەر وتە كوپ. وكىنىشكە قاراي، ولاردا اكەم سياقتى مىقتى باپكەر جوق. بۇل جاعىنان مەنىڭ جولىم بولدى.

ءبىز بۇگىن ءومىر ءسۇرىپ جاتساق، ەرتەڭ ءولىپ كەتۋىمىز دە بەك مۇمكىن. ءيا، ولەمىز. ءبىراق جەڭىس تە، جەڭىلىس تە، اقشا مەن بەلبەۋ دە ءبارى ۇمىتىلادى. تەك ەلىڭە، وتانىڭا، حالقىڭا جاساعان قايىرىمدى ىستەرىڭ عانا قالادى.

ماعان ارانداتاتىن ساۋالداردى ادەيى قويادى. ولارعا ايتارىم بىرەۋ عانا: مەن داعىستاننىڭ ۇلىمىن، كاليفورنيادا تۇرامىن. ءبىراق ءتولقۇجاتىم – رەسەيدىكى.

ءبىر وتباسىندا 16 بالا ءومىر سۇردىك. ۇيدەگى ءتارتىپ وتە قاتال بولدى. ءبىراق وتە ۇيىمشىل بولىپ وستىك. ءارقايسىسىمىز ارنايى كەستە بويىنشا جۇمىس ىستەدىك. ءبىرىمىز كىر جۋدىق، ەكىنشىمىز اۋلا  سىپىردىق. مەكتەپ بىتىرگەنشە وسىلاي ءوسىپ، تاربيەلەندىك.

ءبىزدىڭ وتباسىمىزدان 5 الەم چەمپيونى، ءبىر UFC چەمپيونى شىقتى، ال اكەم – رەسەيدىڭ ەڭبەك سىڭىرگەن جاتتىقتىرۋشىسى.

ءبارى دە  اكەم جايلى ءجيى سۇرايدى. ال مەن انامدى وتە جاقسى كورەمىن...

 ەركىن قالدان