ەندى الەمدەگى ەڭ ۇزىن قۇراق كورپەنىڭ وتانى – الماتى. وسىلايشا، قازاقستاندىق تىگىنشىلەر 2 جىل بۇرىن مالايزيادا تىركەلگەن رەكوردتى جاڭارتتى.

ناۋرىز ايىنان بەرى 300-دەن استام شەبەر تىككەن كورپە قالا كۇنىندە تاپسىرىلدى. رەكوردتى گيننەسس كىتابىنا تىركەيتىن رەسمي وكىل جاڭا ناتيجە تۋرالى سەرتيفيكاتتى الماتى اكىمى باۋىرجان بايبەككە سالتاناتتى تۇردە تابىستادى. ال مىڭ بوياۋعا مالىنعان جەر جاھانداعى ەڭ ۇزىن قۇراق كورپە تۇڭعىش پرەزيدەنت ساياباعىنا جايىلىپ، الماتىلىقتار مەن قالا قوناقتارىن ءتانتتى ەتتى.  

الماتىنىڭ 1002 جىلدىق تۋعان كۇنىنە ەرەكشە سىيلىق تارتۋ ەتىلدى. مەيرامدى كەڭ كولەمدە تويلاماستان بۇرىن، الدىمەن انگليادان ارنايى كەلگەن دجوانن برەنت  قالا اكىمىنە سەرتيفيكات تابىستادى. وندا الماتىلىق ىسمەرلەردىڭ شىنىمەن دە رەكوردقا كىرگەنى تايعا تاڭبا باسقانداي جازىلعان. گيننەسس رەكوردتار كىتابىنىڭ وكىلدەرى وزدەرىمەن بىرگە گەودەزياشى مامانداردى ەرتە كەلىپتى. ولار تىگىلىپ بىتكەن، سان ءتۇرلى ءارى ءساندى كورپەنىڭ ناقتى ۇزىندىعىن لازەرلىك قۇرىلعىمەن ولشەپتى.

الماتىلىق ىسمەرلەر قۇراق كورپەمەن گيننەستىڭ رەكوردتار كىتابىنا ەندى. الەمدەگى ەڭ ۇزىن كورپە 10 كيلومەتر 900 مەتر بولىپ تىركەلدى. ەستە بولسا، ۇلتتىق ءداستۇردى پاش ەتەتىن تۋىندىنى شەبەرلەر ناۋرىز قارساڭىندا تىگىپ باستاعان. وعان قالاداعى 25 كىتاپحانا مەن تۇرعىندار ات سالىستى.

«سىزدەردى الەمدەگى ەڭ ۇزىن قۇراق كورپە تىگىپ، گيننەستىڭ رەكوردتار كىتابىنا كىرۋلەرىڭىزبەن قۇتتىقتايمىن. قازاقستاندىق قۇراق كورپەنى كورۋ ءۇشىن ارنايى كەلدىك. بۇل شىنىمەن دە ەرەكشە تۋىندى ەكەن. بوياۋى قانىق، ءپىشىمى دە كوز تارتادى. ءدال وسىنداي تۋىندىنى العاش رەت كورۋىم»، – دەدى «گيننەسس رەكوردتار كىتابى» باس كەڭسەسىنىڭ وكىلى دجوانن برەنت.

ال ساياباقتى بويلاي جايىلعان قۇراق كورپەنى كورگەن الماتىلىقتار تاڭدانىستارىن جاسىرا المادى. ايتا كەتەيىك، قۇراق كورپە تىگۋدى قالانىڭ ورتالىقتاندىرىلعان كىتاپحانا جۇيەسى باستاعان. يدەيانى الماتى اكىمدىگى مەن قالا تۇرعىندارى دا قولدادى. ماتا قابىلدايتىن شتاب قۇرىلىپ، وندا كەز كەلگەنى كەلىپ كومەكتەسۋگە مۇمكىندىك العان بولاتىن.