حالىقارالىق دەڭگەيدەگى ونەر بايگەسى رەسپۋبليكا سارايىنىڭ الدىندا ءوتىپ جاتىر. وندا ءداستۇرلى قىزىل كىلەم جايىلىپ، وتاندىق جانە الەمنىڭ ءار تۇكپىرىنەن كەلگەن كينوگەرلەر جيىلدى. ال سالتاناتتى شارا اياقتالىسىمەن ايگىلى كانن فەستيۆالىندە جۇلدە العان «ايكا» ءفيلمىنىڭ كورسەتىلىمى باستالدى.
كينوسۇيەر قاۋىم كوپتەن كۇتكەن ونەر مەرەكەسى بولدى. ءقازىر ALMATY FILM كينوفەستيۆالىنە الەمنىڭ ءار تۇكپىرىنەن كەلگەن مارتەبەلى قوناقتار ءداستۇرلى قىزىل كىلەم ۇستىنەن ءجۇرىپ ءوتتى. بارلىعى دا ءساندى سموكينگ پەن ادەمى كويلەك كيىپ، كەلۋشىلەردىڭ كوزىن قۋانتتى. سالتانانتتى شاراعا وتاندىق تانىمال كينوگەرلەردىڭ بارلىعى جيىلعان. كينوفەستيۆالدىڭ تۇڭعىش رەت ۇيىمداستىرىلىپ وتىرعانىنا قاراماستان، شەتەلدەن كەلگەن اتاقتى كينوگەرلەر دە وتە كوپ. ولاردىڭ قاتارىندا تانىمال نەمىس اكتريساسى ناستاسيا كينسكي دە بار.
«الماتىعا بۇرىن كەلگەنىمدە دە قالا وتە ۇناعان ەدى. ەندى مىنە، فەستيۆالدىڭ ارقاسىندا تاعى جول ءتۇسىپ تۇر. وتە قۋانىشتىمىن. جالپى، الماتى مەن ءۇشىن ەرەكشە ادەمى، ىستىق قالا. اسىرەسە، مۇندا ءتۇرلى ۇلتتىڭ ايرانداي ۇيىپ، ءتاتۋ-تاتتى ءومىر ءسۇرىپ جاتقانىنا تاڭ قالامىن»، – دەدى اكتريسا (گەرمانيا) ناستاسيا كينسكي.
شارانىڭ شىمىلدىعىن كاسىبي ماماندار ەمەس، كىشكەنتاي بالالار اشتى. ولار ءۇشىن اۋەلى ارنايى قىزىل كىلەم ۇيىمداستىرىلدى. بىرىنەن ءبىرى وتكەن كويلەكتەرىن كيىپ، ەرەكشە ساندەنگەن كىشكەنتاي بۇلدىرشىندەر قىزىل كىلەم ۇستىندە وزدەرىن ناعىز ونەر جۇلدىزى سەزىندى. ودان كەيىن بالالار ءۇشىن كينوتەاتردىڭ قوس زالىندا «كولىكتەر» مەن «ارىستان پاتشاسى» مۋلتفيلمدەرىنىڭ كورسەتىلىمى ءوتتى. بالالاردىڭ بۇل قۋانىشىنا ورتاقتاسۋعا «ارىستان پاتشاسىن» تۇسىرگەن رەجيسسەر روبەرت مينكوففتىڭ ءوزى كەلدى.
العى ءسوزدى العان قالا اكىمى باۋىرجان بايبەك، كىشكەنتاي كورەرمەندەرگە مارتەبەلى قوناقتاردى تانىستىردى. اكىم كوپتىڭ كوڭىلىنەن شىعىپ، كينو تاريحىندا ەڭ مول كاسسالىق تابىس جيناعان تۋىندى جاساعان اڭىز ادامنىڭ الماتىعا كەلۋى ۇلكەن قۇرمەت ەكەنىن تىلگە تيەك ەتتى.
«مەن بۇل كينوفەستيۆالدىڭ بالالارعا ارنالعان قىزىل كىلەممەن باستالعانىنا قۋانىشتىمىن. ويتكەنى، ءبىزدىڭ ەرتەڭگى بولاشاعىمىز جانە كينونىڭ بولاشاعى وسى كىشكەنتاي بۇلدىرشىندەرىمىزدىڭ قولىندا. ءبىزدىڭ «بولاشاق» كورپوراتيۆتىك قورى «ۋولت ديسنەي» ستۋدياسىمەن 2011 جىلدان بەرى بىرلەسىپ جۇمىس ىستەۋدە. وسى ۋاقىت ارالىعىندا ديسنەيدىڭ 27 ءمۋلتفيلمىن قازاق تىلىنە اۋداردىق. بالالارىمىز الەمگە تانىمال بولعان، تاماشا انيماسيالىق تۋىندىلاردى قازاق تىلىندە كورە الاتىنى قۋانتادى. فەستيۆال اياسىندا دا كىشكەنتاي كورەرمەندەرىمىز ءۇشىن ارنايى كورسەتىلىمدەر بولادى»، – دەدى الماتى قالاسىنىڭ اكىمى باۋىرجان بايبەك.
ALMATY FILM FESTIVAL كينوفەستيۆالى 19 قىركۇيەككە دەيىن جالعاستى. وسى ۋاقىت ارالىعىندا كورەرمەن نازارىنا 30 كينوتۋىندى ۇسىنىلادى. ولاردىڭ ون شاقتىسى كورنكۋرستىق باعدارلاماعا قاتىستى. قازىلاردى ءتانتى ەتىپ، ۇزدىك شىققان گران-پري يەسىنە 3 ميلليون تەڭگە بەرىلدى. ال «ۇزدىك رەجيسسەر» 2 ملن تەڭگەنى قانجىعاسىنا بايلادى. «ۇزدىك اكتەر مەن اكتريسا» جانە «قازىلار القاسىنىڭ ارنايى جۇلدەسى» نوميناسيالارىنا 1 ميلليون تەڭگەدەن قاراستىرىلدى.
ايتا كەتسەك، فەستيۆالگە قاتىسۋشى فيلمدەردىڭ باعاسىن تانىمال كينوگەرلەر بەردى. قازىلارعا رەسەيلىك تانىمال رەجيسسەر سەرگەي بودروۆ تورەلىك ەتتى.
«فەستيۆالدىڭ پايداسى وتە زور. كورەرمەندەر ساپالى فيلمدەردى تەگىن كورۋگە مۇمكىندىك الادى. ەڭ باستىسى، مۇندا كينو ونەرىندەگى جاڭا ەسىمدەر بەلگىلى بولادى. جالپى، ءوز باسىم وسى ونەر بايگەسىندە قازىلىق ەتكەنىمە قۋانىشتىمىن. بۇل كينوفەستيۆالدىڭ بولاشاعى زور دەپ ويلايمىن. الداعى 4 كۇندە وتە قىزىقتى فيلمدەر كورەمىز جانە ولاردى لايىقتى باعالاپ، جاس تالانتتاردىڭ جولىن اشامىز دەپ ۇمىتتەنەمىن»، – دەدى قازىلار القاسىنىڭ جەتەكشىسى، كينورەجيسسەر (رەسەي) سەرگەي بودروۆ.
كينوفەستيۆال شەڭبەرىندە ءارتۇرلى بيزنەس-فورۋمدار ۇيىمداستىرىلىپ، تانىمال كينوگەرلەر ءوز شەبەرلىك ساباقتارىن وتكىزدى. كورسەتىلىمدەر «دوستىق پلازا» كەشەنىندەگى «سينەماكس» جانە سۋم-داعى «ليۋميەرا سينەما» كينوتەاترلارىندا كورسەتىلدى. ال فەستيۆالدىڭ شىمىلدىعىن بيىل كانن كينوفەستيۆالىنەن جۇلدە العان، رەجيسسەر سەرگەي دۆورسيەۆويدىڭ اتاقتى «ايكا» ءفيلمى اشتى. تۋىندىنىڭ قازاقستاندىق كورەرمەندەر ءۇشىن تۇساۋكەسەرى كەشكى 20:30-دا وسى رەسپۋبليكا سارايىندا ءوتتى.
